নেশ্যনেল ডেস্ক,৩ মে' :সমগ্ৰ দেশবাসীয়ে পৱিত্ৰ ঈদ উদযাপন কৰি থকাৰ মাজতে ৰাজস্থানৰ যোধপুৰত সাম্প্ৰদায়িক সংঘৰ্ষ (Communal clashes in Jodhpur)। দুই ধৰ্মৰ সমৰ্থকৰ মাজত তীব্ৰ সংঘাত । সোমবাৰে সংঘটিত এই ঘটনাৰ মাজতে কঠোৰ হৈছে যোধপুৰ প্ৰশাসন । অনিৰ্দিষ্টকাললৈ যোধপুৰত ইণ্টাৰনেট সেৱা স্থগিত ৰখাৰ নিৰ্দেশ দিছে জিলা প্ৰশাসনে (Internet services suspended in Jodhpur)। সম্প্ৰতি উত্তেজনাময় পৰিৱেশে বিৰাজ কৰিছে সমগ্ৰ অঞ্চলত ।
উল্লেখ্য যে সোমবাৰে নিশা চহৰখনৰ জলোৰী গেটত ধৰ্মীয় পতাকাকলৈ দুটা সম্প্ৰদায়ৰ মাজত কাজিয়াৰ সূত্ৰপাত হৈছিল । শিলগুটি নিক্ষেপ কৰাৰ লগতে ঈদৰ নামাজৰ বাবে অঞ্চলটোত স্থাপন কৰা লাউডস্পীকাৰবোৰো একাংশ লোকে ভাঙি পেলাইছিল । ঘটনা নিয়ন্ত্ৰণৰ বাবে আৰক্ষীয়ে লাঠিচালনা কৰিবলগীয়াও হয় । ইফালে এই ঘটনাত কেইবাগৰাকী লোক আহত হয় ।
সমগ্ৰ ঘটনাক ইতিমধ্যে মুখ্যমন্ত্ৰী অশোক গেহলটে গৰিহণা দিছে (CM Ashok Gehlot condemns Jodhpur incident)। ঘটনাক দুৰ্ভাগ্যজনক আখ্যা দিয়াৰ লগতে পৰিস্থিতি নিয়ন্ত্ৰণৰ বাবে প্ৰশাসনক উচিত ব্যৱস্থা লোৱাৰ বাবেও তেওঁ নিৰ্দেশ দিয়ে ।