Groom Beaten Up: మరికాసేపట్లో పెళ్లి అనగా వధువు తరపు వాళ్లను రూ.10 లక్షలు కట్నం డిమాండ్ చేశారు వరుడి కుటుంబీకులు. వధువు తరపు వారి నుంచి డబ్బులు వస్తాయి అనుకుంటే సీన్ రివర్స్ అయింది. అమ్మాయి తరపు బంధువులు, అతిథులు వరుడిపై దాడికి దిగారు. అందరూ కలిసి చితకబాదారు. కానీ అది కట్నం అడిగినందుకు కాదు. వరుడికి ఇదివరకే చాలా పెళ్లిళ్లు అయ్యాయని తెలియడం వల్ల. ఇందుకు సంబంధించిన వీడియో సోషల్మీడియాలో వైరల్ అయింది.
ఇదీ జరిగింది..
ఉత్తర్ప్రదేశ్లోని ఆగ్రాకు చెందిన నిందితుడు ముజమ్మిల్ హుసైన్కు దిల్లీకి చెందిన యువతితో పెళ్లి నిశ్చయమైంది. గాజియాబాద్ జిల్లా మోహన్నగర్లో శుక్రవారం వివాహ వేడుకలను నిర్వహించారు బంధువులు. మరికాసేపట్లో పెళ్లి అనగా రూ.10 లక్షల కట్నం అడిగారు హుసైన్ తరఫు వారు. అదే సమయంలో వధువు కుటుంబీకులకు హుసైన్కు ఇదివరకే వివాహం జరిగిందన్న విషయం తెలిసింది. దీంతో ఆగ్రహం చెందిన వధువు తరపు వారు పెళ్లికొడుకుపై దాడికి దిగారు.
సమాచారం అందుకుని ఘటనాస్థలానికి చేరుకున్న పోలీసులు నిందితుడిని అదుపులోకి తీసుకున్నారు. హుసైన్ పెళ్లి వ్యవహారాన్ని కప్పిపుచ్చే ప్రయత్నం చేసిన అతడి తండ్రిపై కూడా కేసు నమోదు చేశారు. ఈ క్రమంలో బాధితురాలి కుటుంబసభ్యులు మరో యువతిని వివాహం చేసుకున్నట్లుగా ఉన్న హుసైన్ పెళ్లి ఫొటోను పోలీసులకు అందించారు. నిందితుడు అనేకమందిని వివాహం చేసుకున్నాడని ఆరోపించారు.
ఇదీ చూడండి : చలిపులి.. వణుకుతున్న ఉత్తర భారతం
