ହାଇଦ୍ରାବାଦ : ଆମେ ଭାରତ ପାକିସ୍ତାନ ମଧ୍ୟରେ ଫାଇନାଲ ମୁକାବିଲା ଦେଖିବାକୁ ଚାହୁଁ ନାହୁଁ । ଏକଥା ଆମେ କହୁ ନାହୁଁ । ଏ କଥା କହିଛନ୍ତି ଇଲିଂସ ଟିମ୍ କ୍ୟାପଟେନ୍ । ଚଳିତ ଟି୨୦ ବିଶ୍ବକପ ଫାଇନାଲରେ କ୍ରିକେଟ ପ୍ରଶଂସକ ଭାରତ ପାକିସ୍ତାନ ମଧ୍ୟରେ ମୁକାବିଲା ଦେଖିବାକୁ ଉତ୍କଣ୍ଠା ରହିଥିବା ବେଳେ ଇଂରାଜୀ ଦଳର ଅଧିନାୟକ ଏଭଳି ବୟାନ ରଖିଛନ୍ତି । ଆସନ୍ତାକାଲି ( ଗୁରୁବାର ) ଦ୍ବିତୀୟ ସେମିଫାଇନାଲ ମ୍ୟାଚ ଖେଳାଯିବ । ଆଡିଲେଡରେ ମୁହାଁମୁହାଁ ହେବେ ଭାରତ ଏବଂ ଇଂଲଣ୍ଡ ।
ଏନେଇ ଇଂଲଣ୍ଡର ଅଧିନାୟକ ଜୋସ୍ ବଟଲର କହିଛନ୍ତି, "ଆମେ ଫାଇନାଲରେ ଭାରତ ପାକିସ୍ତାନ ମ୍ୟାଚ ଦେଖିବାକୁ ଚାହୁଁନାହୁଁ । କଦାପି ଭାରତକୁ ଟି୨୦ ବିଶ୍ବକପ ଫାଇନାଲ ଟିକଟ୍ ହାତେଇବାକୁ ସୁଯୋଗ ଦେବୁନି । ସେମିଫାଇନାଲ ମ୍ୟାଚରେ ଭାରତର ରଣନୀତିକୁ ସଫଳ ହେବାକୁ ଦେବୁ ନାହୁଁ । ଭାରତକୁ ପରାସ୍ତ କରିବାକୁ ଆମେ ପ୍ରାଣମୂର୍ଚ୍ଛା ଉଦ୍ୟମ କରିବୁ । ଇଂଲଣ୍ଡ ମେନ୍ ଇନ୍ ବ୍ଲୁକୁ ପରାସ୍ତ କରି ଫାଇନାଲରେ ପ୍ରବେଶ କରିବ । ସେମିଫାଇନାଲରେ ଭାରତ ସହିତ ମୁକାବିଲା ନେଇ ବହୁତ ଉତ୍ସାହିତ ରହିଛୁ । ଆମେ ରୋହିତ ବାହିନୀର ସମସ୍ତ ଯୋଜନା ପଣ୍ଡ କରି ଫାଇନାଲ ଟିକଟ୍ ହାତେଇବୁ ।"
ସେପଟେ ବଟଲର ଆହୁରି ମଧ୍ୟ କହିଛନ୍ତି, "ସୂର୍ଯ୍ୟକୁମାର ଯାଦବ ଏବେ ଚମତ୍କାର ଫର୍ମରେ ନଜର ଆସିଛନ୍ତି । ତାଙ୍କ ଇନିଂସ ଦେଖିବାକୁ ଭଲ ଲାଗେ । ମଇଦାନରେ ସବୁ ଦିଗକୁ ସଟ୍ ଖେଳିବାରେ ତାଙ୍କ ପାଖରେ ଅଭିଜ୍ଞତା ରହିଛି । ସେ ଦଳ ପାଇଁ ଟିକେ ଭାରି ପଡି ପାରନ୍ତି । ତଥାପି ସମସ୍ତଙ୍କ ୱିକେଟ ଯେପରି ନେଉ ଠିକ୍ ସେହିପରି ଆମେ Skyଙ୍କ ୱିକେଟ ନେବୁ ।"
ଇଂଲଣ୍ଡର ଦୁଇ ଷ୍ଟାର କ୍ରିକେଟର ଡେଭିଡ ମଲାନ ଏହଂ ମାର୍କ ଉଡ୍ ଆହତ ହୋଇଛନ୍ତି । ତେଣୁ ଭାରତ ବିପକ୍ଷ ସେମିଫାଇନାଲ ମ୍ୟାଚରେ ସେମାନେ ଖେଳିବା ନେଇ ଆଶଙ୍କା ଦେଖାଦେଇଛି । ଯଦି ସେମାନେ ଆହତ ସମସ୍ୟାରୁ ମୁକୁଳି ଫିଟ୍ ହୋଇଯିବେ ତାହେଲେ ସେମିରେ ସେମାନେ ଖେଳିବେ ବୋଲି କହିଛନ୍ତି ଜୋସ୍ ବଟଲର । ସେପଟେ ନ୍ୟୁଜିଲାଣ୍ଡକୁ ୭ ୱିକେଟରେ ପରାସ୍ତ କରି ଫାଇନାଲରେ ଦମଦାର ଏଣ୍ଟ୍ରି ମାରିଛି ପାକିସ୍ତାନ । ଟି-୨୦ ବିଶ୍ବକପ ୨୦୨୨ ରେ ପ୍ରଥମ ଦଳ ଭାବରେ ବାବର ଏଣ୍ଡ କୋ ଫାଇନାଲ ଟିକଟ ହାତେଇଛି ।
