লাভলীনালৈ শুভেচ্ছা মুখ্যমন্ত্ৰীৰ

টকিঅ' অলিম্পিক গ্ৰাউণ্ডত উপস্থিত হৈছে গোলাঘাট জিলাৰ ধনশিৰি মহকুমাৰ বৰপথাৰৰ জীয়ৰী তথা বক্সাৰ লাভলীনা বৰগোঁহাই ৷ বক্সাৰ লাভলীনাক উৎসাহিত কৰাৰ উদ্দেশ্যে বুধাবাৰে গুৱাহাটী লাষ্টগেটৰ পৰা নেহৰু ষ্টেডিয়ামলৈ উলিওৱা হয় এক চাইকেল ৰেলী ৷ সৰুপথাৰ সমষ্টিৰ বিধায়ক বিশ্বজিৎ ফুকনৰ নেতৃত্বত উলিওৱা হয় এই ৰেলী ৷ চাইকেল ৰেলীত অংশগ্ৰহণ কৰে মুখ্যমন্ত্ৰী ড৹ হিমন্ত বিশ্ব শৰ্মাৰ লগতে কেইবাগৰাকীও মন্ত্ৰী-বিধায়কে ৷ ভাষণ প্ৰসংগত মুখ্যমন্ত্ৰী কয় যে, এইবাৰ টকিঅ' অলিম্পিকত বক্সিং প্ৰতিযোগিতাত লাভলীনাই ভাৰতক প্ৰতিনিধিত্ব কৰিব ৷ লাভলীনাই হৈছে অলিম্পিকত অংশগ্ৰহণ কৰা একমাত্ৰ অসমীয়া ৷ লাভলীনাই হৈছে উত্তৰ-পূৱৰ দ্বিতীয় গৰাকী মহিলা বক্সাৰ আৰু অসমীয়া হিচাপে অলিম্পিকলৈ যোৱা প্ৰথম গৰাকী অসমীয়া জীয়ৰী ৷ লাভলীনাক আশীৰ্বাদ তথা উৎসাহ দিয়াৰ উদ্দেশ্যে এই অনুষ্ঠানৰ আয়োজন কৰা হৈছে বুলি সদৰি কৰে মুখ্যমন্ত্ৰী গৰাকীয়ে ৷ এই অনুষ্ঠানত লাভলীনাৰ পিতৃ-মাতৃও উপস্থিত থাকে ৷