গুৱাহাটী, 17 জানুৱাৰী :ৰাজ্য জোঁকাৰি যোৱা শিক্ষয়িত্ৰী অর্ণমাই বৰাৰ হত্যাকাণ্ড (Arnamai Bora murder case) সন্দৰ্ভত মঙলবাৰে গুৱাহাটী উচ্চ ন্যায়ালয়ে গুৰুত্বপূৰ্ণ ৰায়দান কৰে । গুৱাহাটী উচ্চ ন্যায়ালয়ৰ (Gauhati High Court) এই ৰায়ে উদঙাই দিলে আৰক্ষীৰ তদন্তৰ ফোপোলা স্বৰূপ । ৰাজ্য জোঁকাৰি যোৱা শিক্ষয়িত্ৰী অর্ণমাই বৰাৰ ধৰ্ষণ আৰু হত্যাকাণ্ডৰ তথ্য দিয়াত আৰক্ষী চৰম ব্যৰ্থতা প্ৰদৰ্শন কৰাৰ বাবে শিক্ষয়িত্ৰী অর্ণমাই বৰাৰ ধৰ্ষণ আৰু হত্যাকাণ্ডৰ মূল অভিযুক্ত অৱশেষত মুকলি আকাশলৈ ওলাই অহাৰ সুযোগ লাভ কৰিলে ।
আৰক্ষীয়ে কোনোধৰণৰ তথ্য দিব নোৱৰাৰ বাবে গুৱাহাটী উচ্চ ন্যায়ালয়ে আজিৰ শুনানিত শিক্ষয়িত্ৰী অর্ণমাই বৰাৰ ধৰ্ষণ আৰু হত্যাকাণ্ডৰ মূল অভিযুক্ত মইনুল হকৰ শাস্তি লাঘৱ কৰি তিনিবছৰৰ কাৰাদণ্ডৰ নিৰ্দেশ দিয়ে । সেইমতে যোৱা 2018 চনৰ পৰা শিক্ষয়িত্ৰী অর্ণমাই বৰাৰ ধৰ্ষণ আৰু হত্যাকাণ্ডৰ গোচৰত জেলত থকা মইনুল হক তিনিবছৰ কাৰাবাস সম্পূৰ্ণ কৰাৰ পিচত গুৱাহাটী উচ্চ ন্যায়ালয়ৰ নিৰ্দেশ মতে, মুকলি আকাশৰ তললৈ আহে । আনহাতে, মইনুল হকৰ সহযোগী চেলিম উদ্দিনৰ যাৱজ্জীৱন কাৰাদণ্ডৰ নিৰ্দেশ গুৱাহাটী উচ্চ ন্যায়ালয়ে বাহাল ৰাখে ।
উল্লেখযোগ্য যে, এক বৰ্বৰ, পাশৱিক ধৰ্ষণ আৰু হত্যাকাণ্ডই কঁপাইছিল সমগ্ৰ অসমক । হোজাই জিলাৰ যমুনামুখত এগৰাকী শিক্ষয়িত্ৰী বিদ্যালয় ছুটী হোৱাৰ পিচত ঘৰলৈ গৈ থকা অৱস্থাতে আদবাটতে দুৰ্বৃত্তই দলৱদ্ধ ধৰ্ষণ কৰি হত্যা কৰে ৷ তাৰ পাচত মৃতদেহ কপিলী নৈত উটুৱাই দিয়াৰ দৰে এক জঘন্য কাণ্ড সংঘটিত হৈছিল 2017 চনৰ মে’ মাহত ৷ এই ঘটনাৰ পাচতে হোজাই জিলাতে নহয় সমগ্ৰ অসম উত্তেজিত হৈ পৰিছিল ।
অসমৰ ৰাইজে এই ঘটনাৰ সৈতে জড়িত লোকক শীঘ্ৰে আটক কৰি উচিত শাস্তি দিয়াৰ দাবী কৰিছিল । সমগ্ৰ অসমত মম হাতত লৈ নাৰী সমাজ ৰাজপথলৈ ওলাই আহিছিল । তাৰ পিচতে সষ্টম হৈ পৰিছিল যমুনামুখ আৰক্ষী । আৰক্ষীয়ে অভিযান চলাই গ্ৰেপ্তাৰ কৰিছিল প্ৰথমে মইনুল হক নামৰ এজন লোকক ।
তাৰ পিচতে মইনুলৰ আন এজন সংগী চেলিম উদ্দিনক গ্ৰেপ্তাৰ কৰিছিল আৰক্ষীয়ে । আৰক্ষীয়ে দীৰ্ঘ তদন্ত আৰু আদালতত চলা দীৰ্ঘ শুনানিৰ অন্তত যোৱা 2018 চনৰ 24 জুলাইত বিচাৰৰ অন্তিম শুনানিৰ অন্তত দুয়ো অভিযুক্তক দোষী সাব্যস্ত ঘোষণা কৰি ৰায় প্ৰদান কৰিছিল । শাস্তিৰ ৰায় হোজাই জিলাৰ অতিৰিক্ত জিলা আৰু সত্ৰ ন্যায়াধীশৰ আদালতে প্ৰদান কৰিছিল ।