ହାଇଦ୍ରାବାଦ: ଲକଡାଉନ ସମୟରେ ଲୋକେ ଇଣ୍ଟରନେଟର ବହୁଳ ବ୍ୟବହାର କରୁଥିବା ବେଳେ ଏହାର ଫାଏଦା ଉଠାଇବା ପାଇଁ ପ୍ରସ୍ତୁତ ସାଇବର ଠକ । ବର୍ତ୍ତମାନ ସମୟରେ ଅନେକ ଅନଲାଇନ ଟ୍ରାନଞ୍ଜାକ୍ସନ ଓ କାରବାର ହେଉଥିବାରୁ ଏହାର ଲାଭ ଉଠାଇ ବ୍ୟକ୍ତିଗତ ତଥ୍ୟ ଚୋରି କରିବା ସହ ଲୋକଙ୍କ ଠକିବାରେ ଲାଗିଛନ୍ତି ଏହି ସାଇବର କ୍ରିମିନାଲ । ତେବେ କୋରୋନା ସଂକ୍ରମଣ ନେଇ ଦେଶବାସୀଙ୍କ ସ୍ବାସ୍ଥ୍ୟାବସ୍ଥାର ଟ୍ରାକ ରଖିବା ପାଇଁ କେନ୍ଦ୍ର ସରକାର ଲଞ୍ଚ କରିଥିଲେ ‘ଆରୋଗ୍ୟ ସେତୁ’ ଆପ୍ ।
ଏହି ଆପ୍ରେ ଆପଣ ନିଜ ସ୍ବାସ୍ଥ୍ୟାବସ୍ଥା ଯାଞ୍ଚ କରିବା ସହ ଆଖପାଖ ଅଞ୍ଚଳର କୋଭିଡ-19 ଖବର ପାଇପାରିବେ । ହେଲେ ଏହି ସରକାରୀ ଆପ୍କୁ ଏବେ ନକଲ କରିଛନ୍ତି କିଛି ଅପରାଧୀ । ଆଉ ନକଲି ଆପ ଜରିଆରେ ଲୋକଙ୍କ ମଧ୍ୟରେ ସୃଷ୍ଟି କରିଛନ୍ତି ଭୟର ବାତାବରଣ । ଏନେଇ ତେଲେଙ୍ଗାନାର ରଚାକୋଣ୍ଡା ଜିଲ୍ଲା ସହକାରୀ ପୋଲିସ କମିଶନର ଦେଇଛନ୍ତି କିଛି ଗୁରୁତ୍ବପୂର୍ଣ୍ଣ ପରାମର୍ଶ । ଲୋକେ କିପରି ଏହି ଫେକ ଆପ୍ରୁ ନିଜକୁ ସୁରକ୍ଷିତ ରଖିପାରିବେ ସେ ନେଇ ଜାରି କରିଛନ୍ତି ଗାଇଡଲଇନ ।
ସେ କହିଛନ୍ତି କି ଏହି ସରକାରୀ ଆପ୍କୁ ଆଇଫୋନରେ କେବଳ ଆପ ଷ୍ଟୋର ଓ ଆଣ୍ଡ୍ରଏଡ ଫୋନରେ କେବଳ ପ୍ଲେ ଷ୍ଟୋରରୁ ହିଁ ଡାଉନଲୋଡ କରିହେବ । ସାଇବର କ୍ରିମିନାଲ ଓ ଠକମାନେ ଯେପରି ପ୍ଲେ ଷ୍ଟୋର ଓ ଆପ ଷ୍ଟୋରକୁ ଆକ୍ସେସ ନକରିପାରିବେ ସେନେଇ କେନ୍ଦ୍ର ସରକାର ବିଭିନ୍ନ ବ୍ୟବସ୍ଥା କରିଛନ୍ତି । ଅନ୍ୟପଟେ ଏହାକୁ କଡା ଜବାବ ଦେଇ ଏହି ଠକମାନେ ଏକ ଭିନ୍ନ ପନ୍ଥା ଆପଣାଇଛନ୍ତି । ବର୍ତ୍ତମାନ ଲୋକଙ୍କ ପାଖକୁ ଆରୋଗ୍ୟ ସେତୁ ଆପ୍ର ନକଲି ଲୋଗୋ ସହ ବିଭିନ୍ନ ମେସେଜ ପଠାଇ ଏହି ଠକ ଲୋକଙ୍କୁ ଆକର୍ଷିତ କରୁଛନ୍ତି ।
ତେବେ ଏହି ନକଲି ଆପ୍ ଓ ଅସଲି ଆପ୍ ମଧ୍ୟରେ ରହିଛି ସାମାନ୍ୟ ତଫାତ୍ । ଅସଲି ଆପ୍ର ନାମ ‘Arogya Setu App’ ରହିଥିବା ବେଳେ ନକଲି ଆପ୍ର ନାମ ରହିଛି ‘Aarogya Setu App’ । ତେଣୁ ଏହି ଆପ୍ ଡାଉନଲୋଡ କରିବା ପୂର୍ବରୁ ଏହାର ସ୍ପେଲିଂ ଭଲ ଭାବେ ପରଖି ନିଅନ୍ତୁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
