তেজপুৰ, ৬ মে' : শোণিতপুৰ জিলাৰ লগতে অসমৰ অন্যান্য জিলাৰ চাহ বাগিচা সম্প্ৰদায়ৰ আদিবাসী আৰু যুৱচামক অগ্নিবীৰ হিচাপে সশস্ত্ৰ বাহিনীত নিযুক্তি প্ৰদানৰ উদ্দেশ্যে অনুষ্ঠিত এক বিশেষ প্ৰশিক্ষণ ৷ শাৰীৰিক, চিকিৎসা আৰু লিখিত পৰীক্ষাৰ বাবে যুৱচামক প্ৰস্তুত কৰাৰ উদ্দেশ্যে এই বিশেষ স্ক্ৰীনিং শিবিৰ অনুষ্ঠিত কৰা হয় ৷
ভাৰতীয় সেনাৰ প্ৰশিক্ষণ দলে আয়োজন কৰা এই অগ্নিবীৰ সজাগতা কাৰ্যসূচীত শোণিতপুৰ জিলাৰ অন্তৰ্গত বিভিন্ন চাহ বাগিচাৰ ল’ৰা-ছোৱালীকে ধৰি প্ৰায় ১২০০ যুৱ প্ৰতিভাই অংশগ্ৰহণ কৰে ৷ কাৰ্যসূচী অনুসৰি প্ৰথমে প্ৰ-পত্ৰ পূৰণ, প্ৰাৰম্ভিক প্ৰি নামভৰ্তি স্ক্ৰীনিং, শাৰীৰিক মানদণ্ড অনুসৰি প্ৰাৰম্ভিক পৰীক্ষণ আৰু গ্ৰাউণ্ড টেষ্ট কৰা হয় ৷ যাৰ ফলত অংশগ্ৰহণকাৰীসকলৰ মাজত এক উৎসৱমুখৰ আৰু উৎসাহী পৰিৱেশ সৃষ্টি হোৱা দেখা যায় ৷
অংশগ্ৰহণকাৰীসকলক তেওঁলোকৰ প্ৰস্তুতিৰ বাবে প্ৰেৰণা যোগোৱা আৰু যুৱকৰ পৰা এগৰাকী পৈণত সৈনিকলৈ ৰূপান্তৰিত কৰাই এই কাৰ্যসূচী অনুষ্ঠিত কৰাৰ মূল উদ্দেশ্য ৷ ভাৰতীয় সেনাৰ ৰঙাপৰা আৰ্মী কেণ্টৰ কমাণ্ডিং অফিচাৰে চাহ বাগিচা আৰু আদিবাসী সম্প্ৰদায়ৰ যুৱক-যুৱতীসকলক প্ৰেৰণা যোগায় ৷
প্ৰশিক্ষণ প্ৰদানকাৰী দলটোৱে কাৰ্যসূচীত অংশগ্ৰহণকাৰী যুৱচামক অগ্নিবীৰ নিযুক্তি পদ্ধতিৰ বিষয়ে বিতংভাৱে অৱগত কৰে ৷ আধুনিক ইণ্ডিয়া ফাউণ্ডেশ্যনৰ ৰাষ্ট্ৰীয় সভাপতি ডি কে চৌহানেও কাৰ্যসূচীটোত উপস্থিত থাকি সকলো আদিবাসী আৰু চাহ বাগিচা সম্প্ৰদায়ৰ যুৱক-যুৱতীক ভাৰতীয় সেনাবাহিনীত যোগদান কৰিবলৈ উৎসাহিত কৰে ৷
উল্লেখ্য যে, এই অনুষ্ঠানত অংশগ্ৰহণ কৰি আদিবাসী আৰু চাহ বাগিচা সম্প্ৰদায়ৰ যুৱক-যুৱতীসকলে অগ্নিবীৰৰ জৰিয়তে নিঃস্বাৰ্থভাৱে দেশমাতৃৰ সেৱা কৰিবলৈ আগ্ৰহ প্ৰকাশ কৰে ৷
লগতে পঢ়ক: টংলা মহাবিদ্যালয়ত অগ্নিবীৰ সম্পৰ্কীয় সজাগতা আৰু পৰামৰ্শ কাৰ্যসূচী
