మహారాష్ట్ర ఎమ్మెల్యే, కాంగ్రెస్ సీనియర్ నేత రావుసాహెబ్ అంతపుర్కర్ కొవిడ్ బారినపడి కన్నుమూశారు. 64 ఏళ్ల రావుసాహెబ్.. ముంబయిలోని ఆస్పత్రిలో చికిత్స పొందుతూ శుక్రవారం రాత్రి తుదిశ్వాస విడిచారని పార్టీ వర్గాలు తెలిపాయి.
మార్చి 19న కొవిడ్ బారిన పడిన అంతపుర్కర్ను.. తొలుత నాందేడ్లోని ఓ ఆస్పత్రిలో చేర్పించారు. మెరుగైన చికిత్స కోసం.. అదే నెల 22న ముంబయి ఆస్పత్రికి తరలించారు. చికిత్స అనంతరం మార్చి 28న మరోసారి కొవిడ్ పరీక్షలు నిర్వహించగా.. వైరస్ లేనట్టు తేలింది. అయినప్పటికీ శ్వాసకోశ సంబంధిత వ్యాధితో ఇబ్బంది పడుతున్న ఆయన్ను ఐసీయూలో ఉంచారు. పరిస్థితి విషమించినందున.. ఈ నెల 1న వెంటిలేటర్ అమర్చారు. అయినప్పటికీ ఫలితం లేకపోయింది. చివరకు గత రాత్రి(ఏప్రిల్ 9న) ప్రాణాలు కోల్పోయారు.
అంతపుర్కర్ అంత్యక్రియలు.. నాందేడ్లోని ఆయన స్వగ్రామంలో జరగనున్నాయి.
ఇంజనీర్ ఉద్యోగాన్ని వదులుకుని..
వృత్తి రీత్యా ఇంజనీర్ అయిన అంతపుర్కర్.. తన ఉద్యోగాన్ని వదులుకుని కాంగ్రెస్లో చేరారు. 2009 అసెంబ్లీ ఎన్నికల్లో దెగ్లూర్ నుంచి పోటీ చేసి విజయం సాధించారు. 2014 ఎన్నికల్లో ఓడినా.. 2019 అసెంబ్లీ ఎన్నికల్లో మరోసారి అదే స్థానంలోనే బరిలోకి దిగి గెలుపొందారు.
ఇదీ చదవండి: అసోం అంతర్జాతీయ పార్కుకు ఆ మూడు ఖడ్గమృగాలు
