ନବରଙ୍ଗପୁର: ରାଜ୍ୟ ସରକାରଙ୍କ ଅଧିକାରୀ ବନିଲେ ରାଜମିସ୍ତ୍ରୀ । ଏ ଭଳି ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଝରିଗାଁ ବ୍ଲକରେ । ପ୍ରଧାନମନ୍ତ୍ରୀ ଆବାସ ଯୋଜନା କାମ ତଦାରଖ କରିବାକୁ ଯାଇଥିବା ସ୍ଥାନୀୟ ବିଡିଓ ନିଜେ ଯନ୍ତ୍ରପାତି ଧରି ରାଜମିସ୍ତ୍ରୀ କାମ କରିଛନ୍ତି ।
ସୂଚନା ଅନୁଯାୟୀ ଝରିଗାଁ ବ୍ଲକରେ ଆବାସ ଯୋଜନା ମନ୍ଥର ଗତିରେ ଚାଲିଥିବା ବେଳେ ଏହାର ତଦାରଖ ପାଇଁ ଝରିଗାଁ ବିଡ଼ିଓ ପ୍ରଶାନ୍ତ କୁମାର ରାଉତ ଝରିଗାଁ ବ୍ଲକର ପାଲିଆପଞ୍ଚାୟତ ଗସ୍ତ କରିଥିଲେ । ସେ ପାଲିଆ ପଞ୍ଚାୟତର ସଦର ମହାକୁମାର ହୀରାବତୀ ଗୌଡଙ୍କ ପ୍ରଧାନମନ୍ତ୍ରୀ ଆବାସ ଯୋଜନା ଗୃହ ଦେଖିବାକୁ ଯାଇଥିଲେ । ସେଠାରେ ଗୃହ କାମ ଚାଲିଥିବା ବେଳେ ବିଡିଓ କୌଣସି ସଂକୋଚ ନ କରି ହିତାଧିକାରୀଙ୍କୁ ଉତ୍ସାହିତ କରିବା ପାଇଁ ନିଜେ କାର୍ଯ୍ୟ କରିଥିଲେ । ନିର୍ମାଣ କାମ ଠିକ ସମୟରେ ସାରିବା ପାଇଁ ନିଜେ କରଣୀ ଧରି ମିସ୍ତ୍ରୀ କାମ କରିଥିଲେ । ସେ ଆବାସ ନିର୍ମାଣରେ ନିୟୋଜିତ ଥିବା ମିସ୍ତ୍ରୀଙ୍କୁ ଠିକ ଭାବେ କାର୍ଯ୍ୟ କରିବାକୁ ନିର୍ଦ୍ଦେଶ ଦେବା ସହ କାମ ନିର୍ଦ୍ଦିଷ୍ଟ ସମୟରେ ଶେଷ କରିବାକୁ ମଧ୍ୟ ତାଗିଦ କରିଥିଲେ । ସେପଟେ ବିଡିଓଙ୍କ ଏଭଳି କାମକୁ ସାଧାରଣରେ ପ୍ରଶଂସା କରିବା ସହ ଆବାସ ଯୋଜନା ଝରିଗାଁ ବ୍ଲକରେ ଆଗେଇବାରେ ସହାୟକ ହେବ ବୋଲି ଆଲୋଚନା ଜୋର ଧରିଛି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
