ଭୁବନେଶ୍ବର: ବିଜେଡିରେ ଆଜି ବିଧିବଦ୍ଧ ଭାବେ ଯୋଗ ଦେଇଛନ୍ତି କଂଗ୍ରେସ ବରିଷ୍ଠ ନେତା ବୀରେନ ସେନାପତି । ଶଙ୍ଖ ଭବନରେ ଆୟୋଜିତ ମିଶ୍ରଣ ପର୍ବରେ ବୀରେନ ଓ ତାଙ୍କ ସହଯୋଗୀ ବିଜେଡିରେ ଯୋଗ ଦେଇଛନ୍ତି । ବିଜେଡିର ରାଜ୍ୟସଭା ସାଂସଦ ସସ୍ମିତ ପାତ୍ର ଏବଂ ବିଜେଡି ମୁଖପାତ୍ର ପ୍ରିୟବ୍ରତ ମାଝୀଙ୍କ ଉପସ୍ଥିତିରେ ସେମାନେ ବିଜେଡିରେ ସାମିଲ ହୋଇଛନ୍ତି । ସସ୍ମିତ ଓ ପ୍ରିୟବ୍ରତ ଉତ୍ତରୀୟ ଦେଇ ବୀରେନ ଏବଂ ତାଙ୍କ ସମର୍ଥକଙ୍କୁ ବିଜେଡିକୁ ସ୍ୱାଗତ କରିଛନ୍ତି ।
ବିରେନଙ୍କ ଯୋଗ ଦାନ ରାଉଲକେଲା ନିର୍ବାଚନ ମଣ୍ଡଳୀ ସମେତ ସୁନ୍ଦରଗଡ଼ ଲୋକସଭା କ୍ଷେତ୍ରରେ ଦଳ ଅଧିକ ଶକ୍ତିଶାଳୀ ହେବ ବୋଲି ବିଜେଡି ଆଶା ରଖିଛି । ରାଜ୍ୟସଭା ସାଂସଦ ସସ୍ମିତ ପାତ୍ର କହିଛନ୍ତି ଯେ, ବୀରେନ ସେନାପତି କଂଗ୍ରେସର ସାଧାରଣ ସମ୍ପାଦକ ପଦରୁ ଇସ୍ତଫା ଦେଇ ଆଜି ବିଜେଡିରେ ମିଶିଛନ୍ତି । ୨୦୧୯ ନିର୍ବାଚନରେ ରାଉରକେଲାରୁ ବୀରେନ କଂଗ୍ରେସ ଟିକଟ ବିଧାୟକ ପ୍ରାର୍ଥୀ ଭାବେ ନିର୍ବାଚନ ଲଢ଼ି ପରାଜିତ ହୋଇଥିଲେ । ସେହିପରି କଂଗ୍ରେସ ନେତା କୈଳାସ ଚନ୍ଦ୍ର ସାହୁ, ପ୍ରଦୀପ ମହାପାତ୍ର, ଜିତେନ୍ଦ୍ର ଦାସ, ବିଜୟ କୁମାର ସାହୁ ପ୍ରମୁଖ ଆଜି ଦଳରେ ସାମିଲ ହୋଇଛନ୍ତି । ବିଜେଡି ସଭାପତି ନବୀନ ପଟ୍ଟନାୟକ, ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ପକ୍ଷରୁ ସମସ୍ତଙ୍କୁ ଦଳକୁ ସ୍ୱାଗତ କରାଯାଇଛି ।
ବିଜେଡିରେ ସାମିଲ ହେବା ପରେ ବିରେନ କହିଛନ୍ତି, "ଆଜି ମୋ ପାଇଁ ଏକ ସ୍ମରଣୀୟ ଦିନ । ୩୭ ବର୍ଷ ତଳେ ଛାତ୍ର ଜୀବନରୁ କଂଗ୍ରେସରେ ସାମିଲ ହୋଇଥିଲି । ଗତ ୩୭ ବର୍ଷ ଭିତରେ ମୁଁ କଂଗ୍ରେସର ବହୁ ପଦ ପଦବୀରେ ରହିଛି । ଯେଉଁ ଦଳ ପାଇଁ ଆମେ ଜୀବନ ଓ ଯୌବନ ଦେଇଛୁ, ସେହି ଦଳ ଆଜି ନିଜର ସ୍ଥିତି ହରେଇବାକୁ ଯାଉଛୁ । ଦଳୀୟ ନେତୃତ୍ୱର ଯାବତୀୟ ତ୍ରୁଟି ଆଜି ଦଳକୁ ତଳକୁ ତଳ ନେଉଛି । ବେଶୀ ସମୟ ଆଉ ନଷ୍ଟ ନକରି ଯେଉଁ ଦଳ ଆଜି ରାଜ୍ୟ ପାଇଁ କାର୍ଯ୍ୟ କରୁଛି ସେଥିରେ ସାମିଲ ହେବାକୁ ନିଷ୍ପତ୍ତି ନେଲି ।"
ସେ ଆହୁରି କରିଛନ୍ତି, "ନବୀନ ପଟ୍ଟନାୟକଙ୍କୁ ବିକାଶର ମହାନାୟକ କୁହାଯାଉଛି । ଇତି ମଧ୍ୟରେ ଓଡିଶା ଏକ ନୂଆ ରୂପ ନେଇଛି । ସେହି ବିକାଶ ପ୍ରକ୍ରିୟାରେ ସାମିଲ ହେବାକୁ ମୁଖ୍ୟମନ୍ତ୍ରୀଙ୍କ ନେତୃତ୍ୱକୁ ଗ୍ରହଣ କରିଛି । ଆଦର ସହକାରେ ଦଳରେ ସାମିଲ କରିଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କୁ ମୁଁ ଧନ୍ୟବାଦ ଜଣାଉଛି ।"
ଇଟିଭି ଭାରତ, ଭୁବନେଶ୍ବର
