precautionary dose registration: ఒమిక్రాన్ విజృంభిస్తున్న నేపథ్యంలో జనవరి 10వ తేదీ నుంచి ఆరోగ్య సిబ్బంది, ఫ్రంట్లైన్ వర్కర్లు, 60 ఏళ్లుపైబడి ఆరోగ్య సమస్యలు ఉన్నవారికి ప్రికాషన్ డోసు ఇవ్వనున్నారు. ఈ క్రమంలో.. మళ్లీ రిజిస్ట్రేషన్ చేసుకోవాలా? లేదా అనే విషయంపై స్పష్టతనిచ్చింది కేంద్ర వైద్య, ఆరోగ్య శాఖ.
కొవిడ్-19 ప్రికాషన్ డోసు పొందాలనుకుంటున్న లబ్ధిదారులు మళ్లీ కొత్తగా రిజిస్ట్రేషన్ చేసుకోవాల్సిన అవసరం లేదని స్పష్టం చేసింది. ఇప్పటికే రెండు డోసులు తీసుకున్న అర్హులైన వారు నేరుగా అపాయింట్మెంట్ తీసుకోవటం లేదా నేరుగా వ్యాక్సినేషన్ కేంద్రానికి వెళ్లి టీకా తీసుకోవచ్చని తెలిపింది.
" వ్యాక్సినేషన్ షెడ్యూల్ను జనవరి 8న విడుదల చేస్తాం. అలాగే శుక్రవారం సాయంత్రం నుంచే ఆన్లైన్ అపాయింట్మెంట్ అదుబాటులోకి వస్తుంది. వ్యాక్సిన్ కేంద్రం వద్దే అపాయింట్మెంట్ బుక్ చేసుకోవటం జనవరి 10నుంచి మొదలవుతుంది."
- కేంద్ర ఆరోగ్య శాఖ.
ప్రికాషన్ డోసు కింద గతంలో తీసుకున్న వ్యాక్సిన్నే ఇవ్వనున్నట్లు కేంద్రం ఇప్పటికే ప్రకటించింది. కొవాగ్జిన్ తీసుకున్న వారికి కొవాగ్జిన్, కొవిషీల్డ్ తీసుకున్నవారికి కొవిషీల్డ్నే ఇవ్వనున్నట్లు నీతి ఆయోగ్ సభ్యులు డాక్టర్ వీకే పాల్ తెలిపారు.
ఏంటి ఈ ప్రికాషన్ డోసు?
ప్రికాషన్ డోసుకు ప్రస్తుతం సరైన నిర్వచనం లేదు. టీకా రెండు డోసులు తీసుకున్నవారు.. మూడో డోసుగా వేరే రకం వ్యాక్సిన్ను తీసుకోవడాన్ని ప్రికాషన్ డోసు అనొచ్చని కొవిడ్ వ్యాక్సినేషన్ సాంకేతిక బృందం చెబుతోంది. అంటే.. కొవాగ్జిన్ టీకాలు తీసుకున్నవారికి మరో డోసుగా.. ఇతర వ్యాక్సిన్లు ఇవ్వడం అని అర్థం! ఇదే నిజమైతే.. మూడో డోసు తీసుకున్నామంటే.. అది పూర్తిగా కొత్త టీకా అవుతుంది.
రెండో డోసు తీసుకున్న తర్వాత 9 నుంచి 12 నెలలకు ప్రికాషన్ డోసు ఇవ్వనున్నట్లు తెలుస్తోంది. టీకా పంపిణీపై ఏర్పాటైన జాతీయ సాంకేతిక సలహా బృందం ఈ మేరకు కాలవ్యవధిపై సమాలోచనలు చేస్తోంది. శాస్త్రీయ పద్ధతుల్లో అంచనా వేసి దీనిపై తుది నిర్ణయం తీసుకోనున్నారు. త్వరలోనే దీనిపై ప్రకటన వచ్చే అవకాశం ఉంది.
ఇదీ చూడండి: మోదీ చెప్పిన 'ప్రికాషన్ డోసు'కు అర్థమేంటి? బూస్టర్ కాదా?
