କେନ୍ଦୁଝର: ରାଜ୍ୟର ମୁଖ୍ୟ ମନ୍ଦିର ଦର୍ଶନ ନେଇ ଏସଓପି ଜାରି ହେବା ପରେ ଆଜି କେନ୍ଦୁଝର ଜିଲ୍ଲା ପ୍ରଶାସନ ମା ତାରିଣୀଙ୍କ ଦର୍ଶନ ନେଇ ନୂତନ ଏସଓପି ଜାରି କରିଛନ୍ତି । ଏଣିକି ପରବର୍ତ୍ତୀ ଆଦେଶ ପର୍ଯ୍ୟନ୍ତ ପ୍ରତି ମଙ୍ଗଳବାର, ଶନିବାର ଓ ରବିବାର ତାରିଣୀ ମନ୍ଦିରରେ ଭକ୍ତଙ୍କ ଦର୍ଶନ ବନ୍ଦ ରହିବ। ଓଡିଶା ବାହାର ଭକ୍ତ ଦର୍ଶନ ପାଇଁ ଆସିଲେ ସାଥିରେ ଗତ ୭୨ ଘଣ୍ଟା ଅବଧିର ଆରଟିପିସିଆର କୋଭିଡ ନେଗେଟିଭ ରିପୋର୍ଟ ଅଥବା ଦ୍ଵିତୀୟ ଡୋଜ ଟିକାଦାନର ପ୍ରମାଣପତ୍ର ନେଇଆସିବା ବାଧ୍ୟତାମୂଳକ କରାଯାଇଛି ।
ସେହିପରି ମାଙ୍କ ଦର୍ଶନ ପାଇଁ ଆସୁଥିବା ସମସ୍ତ ଭକ୍ତଙ୍କ ପାଇଁ ନିଜ ପ୍ରମାଣପତ୍ର (ଆଧାର ବା ଭୋଟର ଆଇଡ଼ି) ନେଇଆସିବା ଜରୁରୀ ବୋଲି ଏସଓପିରେ ଦର୍ଶାଇଛନ୍ତି। ଏହି ଦର୍ଶନ ସମୟରେ ପୂର୍ବ ନିର୍ଦ୍ଦେଶାବଳୀ ଅନୁଯାୟୀ ଭୋଗ ଓ ଦୀପ ଲଗାଇବା ମଧ୍ୟ ବନ୍ଦ କରାଯାଇଛି । ସେହିପରି ଦର୍ଶନ ମଧ୍ୟ ଧାଡି ଅନୁଯାୟୀ ହେବ ବୋଲି କୁହାଯାଇଛି । ଏନେଇ ମନ୍ଦିର ଟ୍ରଷ୍ଟ ବୋର୍ଡ ମଧ୍ୟ ସମସ୍ତ ପ୍ରକାର ଜରୁରୀ ବ୍ୟବସ୍ଥା ଗ୍ରହଣ କରିଥିବା ଜଣାପଡ଼ିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର , ଇଟିଭି ଭାରତ
