ସମ୍ବଲପୁର: ନବନିର୍ମିତ ଫ୍ଲାଏଓଭର ବ୍ରିଜ ଉପରୁ ତଳକୁ ଖସି ପଡ଼ିଲେ ସ୍କୁଲ ଛାତ୍ର । ସମ୍ବଲପୁର ସହର ଭିତରେ ନବନିର୍ମିତ ଫ୍ଲାଏଓଭର ବ୍ରିଜ ଉପରୁ ତଳେ ଥିବା ଲକ୍ଷ୍ମୀ ଟକିଜ ଛକରେ ଜଣେ ସ୍କୁଲ ଛାତ୍ର ଖସି ପଡିଥିବା ଜଣାପଡ଼ିଛି । ଛାତ୍ର ଜଣକ ୫୦ ଫୁଟ ତଳକୁ ଖସିପଡି ଭାବେ ଗୁରୁତର ଭାବେ ଆହତ ହୋଇଛନ୍ତି । ଉପସ୍ଥିତ ଲୋକେ ତାଙ୍କୁ ତୁରନ୍ତ ଉଦ୍ଧାର କରି ସ୍ଥାନୀୟ ଜିଲ୍ଲା ମେଡିକାଲରେ ଭର୍ତ୍ତି କରିଥିଲେ । ଅବସ୍ଥା ସଙ୍କଟାପନ୍ନ ହେବାରୁ ପରେ ତାଙ୍କୁ ବୁର୍ଲା ଭୀମସାର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି ।
ଛାତ୍ର ଜଣକ ଫ୍ଲାଏଓଭର ଉପରୁ ତଳକୁ ଦେଖୁଥିବା ବେଳେ ତଳକୁ ଖସି ପଡିଥିଲେ ବୋଲି କିଛି ଲୋକ କହୁଛନ୍ତି । ତେବେ ଏହା ସ୍ପଷ୍ଟ ହୋଇପାରିନି । ୫୦ ଫୁଟ ଉପରୁ ପଡିଥିବାରୁ ତାଙ୍କ ମୁହଁ ଓ ଛାତିରେ ଗୁରୁତର ଆଘାତ ଲାଗିଛି । ଛାତ୍ର ଜଣକ ପଡ଼ିଯିବାର ଦେଖି କିଛି ସ୍ଥାନୀୟ ଲୋକେ ସଙ୍ଗେସଙ୍ଗେ ତାଙ୍କୁ ଉଦ୍ଧାର କରି ପ୍ରଥମେ ସମ୍ବଲପୁର ଜିଲ୍ଲା ସରକାରୀ ମୁଖ୍ୟ ଚିକିତ୍ସାଳୟକୁ ନେଇଥିଲେ । ସେଠାରେ ପ୍ରଥମେ ତାଙ୍କର ପ୍ରାଥମିକ ଚିକିତ୍ସା କରାଯାଇଥିଲା । ତେବେ ତାଙ୍କର ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ବୁର୍ଲା ଭୀମସାର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି ।
ଆହତ ଛାତ୍ର ଜଣକ ସମ୍ବଲପୁର ସାକ୍ଷୀପଡ଼ାସ୍ଥିତ ଏକ ଘରୋଇ ସ୍କୁଲର ଦଶମ ଶ୍ରେଣୀର ଛାତ୍ର ବୋଲି ଜଣାପଡ଼ିଛି । ସେ ସର୍ଲାକାନୀର ବିନୋଦ କୁଜୁରଙ୍କ ପୁଅ କ୍ଲିଫୋର୍ଡ କୁଜୁର ବୋଲି ପ୍ରାଥମିକ ସୂଚନା ମିଳିଛି । ତେବେ ତାଙ୍କର ସାଇକେଲ ଓଭରବ୍ରିଜ ଉପରେ ପଡ଼ିଥିବାବେଳେ ସେ କିଭଳି ବ୍ରିଜ ଉପରୁ ୫୦ ଫୁଟ ତଳକୁ ପଡିଲେ, ସେନେଇ ଅନେକ ପ୍ରଶ୍ନ ଉଠିଛି । ସେ ସାଇକେଲ ରଖି ତଳକୁ ଦେଖୁଥିବାବେଳେ ଦୁର୍ଘଟଣାବଶତଃ ପଡିଛନ୍ତି, ନା ତାଙ୍କୁ କେହି ଧକ୍କା ଦେଇ ପକେଇ ଦେଇଛି ସେନେଇ ପୋଲିସ ପଚରାଉଚରା କରିବା ସହ ତଦନ୍ତ ଆରମ୍ଭ କରିଛି । ସମ୍ବଲପୁରର ଏହି ନୂତନ ଫ୍ଲାଏଓଭର ନିର୍ମାଣ ପରେ ଏଭଳି ଘଟଣା ପ୍ରଥମ ଥର ପାଇଁ ଘଟିଛି । ଏଥିପାଇଁ ବ୍ରିଜ ଉପରେ ପୋଲିସ ପାଟ୍ରୋଲିଂ ବଢେଇବାକୁ ସ୍ଥାନୀୟ ଲୋକେ ଦାବି କରିଛନ୍ତି । ତେବେ ତଦନ୍ତ ପରେ ଘଟଣାର ସତ୍ୟାସତ୍ୟ ଜଣାପଡିବ ।
ଇଟିଭି ଭାରତ, ସମ୍ବଲପୁର
