Three farmers died: భారీ వర్షాలతో ముంచెత్తిన వరుణుడు కాస్త శాంతించటంతో.. రైతులు పొలాల బాట పట్టారు. నాట్లు వేసుకుంటూ.. ఇప్పటికే వేసిన పంటల్లో కలుపు తీసుకుంటూ.. పనుల్లో నిమగ్నమైపోయారు. ఇదే సమయంలో మళ్లీ అక్కడక్కడ చిటపట చినుకులు పలకరించాయి. ఆ ముసురును పట్టించుకోకుండా.. పనుల్లో మునిగిపోయిన రైతులపై మృత్యువు పిడుగుల రూపంలో దాడి చేసి మింగేసింది.
జయశంకర్ భూపాలపల్లి జిల్లాలో పిడుగుపాటుకు మొత్తంగా ముగ్గురు రైతులు బలయ్యారు. వేర్వేరు ప్రాంతాల్లో వ్యవసాయ పనులు చేస్తున్న క్రమంలో ఒక్కసారిగా పిడుగులు పడగా.. ముగ్గురు రైతులు పొలాల్లోనే ప్రాణాలు విడిచారు. రేగొండ మండలంలోని పొనగల్లుకు చెందిన వంగ రవి(50) అనే రైతు తన చేనులో కలుపు కుప్పలు తీసేందుకు వెళ్లాడు. పని చేస్తున్న క్రమంలో ఉరుములు మెరుపులతో ఒక్కసారిగా పిడుగుపడింది. దీంతో.. రవి పొలంలోనే కుప్పకూలిపోయాడు.