বৰাকত বাংলা ভাষাই প্ৰাধান্য পাবই লাগিব বুলি পুনৰ এবাৰ হুংকাৰ প্ৰদীপ দত্ত ৰয়ৰ

কাছাৰ, 19 অক্টোবৰ :বৰাকত অসমীয়া ভাষাক চূড়ান্তভাৱে অপমান কৰাৰ বিৰুদ্ধে ৰাজ্যৰ এতিয়া সৰ্বত্ৰে তীব্ৰ প্ৰতিক্ৰিয়াৰ সৃষ্টি হৈছে ৷ দোষীক কৰায়ত্ব কৰি উপযুক্ত শাস্তি বিহাৰ বাবে বিভিন্ন দল সংগঠনে অব্যাহত ৰাখিছে প্ৰতিবাদ ৷ কিন্তু তাৰ পাছতো যেন গা-লৰা নাই বৰাকৰ একাংশ দল সংগঠনৰ ৷ এতিয়াও তেওঁলোক অটল নিজৰ স্থিতিত ৷

তেওঁলোকৰ দাবী, বড়োলেণ্ডত যদি বড়ো ভাষা চলিব পাৰে তেতিয়া হ’লে বৰাকতো বাংলা ভাষাই প্ৰাধান্য পাব লাগিব ৷ বাংলা ভাষাক লৈ কোনো ধৰণৰ বৈষম্য স্বীকাৰ কৰি লোৱা নহ’ব বুলি পুনৰ এক প্ৰকাৰ হুংকাৰ প্ৰদান কৰিছে বৰাক ডেমক্ৰেটিক ফ্ৰণ্টৰ মুখ্য উপদেষ্টা প্ৰদীপ দত্ত ৰয়ে ৷

উল্লেখযোগ্য যে, বৰাকত অসমীয়া ভাষা ফলকত ক’লা ৰং সানি ভাষাটোক অপমান কৰাৰ পাছতে সমগ্ৰ অসম জুৰি ব্যাপক আন্দোলন আৰু প্ৰতিক্ৰিয়াৰ সৃষ্টি হৈছিল ৷ সেই ঘটনাৰ সৈতে জড়িত থকা বুলি সন্দেহ প্ৰকাশ কৰি বৰাক ডেমক্ৰেটিক ফ্ৰন্টৰ উপদেষ্টা প্ৰদীপ দত্ত ৰয়ক মঙলবাৰে কাছাৰ আৰক্ষী অধীক্ষকে মাতি আনি কৰিছিল সোধ-পোছ ৷

সেই সময়তে আৰক্ষী অধীক্ষকৰ কাৰ্যালয়ৰ সন্মুখত সাংবাদিকৰ আগত পুনৰ এবাৰ হুংকাৰ প্ৰদান কৰি প্ৰদীপ দত্ত ৰয়ে কয় যে, বৰাকত বাংলা ভাষাৰ ব্যৱহাৰ হ’বই লাগিব ৷ এই হুংকাৰৰ পাছতে এতিয়া ৰাজ্যৰ দল সংগঠনে কেনে ধৰণে প্ৰতিক্ৰিয়া প্ৰকাশ কৰে তথা চৰকাৰে কি ব্যৱস্থা গ্ৰহণ কৰে সেয়া হ’ব লক্ষণীয় ৷

লগতে পঢ়কঃ পানবাৰী মছজিদৰ পৰিচালনা সমিতিক লৈ দুই সংগঠনৰ মাজত খণ্ড-যুদ্ধ