ଢେଙ୍କାନାଳ : ପରଜଙ୍ଗ ବ୍ଲକର କୁଟୁରିଆ ପଞ୍ଚାୟତର ମଦରଙ୍ଗାମୁଣ୍ଡା ଗ୍ରାମରେ ଜଙ୍ଗଲ କାଟି କାଠ ଚୋରି ଓ ଜଙ୍ଗଲ ଜମିକୁ ଜବରଦଖଲ ବିରୋଧରେ ସ୍ଥାନୀୟ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖିବାକୁ ମିଳିଛି । ବାରମ୍ବାର ଅଭିଯୋଗ ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନହେବାରୁ ଆଜି ହଜାର ହଜାର ଗ୍ରାମବାସୀ ଜିଲାପାଳଙ୍କ କାର୍ଯ୍ୟାଳୟ ଘେରାଉ କରିଥିବା ଦେଖିବାକୁ ମିଳିଛି ।
ସ୍ଥାନୀୟ ଗ୍ରାମବାସୀଙ୍କ ଅଭିଯୋଗ ଅନୁସାରେ, ଗ୍ରାମକୁ ଲାଗି ଟସରତୈଲା ନାମକ ୩୦୦ ଏକର ଜମି ଜଙ୍ଗଲ କିଶମ ଥିବାବେଳେ ଏହାକୁ ମଦରଙ୍ଗା ମୁଣ୍ଡା ଗ୍ରାମବାସୀ ସୁରକ୍ଷା ଦେବା ସହ ବହୁ ମୂଲ୍ୟବାନ ଗଛ ଲଗାଇ ଜଙ୍ଗଲ ସୃଷ୍ଟି କରିଥିଲେ । ମାତ୍ର ପଡୋଶୀ ଗ୍ରାମର କିଛି ଅସାମାଜିକ ବ୍ୟକ୍ତି ବଳପୂର୍ବକ ଏହି ଜଙ୍ଗଲରେ ପଶି ବହୁ ମୂଲ୍ୟବାନ ଗଛ ସବୁକୁ କାଟି ନେବା ସହ ଜଙ୍ଗଲ ଜମି ଜବରଦଖଲ କରିବାରେ ଲାଗିଛନ୍ତି।
ଏ ସମ୍ପର୍କରେ ପୂର୍ବରୁ ଗ୍ରାମବାସୀ ସ୍ଥାନୀୟ ବନପାଳ ଓ ତହସିଲଦାରଙ୍କୁ ଅଭିଯୋଗ କରିଥିଲେ ମଧ୍ୟ ସୁଫଳ ପାଇ ନଥିବା ପ୍ରକାଶ କରିଛନ୍ତି । ତେବେ ଜିଲ୍ଲାପାଳ ତୁରନ୍ତ ପଦକ୍ଷେପ ନନେଲେ ଆଗାମୀ ସମୟରେ ଭୟଙ୍କର ଆନ୍ଦୋଳନ ହେବ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
