নেশ্যনেল ডেস্ক, ৬ মে' : ঝাৰখণ্ডৰ ৰাজধানী চহৰ ৰাঁচীত ইডিৰ বৃহৎ অভিযান । অভিযানত জব্দ ২৫ কোটি টকা । কিন্তু এই বৃহৎ পৰিমাণৰ ধন ক'ৰ পৰা উদ্ধাৰ হৈছে জানেনে ? শুনিলে আপুনিও আচৰিত হ'ব ! সেৱক বা ঘৰৰ কাম কৰা লোকৰ বাসগৃহৰ পৰা উদ্ধাৰ হৈছে এই ধন । লোকজন জাহাংগীৰ আলম বুলি জানিব পৰা গৈছে ।
জাহাংগীৰে মন্ত্ৰী আলমগীৰ আলমৰ পিএ সঞ্জীৱ লালৰ ঘৰত কাম কৰে । ইডিয়ে পিএ সঞ্জীৱ লাল আৰু জাহাংগীৰৰ ঘৰত এই অভিযান চলায় । ইডিৰ সূত্ৰৰ মতে উদ্ধাৰ হোৱা ধনৰ পৰিমাণ বৃদ্ধি হোৱাৰ সম্ভাৱনা আছে । গণনা বৰ্তমানো চলি আছে । প্ৰাপ্ত তথ্য অনুসৰি, জাহাংগীৰ আলমে ইডিৰ জেৰাত স্বীকাৰ কৰিছে যে এই ধন মন্ত্ৰীজনৰ পিএ সঞ্জীৱ লালৰ । ইতিমধ্যে ইডিয়ে গোচৰটোত তদন্ত অব্যাহত ৰাখিছে ।
তাৎপৰ্যপূৰ্ণভাৱে, ইডিয়ে সোমবাৰে পুৱা ৰাঁচীৰ বহু স্থানত অভিযান চলায় । ইডিয়ে ৰাঁচীৰ ধুৰৱাৰ চেল চিটিকে ধৰি কেইবাটাও স্থানত অভিযান চলাইছে । জানিব পৰা মতে নিলম্বিত মুখ্য অভিযন্তা বীৰেন্দ্ৰ ৰামৰ সৈতে সম্পৰ্কিত এটা গোচৰত ইডিয়ে এই অভিযান চলাইছে । বৰ্তমানেও ইডিৰ অভিযান চলি আছে ।
সঞ্জীৱ লালৰ বাসগৃহতো অভিযান চলি থকাৰ কথা গম পোৱা গৈছে । প্ৰায় ১৬ গৰাকী ইডি বিষয়া এই অভিযানত জড়িত হৈ আছে । পুৱা ৫:৩০ বজাত, ইডিৰ দলটো সঞ্জীৱ লালৰ ঘৰত উপস্থিত হয় আৰু প্ৰাপ্ত তথ্যৰ ভিত্তিত তালাচী চলায় ।
প্ৰতিবেদন প্ৰস্তুত কৰাৰ সময়লৈ ৰাঁচীৰ চেল চিটি আৰু বডিয়া ৰোডত ইডিৰ অভিযান চলি আছে । তথ্য অনুসৰি, ৰাঁচীৰ চেল চিটিৰ পথ নিৰ্মাণ বিভাগৰ এজন অভিযন্তা বিকাশ কুমাৰৰ বাসগৃহতো ইডিয়ে অভিযান চলাইছে ।
লগতে পঢ়ক :কংগ্ৰেছৰ টকা নাই: প্ৰাৰ্থীয়ে ঘূৰাই দিলে টিকট - Lok Sabha Election 2024
