ଭୁବନେଶ୍ବର: ଜଗତଗୁରୁ ଶଙ୍କରାଚାର୍ଯ୍ୟଙ୍କ ସହ ସାକ୍ଷାତ ପରେ ପ୍ରତିକ୍ରିୟା ରଖିଲେ ବରିଷ୍ଠ ବିଜେପି ନେତା ବିଜୟ ମହାପାତ୍ର । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନେଇ ଶଙ୍କରାଚାର୍ଯ୍ୟଙ୍କ ସହ ଦେଢଘଣ୍ଟାରୁ ଅଧିକ ସମୟ ଆଲୋଚନା ହୋଇଥିବା ସେ କହିଛନ୍ତି । ଜଗତଗୁରୁଙ୍କ ମତ ସହ ମୁଁ ସହମତ, ଏଥିରେ ଦ୍ବିମତ ହେବାର ନାହିଁ ବୋଲି କହିଛନ୍ତି ବିଜୟ ।
ବିଜୟ କହିଛନ୍ତି ଯେ, "ଶ୍ରୀମନ୍ଦିର ସୁରକ୍ଷାକୁ ନେଇ ଶଙ୍କରାଚାର୍ଯ୍ୟ ନୀତିଗତ ପ୍ରଶ୍ନ ଉଠାଇଛନ୍ତି, ନିବେଦନ କରିଛନ୍ତି ମୁଖ୍ୟମନ୍ତ୍ରୀ ଏବଂ ପ୍ରଧାନମନ୍ତ୍ରୀ ଏଥିରେ ହସ୍ତକ୍ଷେପ କରନ୍ତୁ ।" ମନ୍ଦିର ପ୍ରକଳ୍ପ ନେଇ ଯେଉଁ କାମ ଚାଲିଛି ଭବିଷ୍ୟତରେ ତାହା କଣ ହେବ । ଏହିପରି ବହୁ ପ୍ରସଙ୍ଗ ଉପରେ ଆଲୋଚନା ହୋଇଛି, ମନ୍ଦିରର ସୁରକ୍ଷା ପାଇଁ କଣ କରାଯାଇପାରିବ ସେନେଇ ଏକ ବିସ୍ତୃତ ଯୋଜନା ତିଆରି ହେବ ବୋଲି ବିଜୟ କହିଛନ୍ତି । ତେବେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଉପରେ ଆଲୋଚନା ମୁଖ୍ୟ ପ୍ରସଙ୍ଗ ଥିଲା ବୋଲି ସେ କହିଛନ୍ତି ।
ସେହିପରି ପୁରୀ ସାଂସଦ ପିନାକୀ ମିଶ୍ରଙ୍କ ପ୍ରତିକ୍ରିୟା ଉପରେ ବିଜୟ ମହାପାତ୍ର କହିଛନ୍ତି ଯେ, "ସାଂସଦ କଣ ପାଇଁ କହୁଛନ୍ତି ସେ ବିଷୟରେ ମତ ରଖିବାକୁ ମୁଁ ଚାହୁଁନାହିଁ, ସେ ନିଜେ ଆସି ଆଲୋଚନା କରୁନାହାନ୍ତି । ସାଂସଦ ନିଜେ ଘଟଣାସ୍ଥଳକୁ ଆସିନାହାନ୍ତି କି ଦେଖିନାହାନ୍ତି ।" ସେ ବିଷୟରେ କିଛି ମତାମତ ଦେବାକୁ ଚାହୁଁନାହିଁ ବୋଲି ବିଜୟ କହିଛନ୍ତି ।
NMA ଉପରେ ବର୍ଷିଲେ ବିଜୟ...
NMA ଚେୟାରମ୍ୟାନ ଗୁଜୁରାଟ ଅହମ୍ମଦାବାଦ ପରିଦର୍ଶନ ପାଇଁ ଯାଉଛନ୍ତି । ଦେଶବ୍ୟାପୀ ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ ଆଲୋଚନା ହେଉ ଥିବାବେଳେ ସେ କିନ୍ତୁ ପୁରୀ ଆସୁନାହାଁନ୍ତି । ଏଠାରେ କଣ ବେନିୟମ କାମ ହୋଇନି, କଣ କିଛି ମୁଷ୍ଟିମେୟ ସରକାରୀ କର୍ମଚାରୀ ନିଆଁଗିଳା କାମ କରିନାହାନ୍ତି ? ବୋଲି ପ୍ରଶ୍ନ କରିଛନ୍ତି ବିଜୟ ।
ଇଟିଭି ଭାରତ, ଭୁବନେଶ୍ବର
