ନୂଆଦିଲ୍ଲୀ: ଚଳିତ ଟୋକିଓ ଅଲମ୍ପିକ୍ରେ ଭାରତୀୟ ମହିଳା ହକି ଟିମ କ୍ବାର୍ଟର ଫାଇନାଲରେ ଅଷ୍ଟ୍ରେଲିଆକୁ ପରାସ୍ତ କରି ଇତିହାସ ରଚିଛି । ଅଲମ୍ପିକ ହକି ଇତିହାସରେ ପ୍ରଥମ ଥର ସେମିଫାଇନାଲରେ ପ୍ରବେଶ କରିଛି ।
ତେବେ ଏହି ଐତିହାସିକ ବିଜୟ ପରେ ମୁଖ୍ୟ କୋଚ୍ ଜୋର୍ଡ ମାରିଜିନଙ୍କୁ କିଛି ଫ୍ୟାନ୍ସ, ସୁପରଷ୍ଟାର ଶାହାରୁଖ ଖାନଙ୍କ ଅଭିନୀତ ହକି ଉପରେ ଆଧାରିତ ବଲିଉଡ ଫିଲ୍ମ 'ଚକ୍ ଦେ ଇଣ୍ଡିଆ'ର କୋଚ୍ ଚରିତ୍ର 'କବିର ଖାନ'ଙ୍କ ସହ ତୁଳନା କରିଛନ୍ତି । ଏହି ଫିଲ୍ମରେ ଭାରତୀୟ ମହିଳା ହକି ଟିମର କୋଚ୍ ଭୂମିକାରେ ଅଭିନୟ କରିଥିଲେ ଶାହାରୁଖ ।
ଭାରତ ୧-୦ରେ ଅଷ୍ଟ୍ରେଲିଆକୁ ହରାଇ ଟୋକିଓ ଅଲମ୍ପିକର ସେମିରେ ପ୍ରବେଶ କରିଛି । ଟ୍ବିଟରେ ମାରିଜିନ "sorry family, i coming again later(sis)," ଲେଖିବା ସହ ହକି ସ୍କ୍ବାଡ ସହ ଫଟୋ ସେୟାର କରିଛନ୍ତି ।
କୋଚ୍ ମାରିଜିନଙ୍କ ଏହି ଟ୍ବିଟର ଠିକ୍ କିଛି ମୂହୁର୍ତ୍ତ ମଧ୍ୟରେ ଫ୍ୟାନ୍ସ କବିର ଖାନଙ୍କ ସହ ତୁଳନା କରିବାକୁ ଲାଗିଥିଲେ । କିପରି ଏକ ରିଲ୍ ଷ୍ଟୋରି ରିୟଲ ହୋଇପାରିଛି ।
ଜଣେ ଫ୍ୟାନ୍ସ ଲେଖିଛନ୍ତି, "ଭାରତୀୟ ମହିଳା ହକି ଟିମକୁ ନୂତନ ରୂପ ଦେବାରେ ଦୁଇଜଣଙ୍କ ହାତ ରହିଛି । ଜଣେ କବିର ଖାନ(Real life) ଓ ଜୋର୍ଡ ମାରିଜିନ(Real life) ।"
ବଲିଉଡ ଫିଲ୍ମ 'ଚକ୍ ଦେ ଇଣ୍ଡିଆ'ରେ ଶାହାରୁଖ କୋଚ୍ କବିର ଖାନଙ୍କ ଚରିତ୍ରରେ ଅଭିନୟ କରିଥିଲେ । ମହିଳା ଟିମକୁ ବିଶ୍ବ ଚମ୍ପିଆନସିପ୍ରେ ଟ୍ରଫି ଜିତାଇବାରେ ସମସ୍ତ ପ୍ରଶିକ୍ଷଣ, ପରାମର୍ଶ ଓ ପ୍ରୟାସ କରିଥିବା ଫିଲ୍ମରେ ଦର୍ଶାଯାଇଛି । ପୂର୍ବତନ ଭାରତୀୟ ହକି ଖେଳାଳି ମୀର ରଞ୍ଜନ ନେଗୀଙ୍କ ଜାବନୀ କାହାଣୀ ଉପରେ ଏହି ଫିଲ୍ମର କାହାଣୀ ଆଧାରିତ ବୋଲି ମଧ୍ୟ କୁହାଯାଏ । ମାତ୍ର ପରେ ପୂର୍ବତନ ଗୋଲ୍କିପର ତାଙ୍କର କାହାଣୀ ନୁହେଁ ବୋଲି ସ୍ପଷ୍ଟ କରିଥିଲେ ।
ତେବେ ଆଜିର ଦିନ ଭାରତୀୟ ହକି ପାଇଁ ଏକ ଐତିହାସିକ ଓ ସ୍ମରଣୀୟ ଦିନ ପାଲଟିଯାଇଛି । କଡା ପ୍ରତିନ୍ଦ୍ବନ୍ଦ୍ବୀତା ପୂର୍ଣ୍ଣ ମ୍ୟାଚରେ ଗୁରଜୀତ କୌର ଭାରତ ପାଇଁ ଏକମାତ୍ର ଗୋଲ୍ କରି ବିଜୟୀ କରାଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
