ଦେବଗଡ଼: ସବୁଜ ବନାନୀ ପରିବେଷ୍ଟିତ ରମଣୀୟ ପ୍ରକୃତି କୋଳରେ ଅବସ୍ଥିତ ଦେଓଝରଣ ଜଳପ୍ରପାତ । ଯାହା ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ଓଡ଼ିଶାର ଦେବଗଡ ଜିଲ୍ଲାରେ ଅବସ୍ଥିତ । କିନ୍ତୁ ଦୀର୍ଘବର୍ଷ ହେଲା ଏହି ପର୍ଯ୍ୟଟନ ସ୍ଥଳୀର ବିକାଶ ଦିଗରେ କୌଣସି ପଦକ୍ଷେପ ନିଆଯାଉ ନଥିବାରୁ ଏହା ନିଜର ଆକର୍ଷଣ ହରାଇବାକୁ ବସିଛି ।
ଦେବଗଡ଼ ଜିଲ୍ଲା ତିଳେଇବଣି ବ୍ଲକ ଚଟିବରଘାଟ ଛକ ସ୍ଥିତ 49 ନମ୍ବର ଜାତୀୟ ରାଜପଥରୁ ଗୋହିରା ଡ୍ୟାମକୁ ଯାଇଥିବା ରାସ୍ତାର ମାତ୍ର ଦୁଇ କିଲୋମିଟର ଦୂରରେ ଅବସ୍ଥିତ ଜିଲ୍ଲାର ଅନ୍ୟତମ ପର୍ଯ୍ୟଟନସ୍ଥଳୀ ଦେଓଝରଣ ଜଳ ପ୍ରପାତ । ନିଘଞ୍ଚ ଅରଣ୍ୟ ପରିବେଷ୍ଠିତ ପ୍ରାକୃତିକ ପରିବେଶ ମଧ୍ୟରେ ପାହାଡ଼ ଛାତିକୁ ଚିରି ବୋହି ଆସୁଥିବା ସୁନ୍ଦର ଝରଣା ଓ ସେଠାରେ ସୃଷ୍ଟି ହୋଇଥିବା ଏକ ପ୍ରାକୃତିକ ଗଣ୍ଡର ଅପୂର୍ବ ଶୋଭା ସହଜେ ଦର୍ଶକଙ୍କୁ ଆକର୍ଷିତ କରିଥାଏ । ଏହି ମନୋରମ ଦୃଶ୍ୟ ଉପଭୋଗ କରିବା ପାଇଁ ପ୍ରତିବର୍ଷ ନଭେମ୍ବର ମାସଠାରୁ ଫେବୃଆରୀ ମାସ ପର୍ଯ୍ୟନ୍ତ, ଏଠାକୁ ଦୁରଦୁରାନ୍ତରୁ ପର୍ଯ୍ୟଟକ ଓ ପିକନିକ ପାର୍ଟିଙ୍କ ସୁଅ ଛୁଟିଥାଏ । ମାତ୍ର ଅତ୍ୟନ୍ତ ପରିତାପର ବିଷୟ ହେଲା, ଦୀର୍ଘବର୍ଷ ହେବ ଜିଲ୍ଲାର ଏହି ମନୋରମ ପର୍ଯ୍ୟଟନ ସ୍ଥଳୀଟି ପ୍ରଶାସନିକ ଅବହେଳା କାରଣରୁ ନିଜ ଆକର୍ଷଣ ହରାଇବାକୁ ବସିଛି ।
ବହୁବର୍ଷ ପୂର୍ବରୁ ବନବିଭାଗ ପକ୍ଷରୁ ଏହାର ଉନ୍ନତିକରଣ କରାଯାଇ ଅନେକ ପିଣ୍ଡି, ରାସ୍ତା ଓ ବିଭିନ୍ନ କାରୁକାର୍ଯ୍ୟ ନିର୍ମାଣ କରାଯାଇଥିଲା । ହେଲେ ରକ୍ଷଣାବେକ୍ଷଣ ଅଭାବରୁ ଏବେ ସେଗୁଡିକ ଭାଙ୍ଗିରୁଜି ନଷ୍ଟ ହୋଇଗଲାଣି । ତେଣୁ ଏଠାକୁ ଆସୁଥିବା ଦର୍ଶକ ଓ ପର୍ଯ୍ୟଟକଙ୍କୁ ଏହା ବହୁମାତ୍ରାରେ ନିରାଶ କରିଛି । ତେବେ ଜିଲ୍ଲା ପ୍ରଶାସନ ଓ ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ଏହି ପର୍ଯ୍ୟଟନ ସ୍ଥଳୀର ବିକାଶ କରାଗଲେ ଏଠାକୁ ବହୁସଂଖ୍ୟାରେ ପର୍ଯ୍ୟଟକ ଆସିପାରନ୍ତେ ବୋଲି ସାଧାରଣରେ ମତ ପ୍ରକାଶ ପାଇଛି ।
ଦେବଗଡ଼ରୁ ସରୋଜ ଶତପଥୀ, ଇଟିଭି ଭାରତ
