লখিমপুৰ, 9 ডিচেম্বৰঃ নাগৰিকত্ব সংশোধনী বিধেয়কৰ বিৰুদ্ধে আজি আহ্বান জনোৱা অসম বন্ধৰ সৰ্বাত্মক প্ৰভাৱ সৰ্বত্ৰ অসমত ৷ লখিমপুৰ জিলাত সম্পূৰ্ণৰূপে বন্ধ যান বাহনৰ চলাচল ৷ বন্ধ আছে সকলো ব্যৱসায়িক প্ৰতিস্থান ৷ লগতে চৰকাৰী কাৰ্যালয় সমুহত দেখা গৈছে কৰ্মচাৰীৰ সেৰেঙা উপস্থিতি ৷
গোৱালপাৰাঃ ইফালে গোৱালপাৰা আৰু বঙাইগাঁৱতো অসম বন্ধৰ সৰ্বাত্মক প্ৰভাৱ দেখিবলৈ পোৱা গ'ল ৷
নাজিৰাঃ শিৱসাগৰ জিলাৰ নাজিৰাৰ বিভিন্ন স্থানত বন্ধৰ সমৰ্থন জনাই পুৱাই টায়াৰ জ্বলাই প্ৰতিবাদ সাব্যস্ত কৰে একাংশই ৷ কোনো কাৰণতে অসমীয়াই এই বিধেয়ক মানি নলয় বুলি দাবী কৰে প্ৰতিবাদকাৰী সকলে ৷ বিভিন্ন চৰকাৰ বিৰোধী শ্ল'গানেৰে ৰাজপথ উত্তাল কৰি তুলে প্ৰতিবাদকাৰী সকলে ৷
চিৰাংঃ যদিও বিটিচিত কেব প্ৰযোজ্য নহ'ব বুলি কোৱা হৈছিল তাৰ পিচতো চিৰাং জিলাৰ সৰ্বত্ৰে বন্ধৰ প্ৰভাৱ দেখিবলৈ পোৱা গ'ল ৷ কিন্তু সেই প্ৰতিবাদ দেখিবলৈ পোৱা গ'ল কোঁচ-ৰাজবংশীৰ সকলৰ জনজাতিকৰণৰ দাবীতহে ৷
ডিমা হাছাওঃ বন্ধৰ সম্পূৰ্ণ ওলোটা প্ৰভাৱ দেখিবলৈ পোৱা গ'ল ডিমা হাছাওতো ৷ সমগ্ৰ অসমতে কেব বিৰোধী প্ৰতিবাদে তোলপাৰ লগাই থকা সময়ত অসমৰ একমাত্ৰ পাহাৰীয়া জিলা ডিমা হাছাওত কেব সম্পৰ্কীয় কোনো ক্ৰিয়া-প্ৰতিক্ৰিয়া দেখিবলৈ পোৱা নগ'ল জিলাখনত ৷
