ରାଉରକେଲା: ରଜରେ ଚାଲିଥିଲା ବେଆଇନ କୁକୁଡ଼ା ଲଢେଇ । ମାଡି ବସିଲା ପୋଲିସ । ରଜ ମଉଜରେ କୁକୁଡ଼ା ଲଢେଇ ମହଙ୍ଗା ପଡିଲା । ବେଆଇନ କୁକୁଡ଼ା ଲଢେ଼ଇ ଜୁଆ ଆଡ୍ଡା ସ୍ଥାନରେ ପୋଲିସର ଅତର୍କିତ ଚଢ଼ାଉ । ୫୨ ଜଣଙ୍କ ସହ ୩୩ ହଜାର ଟଙ୍କା, ୫୫ ବାଇକ ଓ ଗୋଟିଏ କାର ଜବତ । ରଜ ଉପଲକ୍ଷେ ରାଜଗାଙ୍ଗପୁର ଥାନା ଅନ୍ତର୍ଗତ ଅଲଣ୍ଡା ପଞ୍ଚାୟତର ଡୁଡୁକାବାହାଲ ଗ୍ରାମର ଭୁତୁଲୁପଡା ଠାରେ ବେଆଇନ କୁକୁଡ଼ା ଖେଳ ସହ ଜୁଆ ଚାଲୁଥିଲା ।
ଏକ ବିଶେଷ ସୂତ୍ରରୁ ଖବର ପାଇଥିଲା ରାଜଗାଙ୍ଗପୁର ପୋଲିସ । ଖବର ମିଳିବା ପରେ ରାଜଗାଙ୍ଗପୁର ଏସଡ଼ିପିଓ ଅଭିଷେକ ପାଣିଗ୍ରାହୀଙ୍କ ନେତୃତ୍ୱରେ ଥାନା ଆଇଆଇସି, ସବ ଇନ୍ସପେକ୍ଟର, ଏଏସଆଇମାନଙ୍କ ଏକ ଟିମ ଗଠନ କରାଯାଇଥିଲା । କୁକୁଡ଼ା ଲଢେଇ ଚାଲୁଥିବା ସ୍ଥାନରେ ଅତର୍କିତ ଚଢ଼ାଉ କରିଥିଲା ରାଜଗାଙ୍ଗପୁର ପୋଲିସ । ପୋଲିସ ଚଢ଼ାଉ ହୋଇଥିବା ଜାଣିପାରି ଲୋକେ ଛତ୍ରଭଙ୍ଗ ଦେଇଥିଲେ । ତେବେ ଘଟଣାସ୍ଥଳରୁ ୫୨ ଜଣଙ୍କୁ କାବୁ କରିବା ସହ ତାଙ୍କ ଠାରୁ ୩୩ ହଜାର ୫୧୦ ଟଙ୍କା ଜବତ କରିଛି । ଏହା ବ୍ୟତୀତ ୫୫ଟି ଦୁଇ ଚକିଆ ଗାଡି, ଗୋଟିଏ କାର, ମୋବାଇଲ ୪୮ ଏବଂ ୩ଟି ଲଢେଇ କୁକୁଡ଼ା ଜବତ କରିଥିବା ଏସଡ଼ିପିଓ ଅଭିଷେକ ପାଣିଗ୍ରାହୀ ସୂଚନା ପ୍ରଦାନ କରିଛନ୍ତି । ଲୋକମାନେ ରଜ ପର୍ବକୁ ଧୁମଧାମରେ ପାଳନ କରୁଥିବା ବେଳେ କିଛି ଅସାଧୁ ବ୍ୟକ୍ତିମାନେ ଏହି ପର୍ବର ଫାଇଦା ଉଠାଇ ଜୁଆ ଖେଳ ଖେଳୁଛନ୍ତି ।
ତେବେ ସୁନ୍ଦରଗଡ଼ର ବିଭିନ୍ନ ସ୍ଥାନରେ ରଜ ପର୍ବ ବେଶ ଧୁମଧାମରେ ପାଳନ ହେଉଛି । ସାଂସ୍କୃତିକ ଐତିହ୍ୟ ପାଇଁ ପରିଚିତ ରାଉରକେଲାରେ ରଜ ଉତ୍ସବର ଆନନ୍ଦର ଲହରୀ ଖେଳି ଯାଇଛି । ସୁନ୍ଦରଗଡ଼ର ବିଭିନ୍ନ ସ୍ଥାନରେରେ ସାଂସ୍କୃତିକ ପରିଷଦ ମହିଳା ସମିତି ପକ୍ଷରୁ ସୁନ୍ଦର ଭାବରେ ରଜ ପାଳନ କରାଯାଇଛି । ଗତକାଲି ରଜର ଶେଷ ଦିନ ଥିବା ବେଳେ ପିଠା, ମିଠା, ପାନ ଆଦି ସମସ୍ତ ପ୍ରକାର ବ୍ୟଞ୍ଜନକୁ ନେଇ ଧୁମଧାମରେ ପାଳନ କରାଯାଇଛି ରଜ ପର୍ବ । ଏହି ପର୍ବ ମାଟି ମା'ଙ୍କୁ ସମର୍ପିତ, ଯିଏକି ନିଜର ପ୍ରାଚୁର୍ଯ୍ୟ ଏବଂ ଉର୍ବରତା ପାଇଁ ପୂଜା ପାଆନ୍ତି । ତାଙ୍କରି ପାଇଁ ଏହି ତିନି ଦିନ ରଜ ପର୍ବ ପାଳନ କରାଯାଇଥାଏ । ରଙ୍ଗବେରଙ୍ଗର ସାଜସଜ୍ଜାରେ ସଜେଇ ହୋଇ ସୁସ୍ୱାଦୁ ପାରମ୍ପରିକ ଖାଦ୍ୟର ମହକରେ ଭରି ଯାଇଛି ସମ୍ପୂର୍ଣ୍ଣ ରାଉରକେଲା ସହର ।
ଇଟିଭି ଭାରତ, ରାଉରକେଲା
