ৰাজ্যজুৰি অব্যাহত থকা মুষলধাৰ বৰষুণৰ ফলত (Heavy rainfall hits Assam) বিভিন্ন প্ৰান্তত বান আৰু ভূমিস্খলনে ভয়াৱহ ৰূপ ধাৰণ কৰাৰ সময়তে শুকুৰবাৰে পুনৰ খুলি দিয়া হৈছে কাৰ্বি লাংপি জলবিদ্যুৎ প্ৰকল্পৰ বান্ধৰ ৪ টাকৈ শ্লু’ইজ গেট (NEPCO release water from Karbi Langpi power project) ৷ বৃহস্পতিবাৰেও চাৰিটাকৈ শ্লুইজ গেইট খুলি দিয়াৰ ফল স্বৰূপে বৈঠালাংছ’কে ধৰি বৃহৎৰ অঞ্চল জলমগ্ন হৈ পৰে (Floods in karbi Anglong)৷ নেৰেপেৰা বৰষুণৰ ফলত প্ৰকল্পটোত জমা হোৱা অতিৰিক্ত পানী মোকলাই দিবলৈ পুনৰ খুলি দিয়া হৈছে এই চাৰিটাকৈ শ্লু’ইজ গেট ৷ উক্ত শ্লুইজ গেইট খুলি দিয়াৰ পিছত আতংকিত হৈ পৰিছে বৰপানী নৈৰ নৈপৰীয়া ৰাইজ ৷ সম্প্ৰতি আটাইকেইটা শ্লু’ইজ গেট এৰি দিয়াত আকৌ ফেনে-ফোটোকাৰে ওফন্দি উঠিছে নৈৰ বুকু ৷ যাৰ ফলত বৈঠালাংছ'ৰ লগতে নামনিৰ বৃহত্তৰ অঞ্চল যেনে, হোজাই, নগাঁও জিলাৰ কচুৱা, লংজাপ, কামপুৰ, ৰহা আদিত ঘৰ-বাৰী, খেতি-পথাৰ জলমগ্ন হোৱাৰ আশংকা কৰা হৈছে ৷