Prices of Laddu Making Goods High in Srisailam: శ్రీశైలం దేవస్థానంలో లడ్డూ తయారీ కోసం గుత్తేదారు సరఫరా చేస్తున్న సరకుల ధరలు దారుణంగా ఉన్నాయని, నవంబరు నెలకు సంబంధించి పరిశీలిస్తే మార్కెట్‌ కంటే రూ.42 లక్షలు తేడా ఉందని ధర్మకర్తల మండలి అధ్యక్షుడు రెడ్డివారి చక్రపాణిరెడ్డి తెలిపారు. తేడాను అరికట్టకపోతే ఈ వ్యత్యాసం పెరిగిపోతుందని, టెండర్‌ రద్దు చేయాల్సిన ఆవశ్యకత ఉందని అన్నారు.
మంగళవారం శ్రీశైలంలో ధర్మకర్తల మండలి సమావేశం నిర్వహించారు. అనంతరం చక్రపాణిరెడ్డి విలేకరులకు పలు అంశాలు వెల్లడించారు. దేవస్థానంలో పడితరం సరకుల సరఫరాకు 20 ఏళ్ల నుంచి ఒకే గుత్తేదారు.. తన వాళ్లు ముగ్గురి పేర్ల మీద టెండర్లు వేస్తూ, అసాధారణ ధరలు వేస్తున్నట్లు తెలిపారు. మార్కెట్‌లో జీసీసీ వారు కిలో జీడిపప్పు రూ.690కే ఇస్తామని ముందుకు వస్తుంటే, ఇక్కడి గుత్తేదారు శ్రీశైల దేవస్థానానికి రూ.960కు సరఫరా చేయడం ఎంతవరకు సబబని ప్రశ్నించారు.