ଭୁବନେଶ୍ବର: ରାଜଧାନୀର ବିଭିନ୍ନ ଥାନା ଅଧୀନରେ ପଡିରହିଥିବା କେସ ଗୁଡିକର ଗୁରୁତ୍ବ ଅନୁସାରେ ସମାଧାନ କରାଯିବ । ଏହା ସହ ଏଥିପାଇଁ କଡା ତଦନ୍ତ ପ୍ରକ୍ରିୟା କରାଯିବ ବୋଲି ନୂତନ ଭାବେ ଯୋଗ ଦେଇଥିବା ଡିସିପି ଡ. ଉମାଶଙ୍କର ଦାସ ପ୍ରକାଶ କରିଛନ୍ତି । ଇଟିଭି ଭାରତକୁ ଦେଇଥିବା ସାକ୍ଷାତକାରରେ ସେ ଏହା ପ୍ରକାଶ କରିଛନ୍ତି ।
ରାଜଧାନୀର ବିଭିନ୍ନ ଥାନାରେ ବହୁ ବର୍ଷ ଧରି ପଡିରହିଛି ଅନେକ କେସ । ଏହି କେସ ଗୁଡିକର ତୁରନ୍ତ ସମାଧାନ ପାଇଁ ନୂତନ ଭାବରେ ଯୋଗ ଦେଇଥିବା ଡିସିପି ଉଦ୍ୟମ କରିବେ ବୋଲି ପ୍ରକାଶ କରିଛନ୍ତି । ବିଶେଷ କରି ପୂର୍ବରୁ ପଡିରହିଥିବା ହତ୍ୟା ଏବଂ ଡକାୟତି ଭଳି ମାମଲା ରିଓପନ ହେବା ସହିତ ଏହାର ପର୍ଦ୍ଦାଫସ ହେବ । ପ୍ରଭାବଶାଳୀ ଭାବେ ଷ୍ଟ୍ରିମଲାଇନ ପ୍ରକ୍ରିୟାରେ ଏହି କେସ ଗୁଡିକର ତଦନ୍ତ କରାଯିବ। ଏପରିକି ତଦନ୍ତ ପ୍ରକ୍ରିୟାକୁ ସଠିକ ଢଙ୍ଗରେ କିପରି କରାଯିବ ତାକୁ ଗୁରୁତ୍ବ ଦିଆଯିବ ବୋଲି ନବନିଯୁକ୍ତ ଭୁବନେଶ୍ବର ଡିସିପି ପ୍ରକାଶ କରିଛନ୍ତି ।
ଅପରାଧ ଓ ଅପରାଧୀଙ୍କ ଉପରେ ତାଙ୍କର ନଜର ରହିବା ସହ ସହରବାସୀଙ୍କ ଅଭିଯୋଗର ତ୍ବରିତ ସମାଧାନ ଉପରେ ଫୋକସ ଦିଆଯିବ ବୋଲି ସେ ଉଲ୍ଲେଖ କରିଛନ୍ତି । ଆଇନଶୃଙ୍ଖଳା ରକ୍ଷା ଓ ଅପରାଧିକ କାର୍ଯ୍ୟକଳାପ ନିୟନ୍ତ୍ରଣ ସହ କୋରୋନା ମୁକାବିଲା ତାଙ୍କ ପାଇଁ ବଡ଼ ଚ୍ୟାଲେଞ୍ଜ ହେବ । ଏହା ସହ ମହାମାରୀ ସମୟରେ ସହରବାସୀଙ୍କୁ ସହଯୋଗ କରିବା ପାଇଁ ଅନୁରୋଧ କରିଛନ୍ତି ନୂତନ ଦାୟିତ୍ବ ନେଇଥିବା ୨୦୦୮ ବ୍ୟାଚର ଆଇପିଏସ ଡ଼. ଉମାଶଙ୍କର ଦାସ ।
ଭୁବନେଶ୍ବରରୁ ତାପସ କୁମାର ପରିଡା, ଇଟିଭି ଭାରତ