କେନ୍ଦୁଝର : ଘସିପୁରା ବିଧାୟକଙ୍କ ପୁଅ ଦେବାଶିଷ ପାତ୍ରଙ୍କ ଅଡୁଆ ବଢିବାରେ ଲାଗିଛି । ଏଥର ଦେବାଶିଷଙ୍କ ବିରୋଧରେ ସିଧା ସଳଖ ଆସିଛି ଅଭିଯୋଗ । ବିବାହର ପ୍ରଲୋଭନ ଦେଖାଇ ଜଣେ ଯୁବତୀଙ୍କୁ ଧର୍ଷଣ ହୋଇଥିବା ନେଇ ରାମଚନ୍ଦ୍ରପୁର ଥାନାରେ ଅଭିଯୋଗ ହୋଇଥିଲା । ତେବେ ଅଭିଯୋଗ ଆଣିଥିବା ଯୁବତୀଙ୍କୁ ବିଧାୟକ ବଦ୍ରିପାତ୍ରଙ୍କ ପୁଅ ଦେବାଶିଷ ପାତ୍ର ଖୋଲାଖୋଲି ଏତଲା ପ୍ରତ୍ୟାହାର ଧମକ ଦେଇଥିବାର ଏକ ଅଡିଓ ସୋସିଆଲ ମିଡ଼ିଆରେ ଭାଇରାଲ ହେଉଛି । ଯେଉଁଥିରେ ଦେବାଶିଷ ଯୁବତୀଙ୍କ ପରିବାର ଉପରେ ଏତଲା ପ୍ରତ୍ୟାହାର କରିବାକୁ ଚାପ ପକାଇଥିବା ନେଇ ପୀଡିତା ଓ ତାଙ୍କ ଭାଇ କହିଛନ୍ତି ।
ସେପଟେ ଅଡିଓ ଭାଇରାଲ ହେବା ପରେ ଗତକାଲି କିଛି ଦୁର୍ବୃତ୍ତ ରାତି ଅଧରେ ପୀଡ଼ିତାଙ୍କ ଘର ଉପରେ ଆକ୍ରମଣ ମଧ୍ୟ କରିଛନ୍ତି । ଦେବାଶିଷଙ୍କ ନିର୍ଦ୍ଦେଶରେ ତାଙ୍କ ସମର୍ଥକ ଏଭଳି କାଣ୍ଡ ଭିଆଇଛନ୍ତି ବୋଲି ଆଜି ପୀଡ଼ିତାଙ୍କ ପରିବାର ପକ୍ଷରୁ ଥାନାରେ ଏତଲା ଦିଆଯାଇଛି । ଆଜି ପୀଡିତା ଓ ତାଙ୍କ ପରିବାର ଲୋକେ ଜିଲ୍ଲା ଆରକ୍ଷୀ ଅଧୀକ୍ଷକଙ୍କୁ ଭେଟି ସୁରକ୍ଷା ଦାବି କରିଛନ୍ତି । ଏହି ଘଟଣାରେ ବିଜେପି ମଧ୍ୟ ପୀଡିତାଙ୍କୁ ସୁରକ୍ଷା ଦାବି କରିବା ସହ ବିଧାୟକଙ୍କ ପୁଅ ଓ ତାଙ୍କ ସହଯୋଗୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ପୀଡିତା ଏସପିଙ୍କୁ ଭେଟିବା ପରେ ପୀଡିତାଙ୍କୁ ସୁରକ୍ଷା ଯୋଗାଇବା ବ୍ୟବସ୍ଥା ଗ୍ରହଣ କରିବା ସହ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ କେନ୍ଦୁଝର ଏସପି ସୂଚନା ଦେଇଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
