ଭୁବନେଶ୍ବର: ଝାରପଡା ସ୍ଥିତ ଗଣେଶ ମଣ୍ଡପ ଦୈନିକ ହାଟ ଭଙ୍ଗାକୁ ନେଇ ଏବେ ଅଶାନ୍ତ ସମଗ୍ର ଅଞ୍ଚଳ । ଘଟଣାକୁ ନେଇ ବ୍ୟବସାୟୀ ଆନ୍ଦୋଳନକାରୀ ପୋଲିସ ମଧ୍ୟରେ ଧସ୍ତାଧସ୍ତି ବିବାଦ ପରେ ଏବେ ଆଲୋଚନା ପାଇଁ ସହମତି ହୋଇଛି ।
ଘଟଣାକୁ ନେଇ କ୍ଷତିଗ୍ରସ୍ତ ବ୍ୟବସାୟୀ ଓ ବିଜେପି ନେତା ମାନେ ଲକ୍ଷ୍ମୀସଗାର ଗୋଲେଇ ଛକରେ ରାସ୍ତାରୋକ କରିଥିଲେ। ଫଳରେ କଟକ -ପୁରୀ ରୋଡରେ ଦୀର୍ଘ ସମୟ ଯାଏଁ ଯାତାୟାତ ଠପ ହୋଇଯାଇଥିଲା । ଏହାକୁ ନେଇ ପୋଲିସ ଆନ୍ଦୋଳନକାରୀଙ୍କ ସହ ଆଲୋଚନା କରିଥିଲେ ମଧ୍ୟ ବିଫଳ ହୋଇଥିଲା । ପରେ ପୋଲିସ କିଛି ଆନ୍ଦୋଳକାରୀଙ୍କୁ ଜବରଦସ୍ତ ଉଠାଇ ନେଇଥିଲା । ଏହାରି ପ୍ରତିବାଦରେ ବିଜେପି ନେତା ମାନେ ଆନ୍ଦୋଳନ ସ୍ଥଳରୁ ସତ୍ୟ ନଗର ଓଭରବ୍ରିଜ ଦେଇ ପଦଯାତ୍ରାରେ ଡିସିପି ଅଫିସ ଅଭିମୁଖେ ଆସିଥିଲେ। ଅଧାରୁ ପୋଲିସ ସେମାନଙ୍କୁ ଉଠାଇ ଭ୍ୟାନରେ ଡିସିପି ଅଫିସ ଆଣିଥିଲା।
ଡିସିପି ଅଫିସ ଆସି ବିଜେପି ନେତା ଓ ବ୍ୟବସାୟୀ ମାନେ ଡିସିପିଙ୍କ ସହ ଆଲୋଚନା କରିଥିଲେ । ବିନା ନୋଟିସରେ ଆଜି ସକାଳୁ ଗଣେଶ ମଣ୍ଡପ ହାଟ ଉଚ୍ଛେଦକୁ ନେଇ ବିରୋଧ କରିଥିଲେ । ଡିସିପି ଅପରାହ୍ନରେ ବ୍ୟବସାୟୀ, ବିଜେପି ପ୍ରତିନିଧି ଓ ବିଏମସି କମିଶନରଙ୍କ ସହ ଆଲୋଚନା କରିବା ପାଇଁ ପ୍ରତିଶୃତି ଦେଇଥିଲେ । ଏହା ପରେ ଆନ୍ଦୋଳନକାରୀ ଆନ୍ଦୋଳନ ସ୍ଥଗିତ କରିଛନ୍ତି ।
ଏହି ଆନ୍ଦୋଳନରେ ବ୍ୟବସାୟୀଙ୍କ ସହ ଭୁବନେଶ୍ବର ଜିଲ୍ଲା ବିଜେପି ସଭାପତି ବାବୁ ସିଂ, ବରିଷ୍ଠ ନେତା ତଥା ବିଧାୟକ ପ୍ରାର୍ଥୀ ଜଗନ୍ନାଥ ପ୍ରଧାନ, ମେୟର ପ୍ରାର୍ଥୀନି ସୁନିତ ମୁଣ୍ଡ, ଦିଲ୍ଲୀପ ମହାନ୍ତି ଓ ଅନ୍ୟ ନେତା କର୍ମୀ ପ୍ରମୁଖ ସାମିଲ ହୋଇଥିଲେ ।
ଭୁବନେଶ୍ବରର ଦେବସ୍ମିତା ରାଉତ, ଇଟିଭି ଭାରତ
