ହାଇଦ୍ରାବାଦ: ଗର୍ଭାବସ୍ଥା ସମ୍ପୂର୍ଣ୍ଣା ନାରୀର ପ୍ରତୀକ । ଗର୍ଭାବସ୍ଥାରେ ଖାଦ୍ୟପେୟ ଠାରୁ ଆରମ୍ଭ କରି ସ୍ବାସ୍ଥ୍ୟର ଯତ୍ନ ନେବା ଆବଶ୍ୟକ । କୁହାଯାଏ ଗର୍ଭଧାରଣର ପ୍ରଥମ 3 ମାସ ଜଟିଳ ହୋଇଥାଏ । ଏହି ସମୟରେ, ନିୟମିତ ଚେକଅପ୍ କରିବା ଏବଂ ଖାଇବା ଅଭ୍ୟାସ ବିଷୟରେ ଅଧିକ ସତର୍କ ହେବା ଆବଶ୍ୟକ ହୋଇଯାଏ । ଗର୍ଭଧାରଣର ପ୍ରଥମ ତିନି ମାସରେ, ଡାକ୍ତରମାନେ କିଛି ପରୀକ୍ଷା କରିବାକୁ କୁହନ୍ତି । କାରଣ ଏହି ପରୀକ୍ଷା ଦ୍ବାରା ମାଆକୁ ହୋଇଥିବା ରୋଗ ଠାରୁ ଶିଶୁକୁ ସୁରକ୍ଷା କରିବା ଏବଂ ଉଭୟ ମା ଏବଂ ଶିଶୁଙ୍କ ସ୍ୱାସ୍ଥ୍ୟ ଉପରେ ସଠିକ୍ ନଜର ରଖାଯାଇପାରିବ । ପେଟରେ ବଢୁଥିବା ଛୁଆ ସୁସ୍ଥ ରହିଛି କି ନାହିଁ ଏହି ଟେଷ୍ଟରୁ ଜଣାପଡିଥାଏ ।

ରକ୍ତ ପରୀକ୍ଷା ଠାରୁ ଅଲଟ୍ରାସାଉଣ୍ଡ ପର୍ଯ୍ୟନ୍ତ ଡାକ୍ତରମାନେ ସବୁକିଛି ପରୀକ୍ଷା କରିବା ପାଇଁ ସୁପାରିଶ କରିଥାଆନ୍ତି । ଗର୍ଭଧାରଣ ପରୀକ୍ଷା, ରକ୍ତ ପରୀକ୍ଷା,ପରିସ୍ରା ପରୀକ୍ଷା, ଅଲଟ୍ରାସାଉଣ୍ଡ ଭଳି ପରୀକ୍ଷା ଏହି ସମୟ ମଧ୍ୟରେ କରାଯାଇଥାଏ । ଏହି ସମସ୍ତ ପରୀକ୍ଷା ଗୁରୁତ୍ୱପୂର୍ଣ୍ଣ କାରଣ ଆରମ୍ଭରେ ଯେକୌଣସି ପ୍ରକାରର ବିପଦ କିମ୍ବା ସ୍ୱାସ୍ଥ୍ୟ ସମ୍ବନ୍ଧୀୟ ସମସ୍ୟା ଚିହ୍ନଟ ହୋଇପାରିବ ଯାହା ଫଳରେ ଉପଯୁକ୍ତ ଚିକିତ୍ସା ଠିକ୍ ସମୟରେ ହୋଇପାରିବ। । ତେବେ ଜାଣନ୍ତୁ ଗର୍ଭାବସ୍ଥାର ପ୍ରଥମ 3 ମାସ ମଧ୍ୟରେ କେଉଁ ଟେଷ୍ଟ ଗୁରୁତ୍ବପୂର୍ଣ୍ଣ

ପ୍ରେଗନେନ୍ସି ଟେଷ୍ଟ: ଜଣେ ମହିଳା ଗର୍ଭବତୀ ଅଛନ୍ତି କି ନାଗିଁ ତାହା ଗର୍ଭଧାରଣ ପରୀକ୍ଷା ବା ପ୍ରେଗନେନ୍ସି ଟେଷ୍ଟରୁ ଜଣାପଡିଥାଏ । ଏହି ପରୀକ୍ଷା ପରିସ୍ରା କିମ୍ବା ରକ୍ତ ନମୁନା ଆଧାରରେ କରାଯାଇଥାଏ । ପରିସ୍ରା ପରୀକ୍ଷଣରେ hCG ହରମୋନର ପରିମାଣ ଯାଞ୍ଚ କରାଯାଏ। ଗର୍ଭାବସ୍ଥାରେ ଏହି ହରମୋନ ବୃଦ୍ଧି ପାଇଥାଏ । ରକ୍ତ ପରୀକ୍ଷଣରେ hCG ହରମୋନର ପରିମାଣ ମଧ୍ୟ ଦେଖାଯାଏ । ଗର୍ଭଧାରଣ କିଟ୍ ସହିତ ଘରେ ମଧ୍ୟ ପରୀକ୍ଷା କରାଯାଇପାରିବ । ପରବର୍ତ୍ତୀ ପରୀକ୍ଷା ଏବଂ ସ୍କାନ୍ କେବଳ ଡାକ୍ତର ଗର୍ଭଧାରଣ ନିଶ୍ଚିତ କରିବା ପରେ କରାଯାଇଥାଏ ।

ବ୍ଲଡ ଟେଷ୍ଟ: ପ୍ରେଗନେନ୍ସି ଟେଷ୍ଟରେ ବିଭିନ୍ନ ପ୍ରକାରର ରକ୍ତ ପରୀକ୍ଷା କରାଯାଇଥାଏ । ଏଥି ମଧ୍ୟରେ ବ୍ଲଡ କାଉଣ୍ଟ, ହେମୋଗ୍ଲୋବିନ୍, ବ୍ଲଡଗ୍ରୁପ, Rh ଫ୍ୟାକ୍ଟର୍ ଇତ୍ୟାଦି ଅନ୍ତର୍ଭୁକ୍ତ ଅଟେ । ରକ୍ତହୀନତା ଭଳି ସମସ୍ୟା ଚିହ୍ନଟ କରିବା ପାଇଁ ଏହି ପରୀକ୍ଷା କରାଯାଏ। ଏଚ୍.ଆଇ.ଭି ଏବଂ ହେପାଟାଇଟିସ୍ ବି ପାଇଁ ରକ୍ତ ପରୀକ୍ଷା ମଧ୍ୟ କରାଯାଏ । ବ୍ଲଡଗ୍ରୁପ ଯାଞ୍ଚ ଜରୁରୀ ଅଟେ । ଏହି ପରୀକ୍ଷା ଉଭୟ ମା ଏବଂ ପିଲାଙ୍କ ପାଇଁ କରାଯାଇଥାଏ । ରକ୍ତ ପରୀକ୍ଷା ମାଧ୍ୟମରେ ସମସ୍ୟା ଗୁଡିକ ଠିକ୍ ସମୟରେ ଚିକିତ୍ସା କରାଯାଇପାରିବ ।

ୟୁରିନ ଟେଷ୍ଟ: ଗର୍ଭାବସ୍ଥାରେ ପରିସ୍ରା ପରୀକ୍ଷା କରିବା ମଧ୍ୟ ଆବଶ୍ୟକ । ପରିସ୍ରା ପରୀକ୍ଷା ଦ୍ବାରା ମୂତ୍ର ସଂକ୍ରମଣ, କିଡନୀ କାର୍ଯ୍ୟ, ପ୍ରୋଟିନ୍ ସ୍ତର ସହିତ ଗର୍ଭାବସ୍ଥାରେ ମୂତ୍ରନଳୀ ସଂକ୍ରମଣ ଚିହ୍ନଟ କରିବା ଗୁରୁତ୍ୱପୂର୍ଣ୍ଣ । ପରିସ୍ରା ପରୀକ୍ଷା ମାଧ୍ୟମରେ ଶର୍କରା ସ୍ତର ମଧ୍ୟ ଯାଞ୍ଚ କରାଯାଏ ।

ଏହା ମଧ୍ୟ ପଢନ୍ତୁ: ଗର୍ଭବତୀ ମହିଳା ଏହି ଅଭ୍ୟାସ ରଖିଥିଲେ ସାବଧାନ, ଜନ୍ମ ହୋଇପାରେ ମୃତ ଶିଶୁ !

ଅଲଟ୍ରାସାଉଣ୍ଡ: ଗର୍ଭାବସ୍ଥାର ଆରମ୍ଭରେ 2ରୁ 3 ଥର ଅଲଟ୍ରାସାଉଣ୍ଡ କରାଯାଇଥାଏ । ଗର୍ଭଧାରଣର 4-6 ସପ୍ତାହ ପରେ ପ୍ରଥମ ଅଲଟ୍ରାସାଉଣ୍ଡ କରାଯାଏ । ଏହା ଗର୍ଭସ୍ଥ ଶିଶୁର ଉପସ୍ଥିତି ଏବଂ ହୃଦସ୍ପନ୍ଦନକୁ ନିଶ୍ଚିତ କରେ । ଦ୍ୱିତୀୟ ଅଲଟ୍ରାସାଉଣ୍ଡ ସାଧାରଣତଃ 12ରୁ 12-14 ସପ୍ତାହରେ କରାଯାଏ । ଏହା ଗର୍ଭସ୍ଥ ଶିଶୁର ବିକାଶ ଏବଂ ଗର୍ଭାଶୟର ଅବସ୍ଥା ଯାଞ୍ଚ କରେ । ତୃତୀୟ ଅଲଟ୍ରାସାଉଣ୍ଡ 18-22 ସପ୍ତାହରେ କରାଯାଏ ଯେଉଁଥିରେ ସମସ୍ତ ବିଷୟକୁ ନେଇ ଯାଞ୍ଚ କରାଯାଇଥାଏ । ଏହିପରି ଗର୍ଭଧାରଣର ପ୍ରଥମ 3 ମାସ ମଧ୍ୟରେ 2ରୁ 3 ଥର ଅଲଟ୍ରାସାଉଣ୍ଡ କରାଯାଇଥାଏ ।

ଟିଟାନସ ଟିକା: ଗର୍ଭାବସ୍ଥାରେ ଟିଟାନସ ଟିକା ଅତ୍ୟନ୍ତ ଜରୁରୀ ଅଟେ । ଏହି ଟିକା ମା’କୁ ଟିଟାନସରୁ ରକ୍ଷା କରିଥାଏ । ଯଦି ମାତା ପୂର୍ବରୁ ଟିଟାନସ୍ ପ୍ରତି ଟୀକାକରଣ କରିନାହାଁନ୍ତି, ତେବେ ସେ ନିଶ୍ଚିତ ଭାବରେ ଗର୍ଭାବସ୍ଥାରେ ଏହି ଟିକା ଦିଆଯିବା ଉଚିତ ବୋଲି କୁହାଯାଇଛି। ଏହି ଟିକା ଦେବା ଦ୍ବାରା ଉଭୟ ମାଆ ଏବଂ ଶିଶୁକୁ ଟିଟାନସରୁ ରକ୍ଷା କରିଥାଏ ।

ବ୍ୟୁରୋ ରିପୋର୍ଟ, ଇଟିଭି ଭାରତ