ସମ୍ବଲପୁର: ଗଙ୍ଗାଧର ମେହେର ବିଶ୍ୱ ବିଦ୍ୟାଳୟର ତୃତୀୟ ସମାଵର୍ତ୍ତନ ଉତ୍ସବ ଅନୁଷ୍ଠିତ ହୋଇଯାଇଛି । ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କ ଅଧ୍ୟକ୍ଷତାରେ ଏହି ସମବର୍ତ୍ତନ ଉତ୍ସବ ଅନୁଷ୍ଠିତ ହୋଇଥିବା ବେଳେ ଏଥିରେ କୁଳପତି ପ୍ରଫେସର ଏନ ନାଗାରାଜୁ ଓ ଯାଦବପୁର ବିଶ୍ଵବିଦ୍ୟାଳୟର କୂଳପତି ତଥା ଏଆଇୟୁ ସଭାପତି ପ୍ରଫେସର ସୁରଞ୍ଜନ ଦାସ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ l କୋଭିଡ ପାଇଁ ବନ୍ଦ ରହିଥିବା ବେଳେ ଦୀର୍ଘ ଦୁଇବର୍ଷ ପରେ ଏହି ଉତ୍ସବ ହୋଇଛି ।
ଏହି ଅବସରରେ ରାଜ୍ୟପାଳ ସମସ୍ତ ମେଡାଲିଷ୍ଟମାନଙ୍କୁ ମାନପତ୍ର ପ୍ରଦାନ କରିଥିଲେ । ରାଷ୍ଟ୍ରୀୟ ନୀତି ନିର୍ଦ୍ଧାରଣରେ ପ୍ରମୁଖ ଭୂମିକା ନିଭାଉଥିବା ପ୍ରଧାନମନ୍ତ୍ରୀଙ୍କ ବ୍ୟକ୍ତିଗତ ପ୍ରମୁଖ ସଚିବ ତଥା ଜିଏମ ବିଶ୍ୱ ବିଦ୍ୟାଳୟର ପୂର୍ବତନ ଛାତ୍ର ଡ.ପ୍ରମୋଦ ମିଶ୍ରଙ୍କୁ ସମ୍ମାନ ସୂଚକ ଗଙ୍ଗାଧର ମେହେର ଡିଲିଟ ଉପାଧି ପ୍ରଦାନ କରାଯାଇଛି । ଭର୍ଚୁଆଲ ମୋଡ଼ରେ ପ୍ରମୋଦ ମିଶ୍ର ଏହି ଉପାଧି ଗ୍ରହଣ କରିଥିଲେ ।
କୋଭିଡ ଯୋଗୁଁ ଗତ ଦୁଇ ବର୍ଷ ଧରି ଗଙ୍ଗାଧର ମେହେର ବିଶ୍ୱବିଦ୍ୟାଳୟରେ ସମବର୍ତ୍ତନ ଉତ୍ସବ ଅନୁଷ୍ଠିତ ହୋଇପାରିନଥିବା ବେଳେ ଏଥର 2020-21 ଓ 21-22 ଶିକ୍ଷା ବର୍ଷ ପାଇଁ ମେଡାଲ ଓ ସାର୍ଟିଫିକେଟ ପ୍ରଦାନ କରାଯାଇଥିଲା । ରାଜ୍ୟପାଳ ତଥା କୁଳାଧିପତି ଗଣେଶୀ ଲାଲ ସମସ୍ତ କୃତି ଛାତ୍ରଛାତ୍ରୀଙ୍କୁ ଏହି ଅବସରରେ ସମ୍ବର୍ଦ୍ଧିତ କରିବା ସହ ଶୁଭେଚ୍ଛା ଜଣାଇଥିଲେ । ନିଷ୍ଠାର ସହ ପରିଶ୍ରମ କଲେ ସଠିକ ଫଳ ମିଳେ ବୋଲି କହିଛନ୍ତି ରାଜ୍ୟପାଳ ।
ତୃତୀୟ ସମବର୍ତ୍ତନ ଉତ୍ସବରେ 29ଟି ମେମୋରିଆଲ ମେଡାଲ ସମେତ 214 ଟି ମେଡାଲ ପ୍ରଦାନ କରାଯାଇଛି l ଏହି ଅବସରରେ 37 ଜଣଙ୍କୁ Phd ଡିଗ୍ରୀ ପ୍ରଦାନ କରାଯାଇଥିବା ବେଳେ ଏମାନଙ୍କ ମଧ୍ୟରେ 19 ଜଣ ଛାତ୍ରୀ ଓ 18 ଜଣ ଛାତ୍ର ଅଛନ୍ତି l ଚଳିତ ଥର ମଧ୍ୟ ପଦକ ଓ ପାଇଥିବା ଛାତ୍ରଛାତ୍ରୀମାନେ ବହୁ ପ୍ରଚଳିତ ଗାଉନ ଓ ଟୋପି ପରିବର୍ତ୍ତେ ସମ୍ବଲପୁରୀ ଉତ୍ତରୀୟ ଧରିଥିଲେ l
