Rohit Sharma: టీమ్ఇండియాలో యువకులకు అవకాశాలు పెరిగాయి. ఈ మధ్య కాలంలో ప్రతి సిరీస్‌కు ఓ కొత్త ఆటగాడు అరంగేట్రం చేశాడు. కొందరి ఆటగాళ్లకు తుదిజట్టులో అవకాశం వస్తే.. మరికొందరికి రెండు, మూడు సిరీస్‌ల తర్వాత వచ్చింది. అయితే, భారత జట్టు సిరీస్‌ గెలిచిందంటే చాలు మిగిలిన మ్యాచ్‌లకు రిజర్వ్ బెంచ్ ఆటగాళ్ల అవకాశం ఇస్తున్నారు. దీనిపై తాజా టీమ్ఇండియా కెప్టెన్ రోహిత్ శర్మ ఓ క్రీడా ఛానెల్‌తో మాట్లాడాడు.
"మేము చాలా ఎక్కువ మ్యాచ్‌లు ఆడుతున్నాం. కాబట్టి ఆటగాళ్లకు గాయాలయ్యే అవకాశం ఉంది. కొన్ని సందర్బాల్లో ఆటలో తీరికలేని కారణంగా విశ్రాంతి అవసరం. ఇలాంటి సమయాల్లో రిజర్వ్ బెంచ్ బలంగా ఉండటం ముఖ్యం. వారికి ఛాన్స్‌లు ఇస్తూ ఉండటం వల్ల అంతర్జాతీయ స్థాయిలో ఆటగాళ్ల ప్రదర్శన మెరుగవుతుంది. తద్వారా భారత్ క్రికెట్‌ను సురక్షితమైన చేతుల్లో పెట్టవచ్చు. ఈ ప్రణాళికతోనే ఆటగాళ్ల రొటేషన్‌ జరుగుతుంది. గెలుపోటములు ముఖ్యం కాదు. మేం ఒక జట్టుగా ఉండేందుకే ప్రాధాన్యం ఇస్తాం. మేమంతా కలిసి రాణిస్తేనే జట్టు విజయానికి తోడ్పడగలం. ఆ దిశగానే పనిచేస్తున్నాం."
-- రోహిత్ శర్మ, టీమ్ఇండియా కెప్టెన్