ହାଇଦ୍ରାବାଦ: ଏକଜାଟ୍ ହେବାକୁ ଯାଉଛି ଏକଜିଟ୍ ପୋଲ୍ । ତେଲେଙ୍ଗାନାରେ ସରକାର ପରିବର୍ତ୍ତନର ସଂକେତ। ହ୍ୟାଟ୍ରିକ ଲକ୍ଷ୍ୟରେ ଥିବା ମୁଖ୍ୟମନ୍ତ୍ରୀ କେସିଆରଙ୍କୁ କ୍ଲିନବୋଲ୍ଡ କରିଛି କଂଗ୍ରେସ । ଶାସକ ବିଆରଏସର ଦଳୀୟ ଚିହ୍ନ 'କାର୍'କୁ ପଙ୍କଚର କରିଛି କଂଗ୍ରେସ ପାର୍ଟିର 'ହାତ' । ଦକ୍ଷିଣ ଭାରତରେ ବଢ଼ୁଛି କଂଗ୍ରେସର ଦବଦବା । କର୍ଣ୍ଣାଟକ ପରେ ତେଲଙ୍ଗାନା ବିଜୟ ପଥରେ ଗ୍ରାଣ୍ଡ ଓଲ୍ଡ ପାର୍ଟି । ତେଲେଙ୍ଗାନାର 2023 ବିଧାନସଭା ନିର୍ବାଚନ ଫଳାଫଳ ଏପରି କିଛି ସଂକେତ ଦେଉଛି ।
4ଟି ରାଜ୍ୟରେ ଜନାଦେଶ ଆସୁଥିବା ବେଳେ, ସବୁଠୁ ଅଧିକ ଚର୍ଚ୍ଚାରେ ତେଲେଙ୍ଗାନା । ତେଲେଙ୍ଗାନାରେ ଦୀର୍ଘ 9 ବର୍ଷ ଧରି ରାଜ୍ କରି ଆସୁଥିବା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓଙ୍କ ଭାରତ ରାଷ୍ଟ୍ର ସମିତି( ବିଆରଏସ)କୁ ଶକ୍ତ ଝଟକା ଲାଗିଛି । ସିଏମ୍ କେସିଆର ଲଗାତର ତୃତୀୟ ବିଜୟ ହାସଲ ସହ ହ୍ୟାଟ୍ରିକ କରିବାକୁ ପୁରା ଦମ୍ ଖଟାଇ ଦେଇଥିଲେ ମଧ୍ୟ, ସବୁ ଆଶା ଧୂଳିସାତ କରି ଦେଇଛି କଂଗ୍ରେସ ପାର୍ଟି । ଏପରିକି କେସିଆର ଦୁଇଟି ଆସନରେ ପ୍ରତିଦ୍ବନ୍ଦିତା କରୁଥିବା ବେଳେ, ଗୋଟିଏ ଆସନରେ ପଛୁଆ ରହିଛନ୍ତି । କେସିଆର ଗଜୱେଲ ଆସନରେ ଆଗରେ ଥିବା ବେଳେ, କାମାରେଡ୍ଡି ଆସନରେ କଂଗ୍ରେସ ପିସିସି ସଭାପତି ରେଭାନ୍ତ ରେଡ୍ଡିଙ୍କଠାରୁ ପଛରେ ଅଛନ୍ତି । କେସିଆରଙ୍କ ରାଜନୈତିକ ବିପତ୍ତିର ପ୍ରମୁଖ କାରଣ ସାଜିଛନ୍ତି ରେଭାନ୍ତ ରେଡ୍ଡି । ତେଲେଙ୍ଗାନାରେ ସତ୍ତା ପରିବର୍ତ୍ତନ ଏବଂ କଂଗ୍ରେସକୁ ମାଇଲେଜ୍ ଦେବାରେ ମୁଖ୍ୟ ଭୂମିକା ନେଇଛନ୍ତି ରେଭାନ୍ତ ରେଡ୍ଡି।
କେସିଆରଙ୍କ ପତନ ପଛର ଅନ୍ୟ ପ୍ରମୁଖ କାରଣ ହେଲା ଆଣ୍ଟି ଇନକମ୍ବେନ୍ସି ବା ସରକାର ବିରୋଧୀ ହାୱା । 2012ରେ ତେଲେଙ୍ଗାନା ଗଠନରେ କେସିଆରଙ୍କର ଥିଲା ମୁଖ୍ୟ ଭୂମିକା । ଯାହାର ପୂରା ରାଜନୈତିକ ଫାଇଦା କେସିଆରଙ୍କୁ ମିଳିଥିଲା । ସ୍ବତନ୍ତ୍ର ରାଜ୍ୟ ଗଠନ ପରେ 2014ରେ ଅନୁଷ୍ଠିତ ପ୍ରଥମ ବିଧାନସଭା ନିର୍ବାଚନରେ ବିଜୟୀ ହୋଇ ପ୍ରଥମ ମୁଖ୍ୟମନ୍ତ୍ରୀ ହୋଇଥିଲେ କେସିଆର । 2018ରେ ପୁଣି ଥରେ ବିଜୟୀ ହୋଇଥିଲେ କେସିଆର । ତେବେ 2023ରେ ଫେଲ୍ ମାରିଛି କେସିଆରଙ୍କ କିମିଆ । ସରକାର ବିରୋଧୀ ହାୱାର ଶୀକାର ହୋଇଛନ୍ତି କେସିଆର ।
ତୃତୀୟରେ କେସିଆରଙ୍କ ପାଇଁ ଭାରି ପଡ଼ିଛି ପରିବାର ବାଦ । କେସିଆର ନିଜେ ମୁଖ୍ୟମନ୍ତ୍ରୀ ଥିବା ବେଳେ, ପୁଅ କେଟିଆର ରାଜ୍ୟ ସରକାରରେ ନମ୍ବର ଟୁ ଭାବେ କାମ କରୁଥିଲେ । ଭଲ ମନ୍ତ୍ରାଳୟ ହାତେଇବା ସହ ସରକାରରେ ସବୁ ବଡ଼ ନିଷ୍ପତ୍ତି ନେଉଥିଲେ କେଟିଆର । ଝିଅ କବିତା ମଧ୍ୟ ବିଆରଏସ ରାଜନୀତିରେ ପ୍ରମୁଖ ଭୂମିକା ଗ୍ରହଣ କରୁଥିଲେ । ତେବେ ବିଆରଏସରେ ପରିବାରକୁ ଗ୍ରହଣ କରୁନଥିଲେ ଦଳର କିଛି ଭେଟେରାନ ଲିଡର । କେସିଆରଙ୍କ ଅତି ଘନିଷ୍ଠ, ତଥା କେସିଆରଙ୍କ ସରକାରରେ ପୂର୍ବତନ ମନ୍ତ୍ରୀ ଥିବା ଏଟେଲା ରାଜେନ୍ଦ୍ର ଦଳ ଛାଡ଼ି ବିଜେପିରେ ମିଶିଥିଲେ । କେବେଳ ସେତିକି ନୁହେଁ, ସେ କେସିଆରଙ୍କ ବିରୋଧରେ ଗଜୱେଲରେ ପ୍ରତିଦନ୍ବନ୍ଦିତା ମଧ୍ୟ କରୁଥିଲେ । ଏଭଳି ବିଆରଏସର ଅନେକ ନେତା କେସିଆରଙ୍କ ପରିବାରବାଦକୁ ବିରୋଧ କରି ଦଳ ଛାଡ଼ିଛନ୍ତି କିମ୍ବା ପରୋକ୍ଷ ବିରୋଧ ଜାହିର କରିଛନ୍ତି ।
ବିଆରଏସରେ ଦଳୀୟ କନ୍ଦଳ, ପରିବାର ବାଦ ଏବଂ ସରକାରୀ ବିରୋଧୀ ଲହର ସାଙ୍ଗକୁ, କଂଗ୍ରେସର '6 ଗ୍ୟାରେଣ୍ଟି' କେସିଆରଙ୍କ କ୍ଷମତା ରାଜନୀତି ଯାତ୍ରାରେ ବ୍ରେକ ଲଗାଇଛି । ଦୀର୍ଘ 9 ବର୍ଷ ଧରି ଅହରହ ଆଗକୁ ମାଡ଼ି ଚାଲିଥିବା ଗୋଲାପୀ କାର୍ କୁ ପଙ୍କଚର୍ କରି ଦେଇଛି ହାତ । କେସିଆରଙ୍କୁ କ୍ଲିନ୍ ବୋଲ୍ଡ କରି ତେଲେଙ୍ଗାନାରେ ରାଜ୍ କରିବାକୁ ଯାଉଛନ୍ତି କଂଗ୍ରେସ ଗେମ୍ ଚେଞ୍ଜର ରେଭାନ୍ତ ରେଡ୍ଡି।
ବ୍ୟୁରୋ ରିପୋର୍ଟ, ଇଟିଭି ଭାରତ
