ହାଇଦ୍ରାବାଦ: ତେଲେଙ୍ଗାନା ବିଧାନସଭାର 119 ଆସନରେ ଚାଲିଛି ଭୋଟ୍ ଗଣତି । ପ୍ରଥମେ ବାଲାଟ ପେପର ଗଣତି ପରେ ଆରମ୍ଭ ହୋଇଛି ଇଭିଏମ ଗଣତି । ବାଲାଟ ପେପର ଗଣତିରେ ଆଗରେ ରହିଥିଲା କଂଗ୍ରେସ ପାର୍ଟି । କଂଗ୍ରେସ ପ୍ରାର୍ଥୀମାନେ ଅଧିକ ଆସନରେ ଆଗୁଆ ରହିଥିଲେ । ପରେ ଆରମ୍ଭ ହୋଇଥିଲା ଇଭିଏମ ଭୋଟ୍ ଗଣତି । ଇଭିଏମ ଗଣତିର ପ୍ରାଥମିକ ପର୍ଯ୍ୟାୟରେ ଆଗୁଆ ରହିଛି କଂଗ୍ରେସ । ଶାସକ ଦଳ ବିଆରଏସ୍ ଏବଂ ବିରୋଧୀ କଂଗ୍ରେସ ମଧ୍ୟରେ କଡ଼ା ଟକ୍କର ହେଉଥିବା ବେଳେ, କଂଗ୍ରେସ ପ୍ରାର୍ଥୀମାନେ ଅଧିକ ଆସନରେ ଆଗୁଆ ଥିବା ଦେଖିବାକୁ ମିଳୁଛି ।
ତେଲେଙ୍ଗାନାରେ ପ୍ରାଥମିକ ଗଣତି ଅନୁସାରେ, କଂଗ୍ରେସ ପାର୍ଟି ଆଗୁଆ ଚାଲିଥିବା ବେଳେ, ବିଆରଏସ୍ ପଛରେ ପଡ଼ିଯାଇଛି । ଦ୍ବିତୀୟ ରାଉଣ୍ଡ ଭୋଟ୍ ଗଣତି ଶେଷ ସୁଦ୍ଧା କଂଗ୍ରେସ 56 ସିଟରେ ଆଗୁଆ ଥିବା ବେଳେ, ବିଆରଏସ୍ 36ଟି ସିଟରେ ଆଗୁଆ ରହିଛି । ସେହିପରି ବିଜେପି ପ୍ରାର୍ଥୀମାନେ 8ଟି ଆସନରେ ଆଗୁଆ ଚାଲିଥିବା ବେଳେ, ଏମ୍ଆଇଏମ୍ 1 ସିଟରେ ଆଗୁଆ ରହିଛି।
ହାଇପ୍ରୋଫାଇଲ୍ ସିଟ୍ ଏବଂ ହେବିୱେଟ୍ ପ୍ରାର୍ଥୀ: ପ୍ରାଥମିକ ଟ୍ରେଣ୍ଡ ଅନୁସାରେ ପିସିସି ସଭାପତି ତଥା କଂଗ୍ରେସ ପ୍ରାର୍ଥୀ ରେଭାନ୍ତ ରେଡ୍ଡି କାମାରେଡ୍ଡି ବିଧାନସଭା ଆସନରେ ଆଗୁଆ ଅଛନ୍ତି । ଦ୍ବିତୀୟ ରାଉଣ୍ଡ ସୁଦ୍ଧା ରେଭାନ୍ତ, ନିକଟତମ ପ୍ରତିଦ୍ବନ୍ଦୀ ମୁଖ୍ୟମନ୍ତ୍ରୀ ତଥା ବିଆରଏସ ସୁପ୍ରିମୋ କେ. ଚନ୍ଦ୍ରଶେଖର ରାଓଙ୍କ ଠାରୁ ଆଗରେ ଅଛନ୍ତି । ରେଭାନ୍ତ ରେଡ୍ଡି ନିଜର ପାରମ୍ପରିକ ଆସନ କୋଡଙ୍ଗଲରେ ମଧ୍ୟ ଆଗରେ ଚାଲିଛନ୍ତି । ମୁଖ୍ୟମନ୍ତ୍ରୀ କେସିଆର କାମାରେଡ୍ଡିରେ ପଛରେ ଚାଲିଥିବା ବେଳେ, ନିଜ ହୋମଟର୍ଫ ଗଜୱେଲ୍ ଆସନରେ ମଧ୍ୟ କଡ଼ା ଟକ୍କରର ସମ୍ମୁଖୀନ ହୋଇଛନ୍ତି ।
କଣ କହିଥିଲା ଏକଜିଟ ପୋଲ: ଏକାଧିକ ପ୍ରମୁଖ ଗଣମାଧ୍ୟମ ସଂସ୍ଥାର ଏକଜିଟ ପୋଲରେ ଦକ୍ଷିଣ ରାଜ୍ୟ ତେଲେଙ୍ଗାନାରେ ଆଶ୍ଚର୍ଯ୍ୟଜନକ ଭାବେ ଶାସକ ଭାରତ ରାଷ୍ଟ୍ର ସମିତି (ବିଆରଏସ) ଠାରୁ କଂଗ୍ରେସକୁ ଆଗରେ ରଖିଥିଲେ । 119 ଆସନ ବିଶିଷ୍ଟ ତେଲେଙ୍ଗାନାରେ, ସରକାର ଗଠନ ପାଇଁ ମ୍ୟାଜିକ ନମ୍ବର 60 ଥିବା ବେଳେ, ଇଣ୍ଡିଆ ଟିଭି -ସିଏନଏକ୍ସ କଂଗ୍ରେସକୁ 63-79 ଆସନ ସହ ସ୍ପଷ୍ଟ ବହୁମତ ମିଳିବା ନେଇ ଆକଳନ କରିଛନ୍ତି । ସେହିପରି ବିଆରଏସ 31-47 ଆସନ ସହ ବହୁମତ ପଛରେ ରହିବା ନେଇ ସଂସ୍ଥା କହିଛି ।
ସେହିପରି ବିଜେପି ମାତ୍ର 2-4 ଆସନ ଓ MIMIM ପୂର୍ବ ପରି 5- 7 ଆସନ ମଧ୍ଯରେ ସୀମିତ ରହିବା ନେଇଅନୁମାନ କରିଛି ସଂସ୍ଥା । ଜନ କି ବାତ ବିଆରଏସକୁ 40-55 ଓ କଂଗ୍ରେକୁ 48-64, ବିଜେପିକୁ 2-4 ଓ MIMIM କୁ 6-8 ଆସନ ମିଳିବା ନେଇ ଆକଳନ ପ୍ରକାଶ ପାଇଛି । ରିପବ୍ଲିକ ଟିଭି-ମାର୍ଟିଜ କଂଗ୍ରେସକୁ 58-68 ଆସନ, ବିଆରଏସକୁ 46-56 , ବିଜେପିକୁ 5-9 ଓ MIMIM 5-7 ଆସନ ମିଳିବ । ଟିଭି-9 ଭାରତ ବର୍ଷ- ପୋଲଷ୍ଟାର କଂଗ୍ରେସକୁ 49-59 ଆସନ ବିଆରଏସକୁ 48- 58 ଆସନ, ବିଜେପି 5-10 ଓ MIMIM 6-8 ଆସନ ମିଳିବା ନେଇ ଆକଳନ ପ୍ରକାଶ କରିଛି । ପ୍ରାୟ ସମସ୍ତ ଏକଜିଟ ପୋଲରେ କଂଗ୍ରେସ ବହୁମତର ନିକଟତର କିମ୍ବା ସ୍ପଷ୍ଟ ବହୁମତ ପାଇବା ନେଇ ଆକଳନ ପ୍ରକାଶ ପାଇଛି ।
ତେଲେଙ୍ଗାନାରେ 2018 ରେଜଲ୍ଟ: ତେଲେଙ୍ଗାନାରେ 2018 ବିଧାନସଭା ନିର୍ବାଚନରେ ବିଜୟୀ ହୋଇଥିଲା ଟିଆରଏସ୍ । ମୋଟ 119 ମଧ୍ୟରୁ ଟିଆରଏସ(ବର୍ତ୍ତମାନର ବିଆରଏସ) 88ଟି ସିଟ୍ ରେ ବିଜୟୀ ହୋଇଥିବା ବେଳେ, କଂଗ୍ରେସକୁ ମିଳିଥିଲା 19ଟି ଆସନ । ଏମଆଇଏମ 7 ସିଟ୍ ପାଇଥିବା ବେଳେ, ବିଜେପି 1 ଆସନରେ ବିଜୟୀ ହୋଇଥିବା ବେଳେ, ଟିଡିପିକୁ ମିଳିଥିଲା 2 ଆସନ । ସେହିପରି ସ୍ବାଧୀନ ପ୍ରାର୍ଥୀ 2ଟି ଆସରେ ବିଜୟୀ ହୋଇଥିଲେ।
ତେଲେଙ୍ଗାନାରେ 2014 ରେଜଲ୍ଟ: 2012ରେ ତେଲେଙ୍ଗାନା ସ୍ବତନ୍ତ୍ର ରାଜ୍ୟ ଗଠନ ପରେ 2014ରେ ହୋଇଥିବା ପ୍ରଥମ ବିଧାନସଭା ନିର୍ବାଚନ । ତେଲେଙ୍ଗାନା ରାଜ୍ୟ ଗଠନ ଅଭିଯାନର ପୁରୋଧା କେସିଆରଙ୍କୁ 2014 ନିର୍ବାଚନରେ ମିଳିଥିଲା ପୂର୍ଣ୍ଣ ବହୁମତ । ତେଲେଙ୍ଗାନା ବିଧାନସଭାର ମୋଟ 119 ଆସନ ମଧ୍ୟରୁ, ଟିଆରଏସ୍ (ବର୍ତ୍ତମାନର ବିଆରଏସ)କୁ ମିଳିଥିଲା 63 ଆସନ । କଂଗ୍ରେସ ପାଇଥିଲା 21 ଆସନ । ଟିଡିପି 15 ଆସନରେ ବିଜୟୀ ହୋଇଥିବା ବେଳେ, ଏମଆଇଏମ 7 ଆସନ ହାତେଇଥିଲା । ବିଜେପି ପ୍ରାର୍ଥୀ 5ଟି ଆସନରେ ବିଜୟୀ ହୋଇଥିବା ବେଳେ, ଅନ୍ୟାନ୍ୟଙ୍କୁ ମିଳିଥିଲା 8 ଆସନ ।
ବ୍ୟୁରୋ ରିପୋର୍ଟ, ଇଟିଭି ଭାରତ
