ଗଜପତି: ରକ୍ତ ଚନ୍ଦନ ଗଣ୍ଡି ଚୋରା ଚାଲାଣ ବେଳେ ସୀମାନ୍ତବର୍ତ୍ତୀ ଆନ୍ଧ୍ରର ମିଳିଆପୁଟି ଥାନା ପୋଲିସ ହାତରେ ଧରା ପଡିଛନ୍ତି ୩ଜଣ ଚନ୍ଦନ ବେପାରୀ । ଗିରଫ ବ୍ୟକ୍ତିମାନେ ହେଲେ ପାରଳାଖେମୁଣ୍ଡିର ଶେଖ୍ ସାଲିମ,ଗୁମ୍ମା ଅଞ୍ଚଳର କେତନ ପାଣି ଏବଂ ଆନ୍ଧ୍ର ପ୍ରଦେଶ ବିଶାଖପାଟଣାର ଏସ.ଶ୍ରୀନିବାସ ରାଓ ।
ଏହି ରକ୍ତ ଚନ୍ଦନ ଗଣ୍ଡିକୁ ସେମାନେ ଗଜପତି ଜିଲ୍ଲାର ଲାବଣ୍ୟଗଡ ଅଞ୍ଚଳରେ ଥିବା ରକ୍ତ ଚନ୍ଦନ ବଣରୁ ନେଇ ଦିଲ୍ଲୀ ପଠାଇବା ପାଇଁ ବିଶାଖପାଟଣା ଯାତ୍ରା କରୁଥିବା ବେଳେ ପୋଲିସ ହାତରେ ଧରାପଡିଥିବା ପୁରୁଣାପାଟଣା ସିଆଇ ସୂଚନା ଦେଇଛନ୍ତି ।
ପ୍ରକାଶ ଥାଉକି ପ୍ରତିଦିନ ଭଳି ଗୁରୁବାର ମଧ୍ୟ ମେଳିଆପୁଟି ଥାନା ପୋଲିସ ଗାଡି ଯାଞ୍ଚ କରୁଥିବା ସମସୟରେ ଏକ ବିଶେଷ ସୂତ୍ରରୂ ଡିଜାଇର ଏପି-୩୧ଟିଭି୫୭୧୪କୁ ଅଟକାଇଥିଲା । ଏହାର ଯାଞ୍ଚ କଲାବେଳେ ୪ଟି ରକ୍ତ ଚନ୍ଦନ ଗଣ୍ଡି କାର ମଧ୍ୟରେ ରହିଥିବା ଜାଣିବାକୁ ପାଇଥିଲା । ପରେ ଗାଡ଼ିକୁ ଅଟକାଇ କାଗଜପତ୍ର ମାଗିଥିଲା ପୋଲିସ । ତେବେ ଗାଡ଼ି କାଗଜପତ୍ର ଦେବାରେ ବିଫଳ ହେବାରୁ ପୋଲିସ ସନ୍ଦେହ କରି ସେମାନଙ୍କୁ ପଚରାଉଚରା ଆରମ୍ଭ କରିଥିଲା । ଏହି ସମୟରେ ସେମାନେ ଏହି ଗଣ୍ଡି ଗୁଡ଼ିକ ଲାବନ୍ୟଗଡ ଜଙ୍ଗଲରୁ ଆଣିଥିବା ବେଳେ ଏହାକୁ ଦିଲ୍ଲୀ ପଠାଇବା ପାଇଁ ବିଶାଖପାଟଣା ନେଉଛନ୍ତି ବୋଲି ପୋଲିସ ସମ୍ମୁଖରେ ସ୍ବୀକାର କରିଥିଲେ ।
ଏହି ୩ଜଣଙ୍କୁ ଗିରଫ କରିବା ସହ ରକ୍ତ ଚନ୍ଦନ ଗଣ୍ଡି ଏବଂ ବ୍ୟବହୃତ କାରକୁ ଜବତ କରି ଅଧିକ ତଦନ୍ତ ଜାରି ରଖିଥିଲା ପୋଲିସ । ଜବତ କାଠର ଓଜନ ୨୦୬କିଲୋ ହୋଇଥିବା ବେଳେ ଏହାର ସାଧାରଣ ବଜାର ଦର ଲକ୍ଷାଧିକ ଟଙ୍କା ହେବ ବୋଲି ପୋଲିସ ସୂଚନା ଦେଇଛି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
