নিউজ ডেস্ক, ১৫ মাৰ্চ : কৰ্ণাটকৰ প্ৰাক্তন মুখ্যমন্ত্ৰী তথা জ্যেষ্ঠ বিজেপি নেতা বিএছ য়েডিয়ুৰাপ্পাৰ বিৰুদ্ধে বৃহস্পতিবাৰে পক্সো আইনৰ অধীনত গোচৰ ৰুজু কৰা হৈছে । বেংগালুৰুত থকা তেওঁৰ বাসগৃহত এগৰাকী নাবালিকাক হাৰাশাস্তি কৰাৰ অভিযোগত যৌন অপৰাধৰ পৰা শিশুৰ কঠোৰ সুৰক্ষা আইনৰ (পক্সো) অধীনত এই গোচৰ ৰুজু কৰা হৈছে ।
এজাহাৰ অনুসৰি, অভিযুক্তই এই অপৰাধটো ২ ফেব্ৰুৱাৰীত বেংগালুৰুত সংঘটিত হৈছিল আৰু চহৰখনৰ এখন আৰক্ষী থানাত এই এজাহাৰ দাখিল কৰা হৈছিল । ভুক্তভোগীয়ে দাখিল কৰা অভিযোগৰ ভিত্তিত আৰক্ষীয়ে বিএছ য়েডিয়ুৰাপ্পাৰ বিৰুদ্ধে পক্সো আৰু 354 (এ)ৰ অধীনত এটা গোচৰ ৰুজু কৰিছে ।
ছোৱালীজনীৰ মাতৃয়ে অভিযোগ কৰে যে ৮১ বছৰীয়া য়েডিয়ুৰাপ্পাই ২ ফেব্ৰুৱাৰীত এখন সভাৰ সময়ত তেওঁৰ কন্যাক যৌন নিৰ্যাতন কৰিছিল ।
সদাশিৱনগৰ আৰক্ষী থানাত তেওঁৰ বিৰুদ্ধে দাখিল কৰা অভিযোগৰ সঁহাৰি দি য়েডিয়ুৰাপ্পাই কয়, "এগৰাকী মহিলাই মোৰ বিৰুদ্ধে অভিযোগ দাখিল কৰিছে আৰু পক্সোৰ অধীনত এটা গোচৰ ৰুজু কৰা হৈছে । মই আইন অনুসৰি ইয়াৰ মোকাবিলা কৰিম । মই কোনো ৰাজনৈতিক ষড়যন্ত্ৰৰ অভিযোগ নকৰোঁ ।"
ডলাৰ কল'নিৰ বাসভৱনত সাংবাদিকৰ সৈতে বাৰ্তালাপত তেওঁ কয়, "মই জানিব পাৰিছোঁ যে এগৰাকী মহিলাই মোৰ বিৰুদ্ধে অভিযোগ দাখিল কৰিছে । ডেৰ মাহ পূৰ্বে মাতৃ-কন্যা কান্দি কান্দি মোৰ ওচৰলৈ আহিছিল । মই তেওঁলোকক মোৰ ঘৰৰ ভিতৰলৈ আহিবলৈ কৈছিলোঁ আৰু তেওঁলোকৰ সমস্যাৰ বিষয়ে শুনিছিলোঁ । তেওঁলোকে মোক কৈছিল যে তেওঁলোকৰ সৈতে অন্যায় ব্যৱহাৰ কৰা হৈছে । পিছত মই আৰক্ষী আয়ুক্তক ফোন কৰি তেওঁলোকক ন্যায় প্ৰদান কৰাটো নিশ্চিত কৰিবলৈ প্ৰয়োজনীয় ব্যৱস্থা হাতত ল'বলৈ কওঁ ।" তেওঁ কয় ।
য়েডিয়ুৰাপ্পাই কয় যে তেওঁ মহিলাগৰাকী আৰু তেওঁৰ কন্যাক আৰক্ষী আয়ুক্তৰ কাৰ্যালয়লৈ পঠিয়াইছিল । "তাৰ পিচত তেওঁলোকে মোৰ বিৰুদ্ধে কথা ক'বলৈ আৰম্ভ কৰে । মই এই গোচৰটো আইনীভাৱে মোকাবিলা কৰিম । যেতিয়া আপুনি পৰোপকাৰৰ পথ লয়, তেতিয়া কি হয় তাৰ এইটো এটা উদাহৰণ । মই তেওঁলোকক টকা দিছিলোঁ, কাৰণ তেওঁলোক অসুবিধাত আছিল । অৱশ্যে বৰ্তমান ই এক বেলেগ ৰূপ লৈছে । সকলোবোৰৰ সন্মুখীন হওঁ এতিয়া ।" তেওঁ কয় ।
লগতে পঢ়ক :নিৰ্বাচনী বণ্ড সন্দৰ্ভত নিৰ্বাচন আয়োগৰ আবেদনৰ আজি উচ্চতম ন্যায়ালয়ৰ শুনানী
