BJP Protest at Jubilee Hills Police station: హైదరాబాద్ జూబ్లీహిల్స్ పోలీస్స్టేషన్ వద్ద తీవ్ర ఉద్రిక్తత చోటుచేసుకుంది. పబ్కు వచ్చిన 17 ఏళ్ల బాలికపై జరిగిన సామూహిక అత్యాచార ఘటనలో నిందితులను వెంటనే శిక్షించాలని డిమాండ్ చేస్తూ.. పెద్దఎత్తున భాజపా, బీజేవైఎం శ్రేణులు పోలీస్‌స్టేషన్‌ను ముట్టడించాయి. హోంమంత్రి మహమూద్ అలీ రాజీనామా చేయాలని భాజపా శ్రేణులు నినాదాలు చేశాయి. ఎఫ్‌ఐఆర్‌ ఆలస్యంగా నమోదు చేయడంపై సమాధానం చెప్పాలని డిమాండ్ చేశాయి.
పెద్దఎత్తున నిరనస తెలుపుతుండటంతో.. భద్రతాబలగాలు ఆ ప్రాంతాన్ని మోహరించాయి. నిరసనకారులతో పోలీసు ఉన్నతాధికారులు మాట్లాడినా.. ఫలితం లేకపోయింది. భాజపా శ్రేణుల నిరసనలతో జూబ్లీహిల్స్ ప్రధానరహదారిపై పెద్దఎత్తున ట్రాఫిక్ జామ్ అయింది. ఇక చేసేదేమీలేక.. ఆందోళనకారులను పోలీస్ సిబ్బంది అరెస్ట్ చేశారు. ఈ క్రమంలో.. అక్కడ కాసేపు ఉద్రిక్తత నెలకొంది. భాజపా కార్యకర్తల అరెస్ట్‌పై బండి సంజయ్ ఆగ్రహం వ్యక్తం చేశారు. అరెస్ట్ చేసిన కార్యకర్తలను తక్షణమే విడుదల చేయాలని డిమాండ్ చేశారు.