ବରଗଡ଼: ଜିଲ୍ଲାରେ ଚାଲିଥିବା ବିଶ୍ବ ପ୍ରସିଦ୍ଧ ଧନୁଯାତ୍ରାର ବୁଧବାର ଦ୍ବିତୀୟ ଦିନ। ଏହି ଦିନରେ ମହାରାଜ କଂସ ମଥୁରା ନଗର ଭ୍ରମଣରେ ବହାରିଛନ୍ତି । ହାତୀ ଉପରେ ବସି ମହାରାଜା କଂସ ମଥୁରା ନଗର ଭ୍ରମଣ କରୁଥିବା ସମୟରେ ରାସ୍ତାରେ ଟ୍ରାଫିକ ନିୟମ ଖିଲାପକାରୀଙ୍କୁ ଅଟକାଇ ଅର୍ଥଦଣ୍ଡରେ ଦଣ୍ଡିତ କରିଛନ୍ତି ।
ମଥୁରା ନଗରରେ ମହାରାଜା ଉଗ୍ରସେନଙ୍କୁ ଗାଦିଚ୍ୟୁତ କରି କଂସ ନିଜେ ସିଂହାସନ ଅକ୍ତିଆର କରିବା ପରେ ବୁଧବାର ସେ ରାଜଭବନ ଠାରୁ ବାହାରି ମଥୁରା ନଗର ଭ୍ରମଣ କରିଛନ୍ତି । ତାଙ୍କର ରାଜତ୍ଵ ଆରମ୍ଭ ହୋଇଯାଇଛି ଓ ତାଙ୍କ ସମସ୍ତ ନିୟମକୁ ଲୋକେ ପାଳନ କରିବାକୁ ବାଧ୍ୟ ବୋଲି ମଥୁରା ନଗରୀରେ ଜନତାଙ୍କୁ ସନ୍ଦେଶ ମିଳିଛି ।
ମହାରାଜା କଂସଙ୍କ ନଗର ଭ୍ରମଣ ଦୃଶ୍ୟ ବେଶ ମନୋରମ ହୋଇଥିବା ବେଳେ ନଗର ଭ୍ରମଣ ସମୟରେ ଟ୍ରାଫିକ ନିୟମ ଖିଲାପକାରୀ ବ୍ୟକ୍ତିଙ୍କୁ ଦଣ୍ଡବିଧାନ କରିଥିଲେ ମହାରାଜ କଂସ । ମଥୁରାର ପ୍ରତ୍ୟେକ ନାଗରିକ ଏହି ମୁକ୍ତକାଶ ରଙ୍ଗମଞ୍ଚର ଜଣେ ଜଣେ କଳାକାର ସାଜିଥିବାରୁ ମହାରାଜ କଂସଙ୍କ ଆଦେଶ ପାଳନ କରିଥାନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
