Rana Apologizes : టాలీవుడ్ విలక్షణ నటుడు రానా దగ్గుబాటి.. గతంలో తాను చేసిన వ్యాఖ్యల విషయంలో తాజాగా క్షమాపణలు చెప్పారు. బాలీవుడ్ నటి సోనమ్ కపూర్కు క్షమించమని కోరారు. రీసెంట్గా హైదరాబాద్లో జరిగిన ఓ ఈవెంట్లో రానా.. హీరో దుల్కర్ సల్మాన్ను పొగడే క్రమంలో పేరు ప్రస్తావించకుండా ఓ హీరోయిన్ గురించి మాట్లాడారు. దీంతో నెటిజన్లంతా సోనమ్కపూర్ను ఫుల్ ట్రోల్ చేస్తున్నారు. ఆమెపై వ్యతిరేకత పెరిగిపోయింది. ఈ క్రమంలోనే రానా సారీ చెప్పారు.
"నా వ్యాఖ్యల కారణంగా సోనమ్ కపూర్కు వ్యతిరేకంగా జరుగుతున్న ప్రచారంపై తీవ్రంగా ఇబ్బంది పడ్డాను. అది పూర్తిగా నిజం కాదు. నిజానికి అది ఎంతో తేలికగా తీసుకోవాల్సిన విషయం అది. స్నేహితులలా మేము సరదాగా ఆట పట్టించుకుంటుంటాం. నా వ్యాఖ్యలు తప్పుగా అన్వయం అయినందుకు విచారం వ్యక్తం చేస్తున్నాను. అందుకే సోనమ్ కపూర్-దుల్కర్కు హృదయపూర్వకంగా క్షమాపణలు చెబుతున్నాను. వారిద్దరినీ నేను ఎంతో గౌరవిస్తాను. తప్పుగా అన్వయం అయిన నా వ్యాఖ్యలకు ఈ వివరణ ముగింపు పలుకుతుందని భావిస్తున్నాను" అని రానా వివరించారు.
దుల్కర్ సల్మాన్ నటించిన కింగ్ ఆఫ్ కొత్త ఆగష్టు 24న రిలీజ్ కానుంది. దీంతో హైదరాబాద్లో రీసెంట్గా ప్రీ రిలీజ్ వేడుక నిర్వహించారు. ముఖ్య అతిథిగా నేచురల్ స్టార్ నానితో పాటు రానా హాజరయ్యారు. ఈ సందర్భంగా రానా మాట్లాడుతూ... "దుల్కర్ చాలా సహనంగా ఉంటారు. చాల సింపుల్ కూడా. అందుకే దుల్కర్ వైల్డ్ యాక్షన్ సినిమా చేయడం నాకు ఎంతో ఎగ్జైటింగ్గా అనిపించింది. గతంలో దుల్కర్ సల్మాన్ చేసిన ఓ హిందీ మూవీ నిర్మాతలు నా ఫ్రెండ్స్. ఆ సినిమా చిత్రీకరణ హైదరాబాద్లో జరగుతున్నప్పుడూ సెట్స్కి వెళ్ళాను. ఆ చిత్రంలో నటిస్తున్న ఓ బాలీవుడ్ హీరోయిన్ షాపింగ్ గురించి భర్తతో ఫోన్లో మాట్లాడుకుంటూ ఉంది. దుల్కర్ను వెయిట్ చేయించింది. టేకుల మీద టేకులు తీసుకుంది. మధ్య మధ్యలో ఫోన్స్ మాట్లాడుతూ ఉంది. కానీ దుల్కర్ మాత్రం ఎండలో సహనంగా ఎదురు చూస్తూనే ఉన్నాడు. చివరికి నా సహనం కూడా తగ్గిపోయింది. దుల్కర్ మాత్రం కామ్ గా ఉన్నారు" అని రానా చెప్పుకొచ్చాడు.