భాజపా నేత జిట్టా బాలకృష్ణారెడ్డిని పోలీసులు అరెస్ట్ చేశారు. నిన్న అర్ధరాత్రి మేడ్చల్ జిల్లా ఘట్కేసర్ వద్ద హయత్ నగర్ పోలీసులు అదుపులోకి తీసుకున్నారు. జూన్ 2 న అమరుల యాదిలో.. ఉద్యమ ఆకాంక్షల సాధన సభను జిట్టా నిర్వహించారు. ఈ కార్యక్రమంలో సీఎం కేసీఆర్ను కించపరుస్తూ డ్రామా వేయించారని జిట్టా బాలకృష్ణారెడ్డిపై తెరాస నేతలు చేసిన ఫిర్యాదుపై ఆయనను పోలీసులు అరెస్ట్ చేశారు. ఈ విషయం తెలుసుకున్న స్థానిక భాజపా కార్పొరేటర్లు, నేతలు హయత్నగర్ పోలీస్స్టేషన్ ముందు ఆందోళన చేపట్టారు.
జిట్టాను వెంటనే విడుదల చేయాలి:ఎలాంటి నోటీసులివ్వకుండా భాజపా నేత జిట్టా బాలకృష్ణారెడ్డిని అర్ధరాత్రి అదుపులోకి తీసుకోవడమేంటని భాజపా రాష్ట్ర అధ్యక్షుడు బండి సంజయ్ ప్రశ్నించారు. పోలీసుల తీరుపై ఆయన ఆగ్రహం వ్యక్తంచేశారు. తెలంగాణ ఉద్యమకారులు ప్రజాస్వామ్యబద్ధంగా సభలు, సమావేశాలు కూడా నిర్వహించుకునే హక్కులేదా? నోటీసులివ్వకుండా అర్ధరాత్రి హంతకుడు, దోపిడీ దొంగల మాదిరిగా కిడ్నాప్ చేసి తీసుకెళ్లడమేంటని మండిపడ్డారు. వెంటనే జిట్టా బాలకృష్ణారెడ్డిని విడుదల చేయాలని పేర్కొన్నారు. ఆయనకు ఏం జరిగినా కేసీఆర్ ప్రభుత్వం, పోలీసులే పూర్తి బాధ్యత వహించాల్సి ఉంటుందని.. లేనిపక్షంలో తీవ్ర పరిణామాలు చవిచూడాల్సి ఉంటుందని బండి సంజయ్ హెచ్చరించారు.