ଭୁବନେଶ୍ୱର: ଭୁବନେଶ୍ବର ରେଳ ଷ୍ଟେସନର ଧାନବାଦ ଟ୍ରେନ୍ ଟଏଲେଟରୁ ମହିଳାଙ୍କ ମୃତଦେହ ମିଳିବା ଘଟଣା । 6 ମାସ ପରେ ଅଭିଯୁକ୍ତ ସ୍ବାମୀକୁ ଗିରଫ କରିବାରେ ସଫଳ ହେଲା ଜିଆରପି ପୋଲିସ । ଷ୍ଟେସନରେ ପ୍ରଥମେ ମହିଳାଙ୍କ ତଣ୍ଟି ଚିପିବା ଓ ପରେ ଗଳାକୁ ଛୁରରେ କାଟି ହତ୍ୟା କରିଥିଲା ସ୍ବାମୀ ସୁଧାଂଶୁ ବୋଲି ସୂଚନା ଦେଇଛି ଜିଆରପି । ଘଟଣାର ୬ ମାସ ପରେ ଅଭିଯୁକ୍ତକୁ ଗିରଫ କରି କୋର୍ଟ ଚାଲଣ କରାଯାଇଛି । ତେବେ ରିମାଣ୍ଡରେ ଆଣି ଅଧିକ ପଚରାଉଚରା କରାଯିବ ବୋଲି ତଦନ୍ତକାରୀ ଟିମ୍ ସୂଚନା ଦେଇଛନ୍ତି । ହତ୍ୟାରେ ବ୍ୟବହୃତ ଛୁରି, ମୃତ ମହିଳାଙ୍କ ମୋବାଇଲ ଫୋନ୍ ଓ ସାମଗ୍ରୀକୁ ସୁଧାଂଶୁ କେଉଁଠି ଲୁଚାଇଛି ତାହା ଜାଣିବା ଲାଗି ରିମାଣ୍ଡରେ ଆଣିବ ତଦନ୍ତକାରୀ ଟିମ୍ । ଗୁରୁବାର ଏନେଇ ରିମାଣ୍ଡ ଆବେଦନ କରାଯାଇଛି ।
ଜିଆରିପି ପୋଲିସ ସୂଚନା ଅନୁଯାୟୀ, ମୃତ ମହିଳା ଜଣକ ହେଲେ ରାଞ୍ଚିର ସୁମନ କୁମାରି । ତେବେ ସୁମନଙ୍କ ସହ ସୁଧାଂଶୁଙ୍କ ପ୍ରେମ ଇନଷ୍ଟାଗ୍ରାମରୁ ଆରମ୍ଭ ହେଇଥିଲା ପରେ ବିବାହ କରିଥିଲେ ଦୁହେଁ । ସୁମନଙ୍କ ସହ ସୁଧାଂଶୁଙ୍କ ୨୦୨୨ ଅକ୍ଟୋବରରେ ବିବାହ କରିଥିଲେ । କିନ୍ତୁ ସୁଧାଂଶୁ ପୂର୍ବରୁ ବିବାହ କରିଥିବାରୁ ସୁମନଙ୍କୁ ଦ୍ୱିତୀୟ ବିବାହ ପାଇଁ ରାଜି ନଥିଲେ ସୁଧାଂଶୁ । ସୁମନ ପରିବାର ଯିଦି ପାଇଁ ସୁଧାଂଶୁ ରାଞ୍ଚିର ଏକ ମନ୍ଦିରରେ ବିବାହ କରିଥିଲେ । ତା ପରଠୁ ଦୁଇ ଜଣଙ୍କ ଭିତରେ ଝଗଡ଼ା ଲାଗି ରହୁଥିଲା ।
ସୁଧାଂଶୁ ଘର ଗଞ୍ଜାମ ଆସ୍କାରେ ହେଇଥିବାରୁ ପ୍ରଥମେ ପରିବାର ସହ ଭେଟିବା ପାଇଁ କହିଥିଲେ । ପରେ ସୁରଟ ଯିବା ପାଇଁ ଯୋଜନା କରିଥିଲେ ସୁଧାଂଶୁ ଓ ସୁମନ । କିନ୍ତୁ ପୂର୍ବରୁ ସୁମନକୁ ରାସ୍ତାରୁ ହଟାଇବା ପାଇଁ ଯୋଜନା କରିଥିଲା ହତ୍ୟାକାରୀ ସ୍ଵାମୀ । ଭୁବନେଶ୍ୱରରେ ଟ୍ରେନ୍ ପହଁଞ୍ଚିବା ପରେ ଟଏଲେଟରେ ହତ୍ୟା କରାଯାଇଥିଲା । ହତ୍ୟା ପରେ ପ୍ରମାଣ ନଷ୍ଟ କରି ଅଭିଯୁକ୍ତ ସୁରଟ ପଳେଇ ଯାଇଥିଲା । ପୋଲିସର ବହୁ ଛାନଭିନ ପରେ ଘଟଣାର ୬ ମାସ ପରେ ଅଭିଯୁକ୍ତ ସ୍ୱାମୀକୁ ଗିରଫ କରିଛି ଜିଆରପି ପୋଲିସ ।
ଇଟିଭି ଭାରତ, ଭୁବନେଶ୍ୱର
