ହାଇଦ୍ରାବାଦ: ଆରମ୍ଭ ହୋଇଛି ଗଣତନ୍ତ୍ରର ମହାପର୍ବ । ଆଜି ଲୋକସଭା ନିର୍ବାଚନ ଲାଗି ପ୍ରଥମ ପର୍ଯ୍ୟାୟ ମତଦାନ । ପ୍ରଥମ ପର୍ଯ୍ୟାୟରେ 21ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର 102ଟି ଆସନ ଲାଗି ଆରମ୍ଭ ହୋଇଛି ମତଦାନ । 1625 ପ୍ରାର୍ଥୀଙ୍କର ହେଉଛି ଭାଗ୍ୟ ପରୀକ୍ଷା । 102 ସଂସଦୀୟ କ୍ଷେତ୍ର ମଧ୍ୟରେ 73ଟି ଜେନେରାଲ, 11ଟି ଅନୁସୂଚିତ ଜନଜାତି ଓ 18ଟି ଅନୁସୂଚିତ ଜାତି ଓ କେନ୍ଦ୍ରଶାସିତ ଅଞ୍ଚଳ ଅନ୍ତର୍ଭୁକ୍ତ । ତେବେ ଆଜି ଭୋଟ ଗ୍ରହଣ ହେଉଥିବା ଏହି 102 ଆସନ ମଧ୍ୟରୁ 2019 ସାଧାରଣ ନିର୍ବାଚନରେ ସର୍ବାଧିକ ଆସନ ବିଜେପି ଖାତାକୁ ଯାଇଥିଲା । ଜାଣନ୍ତୁ ଏହି 102 ଆସନ ମଧ୍ୟରୁ 2019 ନିର୍ବାଚନରେ କେଉଁ ଦଳ କେତେ ଆସନ ହାତେଇଥିଲେ...
ବିଜେପି ହାତେଇଥିଲା ସର୍ବାଧିକ 40 ଆସନ: 2019 ସାଧାରଣ ନିର୍ବାଚନ ଫଳାଫଳ ଉପରେ ନଜର ପକାଇଲେ ଆଜି ପ୍ରଥମ ପର୍ଯ୍ୟାୟରେ ଭୋଟ ଗ୍ରହଣ ହେଉଥିବା 102 ଆସନର ମଧ୍ୟରୁ ବିଜେପି ସର୍ବାଧିକ 40 ଆସନରେ ବିଜୟୀ ହୋଇଥିଲା । ଏହି 102 ଆସନରୁ ତାମିଲନାଡ଼ୁରେ ଶାସକ ଦଳ ଡିଏମ୍କେ ଦ୍ବିତୀୟ ସର୍ବାଧିକ 24 ଆସନ ହାତେଇ ଥିବାବେଳେ କଂଗ୍ରେସ କେବଳ 15 ଆସନରେ ଜିତି ପାରିଥିଲା । ସେହିଭଳି ବହୁଜନ ସମାଜ ପାର୍ଟି 3ଟି ଆସନ ଦଖଲ କରିଥିଲା । ସିପିଆଇ, ସିପିଏମ୍, ଲୋକ ଜନଶକ୍ତି ପାର୍ଟି (ଏଲ୍ଜେପି) ଓ ସମାଜବାଦୀ ପାର୍ଟି (ଏସ୍ପି) 2ଟି ଲେଖାଏଁ ଆସନ ଜିତିବାରେ ସଫଳ ହୋଇଥିଲେ । ସେହିଭଳି ଏହି 102 ଆସନ ମଧ୍ୟରୁ ଏଡିଏମ୍କେ, ଆଇୟୁଏମ୍ଏଲ୍, ଜେଡିୟୁ, ଏମ୍ଏନ୍ଏଫ୍, ଏନ୍ସିପି, ଏନ୍ଡିପିପି, ଏନ୍ପିଇପି, ଏନ୍ପିଏଫ୍, ଆର୍ଏଲ୍ଟିପି, ଏସ୍ଏଚ୍ଏସ୍, ଏସ୍କେଏମ୍ ଓ ଭିସିକେ ଭଳି ଦଳ ଗୋଟିଏ ଲେଖାଏଁ ଆସନ ନିଜ ସପକ୍ଷରେ ନେବାରେ ସଫଳ ହୋଇଥିଲେ ।
102 ଆସନର 2019 ନିର୍ବାଚନ ଫଳାଫଳ:-
| ଦଳର ନାମ | ଜିତିଥିବା ଆସନ ସଂଖ୍ୟା |
| BJP | 40 |
| DMK | 24 |
| INC | 15 |
| BSP | 03 |
| CPI | 02 |
| CPM | 02 |
| LJP | 02 |
| SP | 02 |
| ADMK | 01 |
| IUML | 01 |
| JD(U) | 01 |
| MNF | 01 |
| NCP | 01 |
| NDPP | 01 |
| NPEP | 01 |
| NPF | 01 |
| RLTP | 01 |
| SHS | 01 |
| SKM | 01 |
| VCK | 01 |
ଉଲ୍ଲେଖଥାଉ କି, ଏଥର ଦେଶରେ ଲୋକସଭା ନିର୍ବାଚନ 7ଟି ପର୍ଯ୍ୟାୟରେ ଅନୁଷ୍ଠିତ ହେବାକୁ ଥିବାବେଳେ ଆଜି ପ୍ରଥମ ପର୍ଯ୍ୟାୟ ଭୋଟିଂ ଅନୁଷ୍ଠିତ ହେଉଛି । ବୁଥରେ ଲମ୍ବା ଲାଇନରେ ଛିଡା ହୋଇ ମତ ସାବ୍ୟସ୍ତ କରୁଛନ୍ତି ଭୋଟର । 21ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର 102ଟି ଆସନ ପାଇଁ ଭୋଟ ଗ୍ରହଣ ଆରମ୍ଭ ହୋଇଛି । ଏହାସହିତ ଅରୁଣାଚଳ ପ୍ରଦେଶ ଓ ସିକ୍କିମରେ ଆଜି ବିଧାନସଭା ନିର୍ବାଚନ ପାଇଁ ମଧ୍ୟ ମତଦାନ ଆରମ୍ଭ ହୋଇଛି । ଅରୁଣାଚଳରେ 60 ଓ ସିକ୍କିମର 32 ବିଧାନସଭା ଆସନରେ ଭୋଟ ଦେଉଛନ୍ତି ଭୋଟର । ସେପଟେ ଭୋଟରଙ୍କୁ ରେକର୍ଡ ସଂଖ୍ୟାରେ ଭୋଟ୍ ଦେବାକୁ ଟ୍ବିଟ୍ ଯୋଗେ ଅନୁରୋଧ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
ବ୍ୟୁରୋ ରିପୋର୍ଟ, ଇଟିଭି ଭାରତ
