নিউজ ডেস্ক, 14 আগষ্ট : ৰাষ্ট্ৰপতি দ্ৰৌপদী মুৰ্মুৱে সোমবাৰে 77 সংখ্যক স্বাধীনতা দিৱসৰ প্ৰাক মুহূৰ্তত দেশবাসীক সম্বোধন কৰে ৷ ৰাষ্ট্ৰপতিৰ এই ভাষণ আকাশবাণীৰ সমগ্ৰ ৰাষ্ট্ৰীয় নেটৱৰ্কত সম্প্ৰচাৰ কৰাৰ লগতে সকলো দূৰদৰ্শন চেনেলত সম্প্ৰচাৰ কৰা হৈছিল ৷
ভাষণত ৰাষ্ট্ৰপতি গৰাকীয়ে কয় যে, ''আমাৰ প্ৰত্যেকৰে বহুতো পৰিচয় আছে – জাতি, ধৰ্ম, ভাষা আৰু অঞ্চলৰ বাহিৰেও আমি আমাৰ পৰিয়াল আৰু বৃত্তিৰ সৈতেও পৰিচয় আছে ৷ কিন্তু এই সকলোৰে ওপৰত আমাৰ এটা পৰিচয় আছে ৷ সেইয়া হ’ল ভাৰতীয় নাগৰিক হিচাবে আমাৰ পৰিচয় ৷ আমাৰ প্ৰত্যেকেই এজন সমান নাগৰিক; আমাৰ প্ৰত্যেকৰে এই দেশত সমান সুযোগ, সমান অধিকাৰ আৰু সমান কৰ্তব্য আছে ৷''
তেওঁ পুনৰ কয় যে, ''ভাৰতে কেৱল বিশ্বৰ মঞ্চত নিজৰ সঠিক স্থান পুনৰ প্ৰাপ্ত কৰাই নহয়, ই আন্তঃৰাষ্ট্ৰীয় শৃংখলাতো নিজৰ স্থিতি বৃদ্ধি কৰিছে ৷ প্ৰবাসী ভাৰতীয় সকলৰ সৈতে মোৰ ভ্ৰমণ আৰু বাৰ্তালাপৰ সময়ত, মই ভাৰতৰ ওপৰত এক নতুন আস্থা লক্ষ্য কৰিছোঁ ৷ ভাৰতে সমগ্ৰ বিশ্বতে উন্নয়নমূলক আৰু মানৱীয় লক্ষ্যৰ প্ৰচাৰত এক গুৰুত্বপূৰ্ণ ভূমিকা পালন কৰি আছে ৷''
''বিশ্ব পৰ্যায়ত মুদ্ৰাস্ফীতি চিন্তাৰ কাৰণ হৈয়েই আছে; কিন্তু ভাৰত চৰকাৰ, আৰ বি আইয়ে ইয়াক নিয়ন্ত্ৰণ কৰিবলৈ সক্ষম হৈছে বুলি ভাষণত উল্লেখ কৰে ৰাষ্ট্ৰপতি গৰাকীয়ে ৷ তেওঁ কয় চৰকাৰে সাধাৰণ জনতাক উচ্চ মুদ্ৰাস্ফীতিৰ পৰা ৰক্ষা কৰাৰ লগতে দৰিদ্ৰ লোকক অধিক নিৰাপত্তাৰ আৱৰণ প্ৰদান কৰাত সফল হৈছে ৷ বিশ্বৰ অৰ্থনৈতিক বিকাশৰ বাবে বিশ্বই ভাৰতৰ ফালে চাই বুলি উল্লেখ কৰে তেওঁ ৷ ''
ভাষণ প্ৰসংগত তেখেতে কয় যে, ''জি-20 সভাপতিত্বৰ সৈতে, ভাৰতে বাণিজ্য আৰু বিত্তৰ ক্ষেত্ৰত সিদ্ধান্ত গ্ৰহণক ন্যায়সঙ্গত প্ৰগতিৰ দিশত ঠেলি দিব পাৰে ৷ বাণিজ্য আৰু বিত্তৰ বাহিৰেও, মানৱ উন্নয়নৰ বিষয়বোৰো কাৰ্যসূচীত আছে ৷ মই নিশ্চিত যে বিশ্বব্যাপী সমস্যাসমূহৰ মোকাবিলাত ভাৰতৰ প্ৰমাণিত নেতৃত্বৰ সৈতে সদস্য-ৰাষ্ট্ৰসমূহে এই দিশবোৰত কাৰ্যকৰী পদক্ষেপ ল'বলৈ সক্ষম হ'ব ৷''
স্বাধীনতা সংগ্ৰামীসকলক সোঁৱৰি তেওঁ কয়, ''মই মোৰ সহ-নাগৰিকসকলৰ সৈতে জ্ঞাত আৰু অজ্ঞাত স্বাধীনতা সংগ্ৰামীসকলক কৃতজ্ঞতাৰে শ্ৰদ্ধাঞ্জলি জ্ঞাপন কৰিছো যাৰ ত্যাগে ভাৰতৰ বাবে ৰাষ্ট্ৰসমূহৰ মাজত ইয়াৰ সঠিক স্থান পুনৰ প্ৰাপ্ত কৰাটো সম্ভৱ কৰি তুলিছে ৷ মাতঙ্গিনী হাজৰা আৰু কনকলতা বৰুৱাৰ দৰে মহান মহিলা স্বাধীনতা সংগ্ৰামীসকলে ভাৰত-মাতাৰ বাবে প্ৰাণ আহুতি দিছিল ৷ মা কস্তুৰবায়ে সত্যাগ্ৰহৰ কঠিন পথত প্ৰতিটো খোজতে ৰাষ্ট্ৰপিতা মহাত্মা গান্ধীৰ সৈতে খোজ মিলাইছিল ৷''