গুৱাহাটী, ১০ ছেপ্টেম্বৰ : মুখ্যমন্ত্রী হিমন্ত বিশ্ব শৰ্মাক নিজৰ লগতে তেওঁৰ পৰিয়ালৰ সকলো সদস্যৰ সম্পত্তিৰ তালিকা ৰাজহুৱা কৰাৰ প্ৰত্যাহ্বান জনাইছে কৃষক মুক্তি সংগ্ৰাম সমিতিয়ে ৷ দেওবাৰে গুৱাহাটীৰ গান্ধীবস্তিস্থিত মুখ্য কাৰ্যালয়ত এখন সংবাদমেল সম্বোধন কৰি সংগঠনটোৰ সাধাৰণ সম্পাদক বিদ্যুৎ শইকীয়া, মুখ্য সাংগঠনিক সম্পাদক আকাশ দলে আৰু কাৰ্যালয় সম্পাদক বাসুদেৱ বড়োৱে মুখ্যমন্ত্রী হিমন্ত বিশ্ব শৰ্মাক এই প্ৰত্যাহ্বান জনায় ৷
সংবাদ মাধ্যমত প্ৰকাশিত বাতৰিৰ উদ্ধৃতি দি সংবাদমেলত বিদ্যুৎ শইকীয়াই কয় যে, নগাঁও জিলাৰ কলিয়াবৰ বৰভগীয়া মৌজাৰ দাড়িগজি গাঁৱত মুখ্যমন্ত্ৰী হিমন্ত বিশ্ব শৰ্মাৰ পত্নী ৰিণিকি ভূঞা শৰ্মাই ক্ৰয় কৰিছে ৫০ বিঘা ২ কঠা ১৯ লেচা কৃষিভূমি ৷ যি কৃষিভূমি একে দিনতে, একেখন পথাৰত, একেটা প্লটতে, একেটা কোম্পানীয়ে ক্ৰয় কৰিছে ৷ মাত্ৰ ১০ মাহৰ ভিতৰতে এই কৃষিভূমিৰ শ্ৰেণী পৰিৱৰ্তন কৰি উদ্যোগ স্থাপনৰ বাবে মুখ্যমন্ত্ৰী হিমন্ত বিশ্ব শৰ্মাৰ পত্নী ৰিণিকি ভূঞা শৰ্মাই লাভ কৰিছে ভাৰত চৰকাৰৰ খাদ্য সংসাধন মন্ত্ৰালয়ৰ পৰা ‘প্ৰধানমন্ত্ৰী কিষাণ সম্পদ যোজনা’ আঁচনিৰ অধীনত ১০ কোটি টকাৰ ৰাজসাহায্য ৷
এই অভিযোগ উত্থাপন কৰি তেওঁ কয় যে মাত্ৰ ১০ মাহৰ ভিতৰত এনেদৰে মাটি ক্ৰয় কৰি মাটিৰ শ্ৰেণী পৰিৱৰ্তনেৰে উদ্যোগ স্থাপনৰ বাবে ৰাজসাহায্য লাভ কেৱল মুখ্যমন্ত্রীৰ পত্নীৰ ক্ষেত্ৰতহে সম্ভৱ ৷ তেওঁ লগতে কয় যে যি সময়ত অসমৰ বিভিন্ন প্ৰান্তত সৰ্বসাধাৰণ ৰাইজ উচ্ছেদৰ বলি হৈ গৃহহীন হৈছে, ভেঁটি হেৰুৱাই দিশহাৰা হৈছে সেই সময়তে মুখ্যমন্ত্রীৰ পৰিয়ালৰ প্ৰতিজন সদস্যৰ সম্পত্তিৰ পৰিমাণ দিনক দিনে বৃদ্ধি পাইছে ৷ এক কথাত এই পৰিয়ালটো সম্পত্তি দখলৰ প্ৰতিযোগিতাত নামিছে বুলি তেওঁ কয় ৷