ବୌଦ୍ଧ: ଜିଲ୍ଲାର ବିଭିନ୍ନ ରାଜସ୍ବ ମଣ୍ଡଳରେ ଭୂମିହୀନ ଦଳିତ ପରିବାର ରହିଥିବା ବେଳେ ଦଳିତ ବସ୍ତି ଓ ଗାଁକୁ ସବୁଦିନିଆ ରାସ୍ତା ନାହିଁ । ଏହାର ପ୍ରତିବାଦରେ ଜିଲ୍ଲା ପାଣ ଗଣ୍ଡା ସମାଜ ବିକାଶ ପରିଷଦ ପକ୍ଷରୁ ତହସିଲ କାର୍ଯ୍ୟାଳୟ ଘେରାଉ ସହ ବିକ୍ଷୋଭ ପ୍ରଦର୍ଶନ କରାଯାଇଛି । ଜିଲ୍ଲାର ତିନୋଟି ତହସିଲ ଅନ୍ତର୍ଗତ ବିଭିନ୍ନ ଅଞ୍ଚଳରେ ଅବହେଳିତ ଅବସ୍ଥାରେ ଆଦିବାସୀ ଦଳିତ ବସ୍ତି ଓ ଗ୍ରାମ । ଅନେକ ପରିବାର ନିକଟରେ ଭୂମି ଆଦୌ ନଥିବା ବେଳେ ଅତ୍ୟନ୍ତ ଦୁର୍ଦ୍ଦିନରେ କାଳ କାଟୁଛନ୍ତି ।
ଏହାର ପ୍ରତିବାଦରେ ବୌଦ୍ଧ ଜିଲ୍ଲାରେ ପର୍ଯ୍ୟାୟ କ୍ରମେ କଣ୍ଟାମାଳ, ହରଭଙ୍ଗା ଓ ଆଜି ବୌଦ୍ଧ ତହସିଲ କାର୍ଯ୍ୟାଳୟ ଘେରାଉ କରାଯିବା ସହିତ ବିଶାଳ ବିକ୍ଷୋଭ ପ୍ରଦର୍ଶନ କରାଯାଇଥିଲା । ବୌଦ୍ଧ ସ୍ଥିତ ରଘୁନାଥ ମନ୍ଦିର ଠାରୁ ହଜାର ହଜାର ଦଳିତ ଲୋକଙ୍କୁ ନେଇ ଜିଲ୍ଲା ପାଣ ଗଣ୍ଡା ସମାଜ ବିକାଶ ପରିଷଦ ପକ୍ଷରୁ ସ୍ଥାନୀୟ ତହସିଲଦାରଙ୍କ ଜରିଆରେ ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଥିଲା ।
ତେବେ ଗତ କିଛି ବର୍ଷ ପୂର୍ବରୁ ବୌଦ୍ଧର ତତ୍କାଳୀନ ତହସିଲଦାର ବ୍ୟାପକ ଚଞ୍ଚକତା କରି ହଜାର ହଜାର ଏକର ସରକାରୀ ଜମିକୁ ବିଭିନ୍ନ ପ୍ରଭାବଶାଳୀ ବ୍ୟକ୍ତି, ଚାକିରିଆ, ରାଜନୈତିକ ବ୍ୟକ୍ତିଙ୍କୁ ବେଆଇନ ଭାବରେ ପ୍ରଦାନ କରିଥିବା ନେଇ ଅଭିଯୋଗ ହୋଇଛି ।
ଇଟିଭି ଭାରତ, ବୌଦ୍ଧ
