భారతదేశంలోనే కాదు ఖండాల్లోనూ విలువైన వజ్రాలకు ప్రఖ్యాతి గాంచిన మధ్యప్రదేశ్లోని పన్నాలో మరో అరుదైన వజ్రం బయటపడింది. నవమి రోజున దొరికిన ఈ అరుదైన వజ్రం నొయిడాకు చెందిన రాణా ప్రతాప్ను రాత్రికి రాత్రే లక్షాధికారిని చేసింది. పన్నా గనుల్లో మరో అరుదైన వజ్రం తమ గనిలో దొరికిందని గని యజమాని సంబరాలు చేసుకుంటున్నాడు.
వివరాల్లోకి వెళ్తే.. ఉత్తర్ప్రదేశ్లోని నొయిడాలో నివాసముంటున్న రాణా ప్రతాప్ తన భార్య పేరుతో మధ్యప్రదేశ్లోని సిరస్వాహాలోని భర్కా గని ప్రాంతంలో ఓ మైన్ లీజుకు తీసుకున్నారు. ఆరు నెలలుగా తవ్వకాలు జరుపుతుండగా.. నవమి రోజున(మంగళవారం) అతనికి 9.64 క్యారెట్ల నాణ్యమైన వజ్రం ఒకటి దొరికింది. అంతటి విలువైన వజ్రం తమకు దొరికినందుకు రాణా ప్రతాప్ కుటుంబసభ్యులు ఆనందంలో మునిగి తేలుతున్నారు. ఆ వజ్రాన్ని పన్నాలోని డైమండ్ ఆఫీస్లో డిపాజిట్ చేసినట్లు తెలిపాడు రాణా ప్రతాప్.
పన్నాలో దొరికే వజ్రాల గురించి తన స్నేహితులు చెప్పగా అక్కడ ఓ గనిని లీజుకు తీసుకున్నానని, ఎప్పటికన్నా తనని అదృష్టం వరిస్తుందని అప్పుడే అనుకున్నానని రాణా ప్రతాప్ అన్నాడు. ఈ వజ్రం విలువ సుమారు రూ.40 లక్షలు ఉంటుందని అంచనా. దీన్ని రానున్న డైమండ్ ఆక్షన్లో ఉంచనున్నట్లు తెలిపిన రాణా ప్రతాప్.. వేలం ద్వారా వచ్చిన డబ్బులో కొంతభాగం పేద పిల్లల సహాయం కోసం ఖర్చు చేస్తానని అన్నాడు. మరో పెద్ద గనిని లీజుకు తీసుకుని, తవ్వకాలు జరిపే ఆలోచనలో ఉన్నట్లు తెలిపాడు.
ఇదీ చదవండి: పోలీస్ హత్యకు రెండు రోజుల్లోనే రివెంజ్- నలుగురు ఉగ్రవాదులు హతం
సైబర్ నేరగాళ్లపై సీబీఐ కొరడా.. 105 ప్రదేశాల్లో సోదాలు.. ఇంటర్పోల్ సమాచారంతో...
