ସୁବର୍ଣ୍ଣପୁର: ଧରାପୃଷ୍ଠରୁ ମା'ଙ୍କ ବିଦାୟ ପରେ ଧିରେ ଧିରେ ପୃଥିବୀ ପୃଷ୍ଠରେ ଅନୁଭୂତ ହେଉଛି ଶୀତ । ଆଉ ଏହି କାକର ଭିଜା ପାର୍କରେ ପାହାନ୍ତିଆରୁ ଜମୁଛି ଲୋକଙ୍କ ଭିଡ। ଶାରିରୀକ ବ୍ୟାୟାମ ତଥା ପ୍ରାତଃ ଭ୍ରମଣ ଓ ସନ୍ଧ୍ୟା ସମୟରେ ବ୍ୟାୟାମ ପାଇଁ ଲୋକେ ବେଶ ଆଗ୍ରହ ଦେଖାଉଥିବା ଜଣାପଡିଛି । ତେବେ ପାର୍କ ଭିତରେ ମନୋରଞ୍ଜନ କରିବା ସହ ନିଜ ଶରୀରକୁ ସୁସ୍ଥତା ପାଇଁ ଲୋକେ ବ୍ୟାୟାମ କରୁଛନ୍ତି । ତେବେ ସୁବର୍ଣ୍ଣପୁର ସହରରେ ତିଆରି ହୋଇଥିବା ନୂତନ ଫରେଷ୍ଟ ପାର୍କରେ ମନୋରମ ସନ୍ଧ୍ୟାରେ ବି ଲୋକଙ୍କ ଭିଡ ଦେଖିବାକୁ ମିଳୁଛି ।
ସେପଟେ ଛୋଟ ଛୋଟ ପିଲାମାନଙ୍କ ଠାରୁ ଆରମ୍ଭ କରି କୁସ୍ତି କସରତରେ ଆଗ୍ରହ ରଖିଥିବା ଖେଳାଳୀଙ୍କ ପାଇଁ ଆବଶ୍ୟକୀୟ ବ୍ୟବସ୍ଥା କରାଯାଇଛି । ତେବେ ଏହି ପାର୍କରେ ଆମୋଦ ପ୍ରମୋଦ ସହିତ ଶାରୀରିକ ବ୍ୟାୟାମ ପାଇଁ ପାର୍କ ଭିତରେ ବ୍ୟାପକ ବ୍ୟବସ୍ଥା କରାଯାଇଛି । ସୁବର୍ଣ୍ଣପୁର ସହର ପୌର ପରିଷଦ ଅଧିନରେ ଥିବା ଏହି ପାର୍କ ୫ ଏକରରୁ ଊର୍ଦ୍ଧ୍ବ ପରିମିତ ଯାଗାରେ ତିଆରି ହୋଇଛି । ସେପଟେ ବିଶ୍ରାମ ପାଇଁ ସିମେଣ୍ଟ ଚୌକି ଠାରୁ ଆରମ୍ଭ କରି ପିଇବା ପାଣି, ସାଇକେଲ ଷ୍ଟାଣ୍ଡ, ଛୋଟ ଛୋଟ ପିଲାଙ୍କ ଖେଳକୁଦ ପାଇଁ ଅନେକ ଖେଳ ସରଞ୍ଜାମର ବ୍ୟବସ୍ଥା କରାଯାଇଛି । ତେବେ ପାର୍କ ବାହାରେ ଛୋଟ ଛୋଟ ବ୍ୟବସାୟୀମାନେ ଚା ଜଳଖିଆ ମଧ୍ୟ ବିକ୍ରିବଟା ହେଉଛି ।
ସହରର ଏହି ପାର୍କ ଭିତରକୁ ପ୍ରବେଶ ପାଇଁ ଟିକେଟର ବ୍ୟବସ୍ଥା କରାଯାଇଛି । ଜଣପିଛା ୧୦ଟଙ୍କା ଟିକଟ ଦେୟ ଆଦାୟ କରାଯାଉଛି । ଯେଉଁ ଅର୍ଥରେ ପାର୍କ ପରିଚାଳନା କରିବା ସହିତ ପାର୍କରେ ନିୟୋଜିତ କରାଯାଇଥିବା କର୍ମଚାରୀଙ୍କ ଦରମା ଦେବା ପାଇଁ ପୌର ପରିଷଦ ନିଷ୍ପତ୍ତି ନେଇଛି । ହେଲେ ସହରବାସୀଙ୍କୁ ପାର୍କ ମଧ୍ୟକୁ ପ୍ରବେଶ ପାଇଁ ପ୍ରବେଶ ଶୁଳ୍କ ଛାଡ କରିବାକୁ ଦାବି କରିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
