ନୟାଗଡ଼: ବନ୍ୟା ଯୋଗୁଁ ଜିଲ୍ଲାର ଗଣିଆ ଖଣ୍ଡପଡା ଏବଂ ଭାପୁର ବ୍ଳକର ୧୬ଟି ପଞ୍ଚାୟତର ୮୦ ଗାଁରେ ଯୋଗଯୋଗ ବିଚ୍ଛିନ୍ନ ହୋଇଛି । ୩୦ ହଜାର ଲୋକ ପ୍ରଭାବିତ ହୋଇଛନ୍ତି । ସେପଟେ ୭୭୦୦ ଲୋକଙ୍କୁ ରନ୍ଧାଖାଦ୍ୟ ଯୋଗାଇ ଦିଆଯାଉଥିବାବେଳେ, ୩୨୦୦ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି ।
ଗଣିଆରୁ ବଡ଼ମୂଳ ରାସ୍ତାର ବିଭିନ୍ନ ସ୍ଥାନରେ ୪ଫୁଟ ବନ୍ୟା ଜଳ ପ୍ରବାହିତ, ଛାମୁଣିଆ ଏବଂ ବଡ଼ସିଲିଙ୍ଗା ରାସଙ୍ଗ ପଞ୍ଚାୟତ ଜଳ ବନ୍ଦୀ ହୋଇଛି । ଭାପୁର ବ୍ଲକର ଫତେଗଡ଼ ପଞ୍ଚାୟତର ମଣିପୁର ଗାଁ ମଧ୍ୟ ଜଳବନ୍ଦୀ ରହିଛି । କରବର ପଞ୍ଚାୟତର ଗୁଡୁପଡ଼ା, ମାନିତ୍ରୀ ଏବଂ କରବର ନୂଆ ସାହିରେ ଲହଡ଼ି ମାରୁଛି ବନ୍ୟା ପାଣି । କାଳୀଗିରୀ ବ୍ରିଜରୁ ପାଣି କମିଥିବା ବେଳେ ଭାପୁର-କଳାପଥର ଯୋଗାଯୋଗ ସ୍ବାଭାବିକ ହୋଇଛି ।
ମୋଟ ୩୬ ଜଣଙ୍କୁ ଉଦ୍ଧାର କରାଯାଇଥିବାବେଳେ, ୧୮୬ କୁଇଣ୍ଟାଲ ଗୋ ଖାଦ୍ୟ ଯୋଗାଇ ଦିଆଯାଇଛି । ୭୩୧ ଜଣଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇ ଔଷଧ ପ୍ରଦାନ କରାଯାଇଛି । ୮ ଜଣ ପ୍ରସୂତିଙ୍କୁ ଉଦ୍ଧାର କରାଯାଇ ପ୍ରସବ କରାଯାଇଛି । ସେହିପରି ୩ଟି ଯାକ ବ୍ଲକ ଗଣିଆର ୧୧ସ୍କୁଲ, ଖଣ୍ଡପଡ଼ାର ୯ଟି ସ୍କୁଲ, ଭାପୁରର ୧୨ଟି ସ୍କୁଲ ମୋଟ ୩୨ଟି ସ୍କୁଲ ଛୁଟି ରହିଛି ।
ଇଟିଭି ଭାରତ, ନୟାଗଡ଼
