Jammu Kashmir Encounter Today : జమ్ముకశ్మీర్లో జరిగిన ఎన్కౌంటర్లో ఐదుగురు ఉగ్రవాదులు హతమయ్యారు. కశ్మీర్లోని కుల్గామ్ జిల్లాలో శుక్రవారం ఉదయం ఈ ఘటన జరిగింది. భద్రతాదళాలు, పోలీసులు సంయుక్తంగా చేపట్టిన ఆపరేషన్లో మృతిచెందిన ముష్కరులను లష్కరే తొయిబా ఉగ్రవాద సంస్థకు చెందిన వారిగా అధికారులు గుర్తించారు.
అధికారులు తెలిపిన సమాచారం ప్రకారం.. జమ్ముకశ్మీర్ కుల్గామ్ జిల్లా నెహామా ప్రాంతంలో ముష్కరులు ఉన్నారన్న సమాచారం భద్రతా బలగాలకు గురువారం అందింది. పోలీసులు, సీఆర్పీఎఫ్, ఆర్మీకి చెందిన 34 రాష్ట్రీయ రైఫిల్స్ బృందాలు, 9 పారామిలటరీ బృందాలు ఉగ్రవాదులు ఉన్న ప్రాంతాన్ని చుట్టుముట్టాయి. ఈ క్రమంలో తనిఖీలు జరుపుతున్న భద్రతా సిబ్బందిపై ఉగ్రవాదులు కాల్పులు జరిపారు. దీంతో సెర్చ్ ఆపరేషన్ ఎన్కౌంటర్గా మారింది. గురువారం ఇరు వర్గాల మధ్య కాల్పులు జరిగాయి. రాత్రి వేళ కాల్పులకు విరామం ఇచ్చిన భద్రతా సిబ్బంది.. ఆ ప్రాంతం నుంచి ఎవరూ బయటకు వెళ్లకుండా పహారా కాశారు.
ఎన్కౌంటర్లో ఐదుగురు ముష్కరుల హతం
Jammu Kashmir Encounter 5 Terrorists Killed : శుక్రవారం ఉదయం ఓ ఇంట్లో నుంచి ముష్కరులు భద్రతా సిబ్బందిపై కాల్పులు జరిపారు. వారి కాల్పులకు భద్రతా బలగాలు దీటుగా స్పందించాయి. ఈ ఎన్కౌంటర్లో ఐదుగురు ఉగ్రవాదులు హతమైనట్లుగా అధికారులు ధ్రువీకరించారు. కాల్పుల్లో చనిపోయిన ఐదుగురు లష్కరే తొయిబా ఉగ్రవాద సంస్థకు చెందిన వారని గుర్తించారు.
కుల్గామ్ ప్రాంతంలో ఉగ్రవాదులు ఉన్నారన్న సమాచారం ఇంటెలిజన్స్ విభాగం నుంచి మా భద్రతా బలగాలకు అందింది. సెర్చ్ ఆపరేషన్ జరుగుతున్న సమయంలో ఓ ఇంటి నుంచి ముష్కరులు కాల్పులు జరిపారు. వారిపై మా భద్రతా బలగాలు జరిపిన ఎదురుకాల్పుల్లో ఐదుగురు ముష్కరులు హతమయ్యారు.
-విధి కుమార్ బిల్ది, ఐజీపీ, కశ్మీర్
డ్రోన్ల ద్వారా మృతదేహాలను..
డ్రోన్ల ద్వార ఐదుగురు ముష్కరుల మృతదేహాలను గుర్తించామని.. వాటిని వెలికితీసి ఆ ప్రాంతాన్ని శానిటైజ్ చేస్తున్నామని ఓ సీనియర్ పోలీస్ అధికారి తెలిపారు. ఆపరేషన్ ఇంకా కొనసాగుతోందని అధికారులు చెప్పారు.
