তিনিচুকীয়া, 3 আগষ্ট : প্ৰায় এটা বছৰে সন্ধান নাই গোপাল মাহাতোৰ ৷ নিৰুদ্দিষ্ট গোপাল মাহাতোক বিচাৰি হায়ৰাণ হৈ পৰিছে তেওঁৰ পত্নী আৰু দুই জীয়ৰী ৷ আৰক্ষীৰ ফালৰ পৰাও কোনো সন্ধান উলিওৱাত ব্যৰ্থ হোৱাৰ অভিযোগ উত্থাপন কৰিছে গোপাল মাহাতোৰ পত্নীয়ে ৷
গোপাল মাহাতোৰ পত্নীয়ে সংবাদ মাধ্যমৰ আগত উল্লেখ কৰা অনুসৰি, বিগত বৰ্ষৰ 6 জুলাইৰ কথা । তিনিচুকীয়া জিলাৰ মাকুম বেতজান পথৰ নিবাসী গোপাল মাহতো ঘৰৰ পৰা কলকাতা লৈ ওলায় গৈছিল বন্ধু দেৱাৰু গড়ৰ সৈতে । কিন্তু সেইদিনাৰ পৰা ঘৰলৈ উভতি অহা নাই গোপাল মাহাতো ।
মাকুমৰ নিবাসী গোপাল মাহাতো ৰাজগড় চাহ বাগিচাৰ ফেক্টৰীত নিয়োজিত আছিল । ৰাজগড় চাহ বাগিচাৰ ফেক্টৰীৰ এজন শ্ৰমিক দেৱাৰু গড়ৰ সৈতে গড়ৰ পুত্ৰৰ চিকিৎসাৰ বাবে গোপাল মাহাতো গৈছিল কলকাতালৈ । কিন্তু কলকাতাত চিকিৎসা কৰি উভতি আহোতে শিয়ালদহ ষ্টেচনৰ পৰা নিৰুদ্দেশ হয় ব্যক্তিগৰাকী ।
পৰিয়ালে সদৰী কৰা অনুসৰি, দেৱাৰু গড় আৰু তেখেতৰ পুত্ৰক ষ্টেচনত ৰখাই থৈ নাইকীয়া হয় গোপাল মাহাতো । উক্ত দিনাই গোপালে ফোন কৰিছিল পত্নীলৈ । সেই ফোনৰ পাচৰ পৰাই আৰু কোনো শুং সূত্ৰ নাই গোপালৰ ।
ইতিমধ্যে গোপালৰ পত্নী আৰু তেওঁৰ পৰিয়ালৰ লোকে গোপাল মাহাতোৰ নিৰুদ্দেশ সন্দৰ্ভত থানাত দাখিল কৰিছিল দুখনকৈ এজাহাৰ ৷ কিন্তু আৰক্ষী তথা প্ৰশাসনে আজিলৈকে নিৰুদ্দিষ্ট গোপালক বিচাৰি উলিয়াবলৈ সক্ষম নোহোৱাৰ অভিযোগ উত্থাপন কৰিছে পৰিয়ালৰ লোকে ।
উপায়হীন হৈ স্বামীক বিচাৰি ভাগৰি পৰি এতিয়া পুনৰ সংবাদ মাধ্যমৰ কাষ চাপিছে গোপালৰ পত্নীয়ে । নিৰুদ্দিষ্ট গোপালৰ পত্নীয়ে এতিয়া দুগৰাকী কন্যা সন্তানৰ সৈতে কটাইছে এক দুৰ্বিসহ জীৱন । গোপালক বিচাৰি দিয়াৰ লগতে উক্ত ঘটনাৰ উচিত তদন্ত কৰিবলৈ নিৰুদ্দিষ্ট গোপালৰ পৰিয়ালৰ লোকৰ আৰক্ষী তথা প্ৰশাসনৰ প্ৰতি কাতৰ আহ্বান ৷
লগতে পঢ়ক : Morigaon youth missing in AP: অন্ধ্ৰপ্ৰদেশৰ মাটিত ভৰি থৈয়েই নিৰুদ্দেশ অসমৰ যুৱক !
