ଭୁବନେଶ୍ବର: କିଟ ବିଶ୍ବବିଦ୍ୟାଳୟରେ ଉଦଘାଟିତ ହେଲା ଟେନିସ୍ ଏକାଡେମୀ । ଜର୍ମାନୀର ପୂର୍ବତନ ଗ୍ରାଣ୍ଡ ସ୍ଲାମ୍ ଟେନିସ୍ ଖେଳାଳି ତଥା ଟେନିସ୍ ବିଶ୍ବବିଦ୍ୟାଳୟର ପ୍ରତିଷ୍ଠାତା ଆଲେକଜାଣ୍ଡର ୱାସକେ ଏବଂ ଅହମଦାବାଦ ସ୍ଥିତ ଅଲଟେଭୋଲ ଟେନିସ୍ ଏକାଡେମୀ ସହଯୋଗରେ କିଟ୍-ଆଲେକଜାଣ୍ଡର-ଟେନିସ୍ ଏକାଡେମୀ ବୁଧବାର ଉଦଘାଟିତ ହୋଇଛି । ଏହାର ଉଦଘାଟନୀ କାର୍ଯ୍ୟକ୍ରମରେ ରାଜ୍ୟ କ୍ରୀଡାମନ୍ତ୍ରୀ ତୁଷାରକାନ୍ତି ବେହେରା, କିଟ୍ ଓ କିସ୍ ପ୍ରତିଷ୍ଠାତା ତଥା କନ୍ଧମାଳ ସାଂସଦ ଅଚ୍ୟୁତ ସାମନ୍ତ, ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ କମିଶନର ଭିନିଲ କ୍ରିଷ୍ଣା, ଆଲେକଜାଣ୍ଡର ୱାସକେ, ଅଲଟେଭୋଲ ଟେନିସ୍ ଏକାଡେମୀର ପ୍ରତିଷ୍ଠାତା ଚିରାଗ ପଟେଲ୍ ଏବଂ ଅଲଟେଭୋଲ ଟେନିସ୍ ଏକାଡେମୀର ନିର୍ଦ୍ଦେଶକ ଶ୍ରୀମଲ୍ ଭଟ୍ଟ ଯୋଗ ଦେଇଥିଲେ ।
ଏକାଡେମୀ ପକ୍ଷରୁ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇ ୱାସକେ କହିଲେ, ଓଡ଼ିଶା ସମେତ ଭାରତରେ ବହୁ ପ୍ରତିଭାବାନ୍ ଖେଳାଳି ଅଛନ୍ତି । ଏହି ଏକାଡେମୀ ଓଡ଼ିଶାରେ ଟେନିସ୍ ଖେଳର ପ୍ରସାର କ୍ଷେତ୍ରରେ ସହାୟକ ହେବା ସହ ଆଗାମୀ ଦିନର ଗ୍ରାଣ୍ଡ ସ୍ଲାମ୍ ଖେଳାଳି ସୃଷ୍ଟି କରିବାରେ ଏହି ଏକାଡେମୀ ଏକ ପ୍ରମୁଖ ମାଧ୍ୟମ ସାଜିବ । କିଟ୍ ଆଲେକଜାଣ୍ଡର ୱାସ୍କେ-ଆଲଟେଭୋଲ୍ ଟେନିସ୍ ଏକାଡେମୀ ମିଳିତ ଭାବେ ଏହି ଟେନିସ ଏକାଡେମୀରେ ଟେନିସ୍ ଖେଳ ପ୍ରତି ଆଗ୍ରହ ଥିବା ପିଲାଙ୍କୁ ପ୍ରଶିକ୍ଷଣ ଦିଆଯିବା ନେଇ କହିଛନ୍ତି । ଏଥିରେ କିଟ୍ ଓ କିସ୍ ସମେତ ଅନ୍ୟ ପିଲାମାନେ ମଧ୍ୟ ଟେନିସ୍ ପ୍ରଶିକ୍ଷଣ ନିମନ୍ତେ ଆବେଦନ କରି ନାମ ଲୋଖାଇପାରିବେ ବୋଲି କିଟ୍ କ୍ରୀଡ଼ା ମହାନିର୍ଦ୍ଦେଶକ ଡ. ଗଗନେନ୍ଦୁ ଦାଶ କହିଥିଲେ ।
କିଟ୍ରେ ରାଜ୍ୟ ତଥା ଦେଶ ବିଦେଶର ପିଲାମାନେ ପଢ଼ୁଥିବାରୁ ସେମାନଙ୍କ ପାଇଁ ଏହି ଏକାଡେମୀ ବେଶ୍ ସହାୟକ ହେବା ନେଇ ଆଶା ରଖାଯାଇଛି । ପ୍ରଥମ ପର୍ଯ୍ୟାୟରେ ଟେନିସ୍ କ୍ରୀଡ଼ା ପ୍ରତିଭାମାନଙ୍କୁ ଚିହ୍ନଟ କରାଯାଇ ସେମାନଙ୍କୁ ତାଲିମ ପ୍ରଦାନ କରାଯିବ । ଦ୍ବିତୀୟ ପର୍ଯ୍ୟାୟରେ ବିଦ୍ୟାଳୟ ଓ ବିଶ୍ବବିଦ୍ୟାଳୟ ସ୍ତରରେ ଟେନିସ୍ ଖେଳାଳିଙ୍କ ପାଇଁ ତାଲିମ୍ ବ୍ୟବସ୍ଥା ରହିଛି । ତୃତୀୟ ପର୍ଯ୍ୟାୟରେ ଟେନିସ୍ ଖେଳାଳିଙ୍କୁ ହାଇ-ପରଫରମାନସ ତାଲିମ୍ ପ୍ରଦାନ କରାଯାଇ ଜାତୀୟ ଓ ଅନ୍ତର୍ଜାତୀୟ ଖେଳାଳି ସୃଷ୍ଟି କରାଯିବ ।
ଏଠାରେ ତାଲିମ ପାଇଁ ଅନ୍ତର୍ଜାତୀୟସ୍ତରର ୧୫ଜଣ କୋଚ ରହିବା ସହ ଫିଜିଓ ବ୍ୟବସ୍ଥା ରହିବ । ଏହା ବ୍ୟତୀତ ସମୟକୁ ସମୟ ୱାସକେ ମଧ୍ୟ ଓଡ଼ିଶା ଆସି ତାଲିମ ପ୍ରଦାନ କରିବା ସହ ଭର୍ଚୁଆଲରେ ତାଲିମ୍ ପ୍ରଦାନ କରିବେ । ତେବେ ଟେନିସ ଏକାଡେମୀର ଉଦଘାଟନୀ ଉତ୍ସବ ଅବସରରେ କିଟ୍ କ୍ରୀଡ଼ା ମହାନିର୍ଦ୍ଦେଶକ ଡ. ଗଗନେନ୍ଦୁ ଦାଶ କହିଥିଲେ, ଆଗାମୀ ଦିନରେ କିଟ୍ ଏବଂ କିସ୍ରୁ ଅନ୍ତର୍ଜାତୀୟ ଟେନିସ୍ ଖେଳାଳି ବାହାରିବେ । ଅନ୍ୟମାନଙ୍କ ମଧ୍ୟରେ ଆଲଟେଭୋଲ୍ ଟେନିସ୍ ଏକାଡେମୀ ପ୍ରତିଷ୍ଠାତା ଚିରାଗ୍ ପଟେଲ, ଆଲଟେଭୋଲ୍ ଟେନିସ୍ ଏକାଡେମୀ ନିର୍ଦ୍ଦେଶକ ଶ୍ରୀମୟ ଭଟ୍ଟ ଏବଂ ପ୍ରକାଶ ପଟେଲ ପ୍ରମୁଖ ଉପସ୍ଥିତ ଥିଲେ ।
ଇଟିଭି ଭାରତ, ଭୁବନେଶ୍ବର
