নেশ্যনেল ডেস্ক, ২১ অক্টোবৰ: ধাৰাসাৰ বৃষ্টিপাতৰ ফলত পশ্চিমবংগৰ দাৰ্জিলিঙৰ কেইবাটাও স্থানত হৈছে ভূমিস্খলন । নষ্ট হৈছে বহু সা-সম্পত্তি । লগতে মানুহৰ জীৱনৰ প্ৰতিও ভাবুকি আহিছে । বুধবাৰে ভূমিস্খলন হোৱাৰ পিছৰে পৰা দাৰ্জিলিঙৰ মহকুমা বিষয়া চালুংখে পীযুষ ভগৱান ৰাওৰ বাংলোত নিয়োজিত এজন গৃহৰক্ষী জোৱান সন্ধানহীন হৈ আছে ।
জিলা প্ৰশাসনৰ এক সূত্ৰই জানিবলৈ দিয়া মতে, নিৰুদ্দিষ্ট হৈ থকা গৃহৰক্ষী জোৱানজনৰ নাম সুমন থাপা । সুমন থাপা বাংলোৰ পিছফালে থকা গাৰ্ড ৰুমত বাস কৰে । বুধবাৰেও তেওঁ গাৰ্ড ৰুমত থকা অৱস্থাতে ভূমিস্খলন সংঘটিত হয় আৰু কোঠাটো তললৈ খহি পৰে । তেতিয়াৰে পৰা সন্ধানহীন হৈ আছে সুমন থাপা ।
বৃহস্পতিবাৰৰ পুৱা পৰ্যন্ত তেওঁক উদ্ধাৰ কৰিব পৰা নাই । তেওঁ দাৰ্জিলিঙৰ ৰংগলিয়া থানাৰ অধীনত কৰ্মৰত হৈ আছিল ।
আনহাতে, ছিকিমতো নেৰেনেপেৰা বৰষুণৰ বাবে ভয়াৱহ পৰিস্থিতিৰ সৃষ্টি হৈছে । কেইবাঠাইতো ভূমিস্খলন হোৱাৰ ফলত ১০ নং ৰাষ্ট্ৰীয় ঘাইপথেৰে যাতায়াত ব্যাহত হৈ পৰিছে । চুবুৰীয়া ৰাজ্য পশ্চিমবংগ সংযোগী পথেৰেও যাতায়াত বন্ধ হৈ পৰিছে । বৰষুণৰ ফলত দাৰ্জিলিং, ছিকিম আৰু জলপাইগুৰিৰ কেইবাটাও স্থান প্ৰভাৱিত হৈছে । বহু অঞ্চল জলমগ্ন হৈ পৰিছে । ভূমিস্খলনৰ বাবে ছিকিম আৰু দাৰ্জিলিঙলৈ যোৱা কেইবাটাও গুৰুত্বপূৰ্ণ পথ বন্ধ হৈ আছে ।
ছিকিমৰ পেলিঙৰ পৰা শিলিগুৰি সংযোগী কালিমপুং পথ ভূমিস্খলনৰ বাবে বন্ধ হৈ পৰিছে । নেৰানেপেৰা বৰষুণৰ ফলতে তিস্তা নদীৰ জলস্তৰ বৃদ্ধি পাইছে । তিস্তা নদীৰ পানীয়ে ছিকিমৰ প্ৰৱেশদ্বাৰ ৰংপোত থকা এখন দলঙৰ পিলাৰবোৰৰ যথেষ্ট ক্ষতিসাধন কৰিছে । ইতিমধ্যে দলঙখনেৰে যাতায়াত সীমিত কৰা হৈছে ।
বৰষুণৰ ফলত খেতিপথাৰতো শস্য নষ্ট হৈছে । কৃষকে অতি কষ্টেৰে কৰা শস্য এতিয়া পানীৰ তলত । বহু সা-সম্পত্তিও ক্ষতিগ্ৰস্ত হৈছে । একাংশ বানাক্ৰান্তক সুৰক্ষিত স্থানলৈ স্থানান্তৰ কৰা লগতে বান বিধ্বস্ত অঞ্চলবোৰলৈ সাহায্য সামগ্ৰী প্ৰেৰণ কৰা হৈছে বুলি প্ৰশাসনে জানিবলৈ দিছে ।
উল্লেখ্য যে, বুধবাৰে পুৱা গেংটকতো ভূমিস্খলন হৈছিল । প্ৰাকৃতিক দুৰ্যোগৰ বাবে উত্তৰ বংগত পৰ্যটকসকলে যথেষ্ট অসুবিধাৰ সন্মুখীন হৈছে । কিয়নো পথবোৰ বন্ধ হৈ পৰিছে আৰু বেয়া বতৰে বাগডোগ্ৰা বিমানবন্দৰৰ পৰা বিমান চলাচলতো প্ৰভাৱ পেলাইছে ।
লগতে পঢ়ক: আগ্ৰা যোৱাৰ পথত প্ৰিয়ংকা গান্ধীৰ কনভয়ক বাধা আৰক্ষীৰ
